Yu tink saiyentis ku eksplayn how di yoonivers ahn laif mi staat? No. Sohn peepl seh dat saiyentis weh stodi di yoonivers ku eksplayn how di yoonivers mi staat. Bot, Profesa Marcelo Gleiser, weh stodi di yoonivers ahn weh teech da di Dartmouth College mi ga sohnting els fi seh bowt dis. Hihn da wahn persn weh noh tink dat ih pasabl fi noa weda wahn Gaad egzis er nat. Hihn mi seh: “Wi stil noh eksplayn how di yoonivers mi staat.”

Dis da weh wahn aatikl eena di Science News magazeen mi seh bowt di way how laif mi staat: “Ih noh pasabl fi seh egzakli how laif mi staat aaf pahn Ert: Moas a di rak dehn ahn di boan dehn fahn di animal dehn weh kuda mi shoa weh mi hapm wen di ert mi fers staat op noh egzis nohmoh.” Weh da magazeen seh shoa dat saiyentis stil noh ansa di kweschan, How di yoonivers ahn laif mi staat?

Bot yu mait wanda, ‘If sohnbadi dizain laif pahn ert, da hoo mi dizain it?ʼ Yu mait aalso aks yuself dehnya kweschan: ‘If wi ga wahn waiz ahn lovin Kriyayta, wai hihn alow hyoomanz fi sofa? Wai hihn alow mek dehn ga soh moch difrent rilijan? Wai hihn wuda alow peepl weh wership ahn fi du wahn lata bad tingz?ʼ

Saiyens kyaahn ansa dehndeh kweschanz. Bot dat noh meenz dat wi kyaahn fain ansaz weh wi ku chros. In fak, wahn lata peepl fain ansaz weh dehn ku chros eena di Baibl.

If yu wuda waahn si wai sohn saiyentis tek owt di taim fi stodi di Baibl ahn seh dat dehn bileev eena wahn Kriyayta, goh da jw.org ahn saach fi “weh sohn peepl seh bowt how laif mi fos staat.”