BAIBL PRINSIPL: “Di persn weh sloa tu anga beta dan wahn maiti man.”—Proverbs 16:32.

WEH IH MEEN? Wi benifit wen wi divelop di schrent fi kanchroal wi imoashanz. Sohntaimz aala wi mait ga reezn fi geh beks, bot if wi noh kanchroal wi anga ih ku kaaz wahn lata damij. Wen peepl geh beks, dehn noh aalwayz tink klyaa ahn wahn lata taim dehn seh ahn du tingz weh dehn layta rigret.

WEH YU KU DU: Laan fi kanchroal yu anga bifoa ih kanchroal yoo. Sohn peepl tink dat wen sombadi eezi fi geh beks dat meenz dat dehn schrang, bot akchwali dehn week. Di Baibl seh: “Wahn man weh kyaahn kanchroal ih anga da jos laik wahn siti hoofa waal dehn geh dischrai.” (Proverbs 25:28) Wahn gud way fi kanchroal yu anga da fi fain owt weh mi reeli hapm bifoa yu seh er du sohnting. “Wahn man weh ga andastandin, noh wahn eezi fi geh beks.” (Proverbs 19:11) Soh ih gud fi fain owt weh reeli mi hapm bifoa wi seh er du sohnting.

BAIBL PRINSIPL: “Unu fi bee tankful.”—Koloashanz 3:15, NW.

WEH IH MEEN? Peepl seh dat onli wahn tankful persn ku bee hapi. Eevn peepl weh looz wahn fren er relitiv eena det er weh looz sohnting preshos wuda agree wid dis. Dehn seh dat weh mi help dehn fi koap wid fi dehn imoashanz da-mi fi bee tankful fi weh dehn stilyet ga raada dan fi aalwayz di tink bowt weh dehn mi looz.

WEH YU KU DU: Evri day, mek wahn lis a di tingz weh yu tankful fa. Dehn noh haftu bee big tingz. Tink bak pahn eevn di smaal tingz, laik  wahn byootiful sonraiz, wahn nais kanvasayshan wid sombadi weh yu lov, er jos fi ga wahn nada day a laif. Dehnya tingz ku mek yu feel hapiya if yu tink bowt dehn an if yu tankful fi dehn.

Sohnting els weh ku help yu da fi tink bowt wai yu tankful fi yu famili ahn frenz. Wen yu fain owt weh yu apreeshiayt bowt ada peepl, tel dehn bowt it, eeda eena wahn leta, wahn e-mayl, wahn teks mesij, er fays-tu-fays. Moa dan laikli dis wahn schrentn yu rilayshanship wid adaz ahn yu wahn ku bee hapiya bikaaz yu di du sohnting nais fi adaz.—Aks 20:35.

WAAK WEH FAHN AAGYUMENTS.

“Fi staat wahn fait da laik fi oapm wahn flodgayt; bifoa di kwaaril staat op, waak weh.”—PROVERBS 17:14.

NOH WORI BOWT DI FYOOCHA.

“Noh wori bowt tumaaro; mek tumaaro wori bowt ihself. Di chrobl weh yu ga tudeh, nof fi tudeh.”—MACHYU 6:34.

NOH RISPAN BAYS PAHN YU IMOASHANZ, BOT TINK KYAAFULI BIFOA YU SEH ER DU SOHNTING.

“Yu tinkin wahn kip yu sayf, an andastandin wahn protek yu.”—PROVERBS 2:11.