Fizikal Helt
Di Baibl da noh wahn medikal buk. Bot stil, ih gat een advais weh ku help wi liv wahn heltiya laif. Kansida sohn Baibl prinsipl weh ku help yu fi improov yu fizikal helt.
TEK KAYR A YU BADI
BAIBL PRINSIPL: “Nobadi neva yet hayt ih oan badi. Insted, wi feed wi badi ahn tek kayr a it.”—Ifeezhanz 5:29.
WEH IH MEEN? Dis Baibl prinsipl inkorij wi fi tek kayr a wi fizikal helt. Wahn ripoat shoa dat wahn lata helt prablemz da bikaaz a di way wi chooz fi liv wi laif. Soh, if wi mek di rait chois wi ku ga beta helt.
WEH YU KU DU:
-
Eet Helti Food. Chooz fi eet helti food ahn jrink inof waata.
-
Stay Aktiv. Wen yu stay aktiv yu ku improov yu helt noh mata how oal yu, eevn if yu sik reeli bad. Eevn doa frenz, famili, ahn daktaz ku help yu wid yu eksasaiz proagram, onli yoo ku mek da proagram werk!
-
Get Inof Sleep. Afta wahn wail, peepl weh noh geh inof sleep mait geh reeli sik. Wahn lata peepl noh geh inof sleep bikaaz dehn chooz fi du ada tingz insted. Soh if yoo chooz fi geh inof sleep, yu akchwali di chooz fi liv beta.
STAP BAD HABITS
BAIBL PRINSIPL: “Mek wi kip weh fahn evriting weh noh wahn mek wi badi ahn wi spirit kleen.”—2 Korintyanz 7:1.
WEH IH MEEN? Wi wahn bee heltiya if wi chooz noh fi yooz tubaako, weh da sohnting weh ku kaaz dizeez an weh ku eevn kil wi.
WEH YU KU DU: Set wahn day fi stap yu bad habit, ahn maak it pahn yu kalinda. Bifoa da day kohn, dash weh aal sigaret, ashchray, laita, an eni ada tingz weh ga fi du wid da bad habit. Kip weh fahn peepl an plays wehpaat dehn praktis dis bad habit. Tel yu frenz ahn famili dat yu mek op yu main fi stap yu bad habit soh dat dehn ku help yu.
SOHN ADA BAIBL PRINSIPL
Yu ku geh wahn kapi a di Baibl if yu kantak wan a Jehoava Witnisiz eena yu kamyooniti
DU TINGZ EENA WAHN SAYF WAY.
“If yu bil wahn nyoo hows, ahn yu put wahn varanda pahn di roof, yu mos put wahn loa waal [er, raylin] rong it, bikaaz if sombadi jrap aaf fan it ahn ded, yu wahn bee blodgilti.”—DEUTERONOMY 22:8.
KANCHROAL YU ANGA.
“Di wan weh sloa tu anga ga gud andastandin, bot di wan weh haysti shoa dat ih foolish.”—PROVERBS 14:29.
NOH OAVA EET.
“Noh bee . . . monks peepl weh greedi.”—PROVERBS 23:20.
