How fi Manij Moni
Wahn lata peepl ga les moni prablemz bikaaz dehn fala Baibl prinsiplz.
GA WAHN GUD PLAN
BAIBL PRINSIPL: “Wahn persn weh werk haad mek planz, an ih wahn ga sokses, bot aal hoo haysti wahn bee poa.”—Proverbs 21:5.
WEH IH MEEN? Yu need fi mek wahn plan ahn den mek shoar yu fala it. Soh plan kyaafuli. Memba, yu praabli kyaahn bai evriting weh yu waahn. Soh bee waiz wen yu di spen moni.
WEH YU KU DU:
-
Stik tu humoch yu mi plan fi spen. Mek wahn lis a aal di tingz weh yu need fi bai ahn put dehn eena difrent groop laik food, kloaz, ahn bilz. Den disaid humoch moni yu wahn spen pahn eech groop. If yu spen tu moch moni pahn wan groop, tek moni fahn wahn nada groop fi kova di difrens. Fi egzampl, if yu spen moa moni pahn gyas fi yu veekl dan weh yu mi plan, yooz moni fahn wahn neks groop weh noh az impoatant. Maybi yu ku yooz di moni weh yu mi set wan said fi goh eet owt.
-
Chrai noh fi baro moni. If ih pasabl, chrai noh fi baro moni. Insted, chrai fi sayv op fi bai di tingz weh yu need. If yu yooz yu kredit kyaad, chrai fi pay aaf di balans evri mont soh dat yu noh haftu pay inchres. Bot if yu baro moni ahn kyaahn pay it bak soon, set op wahn plan fi pay it bak, ahn stik tu yu plan.
Wahn risaach seh dat wen peepl bai wid wahn kredit kyaad, dehn ten fi spen moa moni dan dehn naamali wud. Soh if yu oan wahn kredit kyaad, bee waiz wen yu di yooz it.
BEE WAHN GUD WERKA
BAIBL PRINSIPL: “Di layzi wan noh plaant eena winta, soh ih wahn di bayg wen ih noh ga notn joorin di haavis.”—Proverbs 20:4.
WEH IH MEEN? Wahn reezn wai wahn persn ku bee poa da bikaaz ih layzi. Soh bee wahn gud werka, ahn chrai fi manij yu moni gud soh dat yu wahn ga weh yu need eena di fyoocha.
WEH YU KU DU:
-
Werk haad. Wen yu werk haad ahn yu rispansabl, yu baas wahn laik yu an ih wahn waahn yu kantinyu werk far ahn.
-
Bee aanis. Noh teef fahn yu baas. If yu teef, peepl wahn fain owt bowt it ahn dehn noh wahn waahn yu werk fi dehn.
-
Noh bee greedi. If yu aalwayz di chrai fi geh moa ahn moa moni, afta wahn wail yu wahn damij yu helt ahn yu rilayshanship wid adaz. Memba dat moni da noh di moas impoatant ting eena laif.
SOHN ADA BAIBL PRINSIPL
Reed di Baibl onlain, ih avaylabl eena honjridz a difrent langwij pahn jw.org
NOH WAYS TAIM AHN MONI PAHN BAD HABIT.
“Wahn jronkad ahn di wan weh greedi wahn bee poa, ahn di wan weh lov fi sleep wahn kova ihself wid tayr op kloaz.”—PROVERBS 23:21.
NOH WORI TU MOCH BOWT MONI.
“Noh wori bowt laif, laik weh yu wahn eet er jrink; ahn noh wori bowt yu badi, laik weh yu wahn wayr.”—MACHYU 6:25.
NOH GA RED AIY.
“Wahn man weh ga red aiy eega fi geh rich, an ih noh noa dat ih wahn geh poa.”—PROVERBS 28:22.
Yu Mait Aalso Laik
MOA TAPIKS
How fi Liv Pahn Les Moni
Wen wi en op wid les moni di kom een aal af a sodn, ih ku kaaz wi fi feel wahn lata schres, bot di Baibl ga wahn lata gud advais pahn weh wi ku du fi mek wi ku liv pahn les moni.
