Wai ih Impoatant fi Noa Dat Wahn Kriyayta Egzis?
Wai ih impoatant fi noa dat wahn Kriyayta egzis? If dehn ga proof weh shoa yu dat Gaad egzis, den yu mait praabli waahn egzamin di evidens weh proov dat di Baibl da fahn hihn. An if yu chros weh di Baibl seh, den yu ku reeli benifit eena dehnya wayz:
Yu wahn injai laif moa
DI BAIBL SEH: “[Gaad] du aala dehn gud tingz fi unu; ih giv unu rayn fahn hevn ahn di difrent froots akaadn tu dehn seezn; ih provaid food fi mek unu eet til unu satisfai ahn hapi.”—Aks 14:17.
WEH IH MEEN? Evriting weh nachral eena dis werl weh yu injai da wahn gif fahn di Kriyayta. Yu wahn reeli apreeshiayt dehndeh gif wen yu fain owt dat di Wan weh gi yu dehndeh gif reeli kay bowt yoo.
Yu wahn fain gud advais weh ku help yu now
DI BAIBL SEH: “Yu wahn andastan weh raichos, jos, ahn fyaa, an evriting weh gud.”—Proverbs 2:9.
WEH IH MEEN? Az yu Kriyayta, Gaad noa weh yu need fi mek yu bee hapi. Wen yu reed di Baibl, yu ku fain wahn lata tingz weh wahn help yu eena yu laif.
Yu wahn geh di ansaz tu yu kweschan dehn
DI BAIBL SEH: “Yu wahn fain di nalij a Gaad.”—Proverbs 2:5.
WEH IH MEEN? Wen yu fain owt dat di Kriyayta egzis, dat ku help yu fain di ansaz tu veri impoatant kweschanz weh yu mait ga, laik: Wat da di perpos a laif? Wai dehn ga soh moch sofarin? Weh hapm wen wi ded? Yu ku fain ansaz weh yu ku chros eena di Baibl.
Yu wahn ga wahn hoap fi di fyoocha
DI BAIBL SEH: “‘Ah noa gud-wan dat di tingz weh Ah di tink bowt fi unu, da loan tingz fi pees ahn noh fi sofarin, fi gi unu wahn fyoocha ahn wahn hoap.ʼ”—Jeremiah 29:11.
WEH IH MEEN? Gaad pramis dat eena di fyoocha hihn wahn geh rid a wikidnis, sofarin, an eevn det. Wen yu chros eena Gaad pramis dehn, yu hoap eena da fyoocha wahn help yu ga korij wen yu di deel wid yu prablemz.
