Famili Laif ahn Frenship
Fi wahn lata peepl ih haad fi ga wahn gud rilayshanship wid famili ahn frenz. Kansida sohn Baibl prinsipl weh ku help yu fi ga beta rilayshanship wid adaz.
NOH BEE SELFISH
BAIBL PRINSIPL: ‘Luk owt fi wan anada, ahn noh onli fi unu oanself.ʼ—Filipiyanz 2:4.
WEH IH MEEN? Wi wahn ga gud rilayshanship wid adaz if wi foakos pahn weh wi ku du fi dehn raada dan weh dehn ku du fi wee. If wi selfish, wi wahn damij wi rilayshanship wid adaz. Fi egzampl, if wahn hozban er waif selfish ahn tink onli bowt ih oan dizaiyaz, ih ku en op di cheet pan ih marij paadna. Aalso, peepl noh waahn bee frenz wid sombadi hoo aalwayz di boas bowt weh dehn ga er weh dehn noa. Di buk The Road to Character seh: “peepl weh onli kay bowt dehnself ahn noh tink bowt adaz wahn ga lata prablemz.”
WEH YU KU DU:
-
Help adaz. Gud frenz chros eech ada ahn dehn aalwayz redi fi help eech ada. Sohn risaach shoa dat peepl hoo help adaz naamali sofa les fahn dipreshan ahn dehn feel beta bowt dehnself.
-
Shoa kompashan. Kompashan meenz fi feel wahn nada persn payn eena yu haat. If yu shoa kompashan, yu noh wahn seh tingz weh seemz laik wahn joak fi hert ada peepl feelinz.
Wen yu shoa kompashan, yu aalso moa payshent wid adaz. Eena dis way, kompashan ku help yu noh fi bee prejudis an ih ku aalso help yu fi mek frenz wid peepl fahn difrent kolcha er bakgrong.
-
Spen taim wid adaz. Di moa taim yu spen wid adaz, di beta yu wahn geh fi noa dehn. If yu waahn fain gud frenz, yu need fi taak bowt tingz weh dehn kansaan bowt ahn weh impoatant tu dehn. Soh lisn gud ahn shoa dat yu kay bowt dehn. Wahn stodi shoa dat “sinsyaa kanvasayshanz ku akchwali mek peepl feel hapiya.”
BEE WAIZ WEN YU DI CHOOZ YU FRENZ
BAIBL PRINSIPL: “Bad kompni spail gud karakta.”—1 Korintyanz 15:33.
WEH IH MEEN? Di peepl weh yu spen taim wid wahn afek yu—weda eena wahn gud way er wahn bad way. Peepl weh stodi hyooman bihayvya seh dat wahn persn frenz ku afek ih laif eena wahn lata wayz. Fi egzampl, if wahn persn ga frenz weh smoak er weh divoas, ih mait waahn du di saym ting laik ih frenz.
WEH YU KU DU: Mek frenz wid peepl hoo ga kwalitiz weh yoo admaiya er weh yoo wuda waahn ga. Fi egzampl, luk fi peepl weh ga rispek, weh jenaros, weh haspitabl, ahn weh noh tink onli bowt dehnself.
SOHN ADA BAIBL PRINSIPL
Pahn jw.org, yu ku wach veedyo weh bays pahn di Baibl weh dizain fi help marid peepl, yoots, ahn pikni fi mek dehn famili laif beta
NOH SEH TINGZ WEH KU HERT ADAZ.
“Som peepl taak widowt tink ahn da laik dehn di stab yu wid wahn soad.”—PROVERBS 12:18.
BEE JENAROS.
“Di jenaros persn wahn praspa.”—PROVERBS 11:25.
CHREET ADAZ DI WAY YU WAAHN DEHN CHREET YU.
“Eena evriting yu fi chreet ada peepl di sayhn way how yoo waahn dehn chreet yoo.”—MACHYU 7:12.
