“If unu aks di Faada fi eniting eena mai naym, hihn wahn giv it tu unu.”—Jan 16:23.

Weh Jeezas seh eena da skripcha shoa wi playn ahn schrayt dat Jehoava waahn wi pray tu hihn chroo di naym a Jeezas Krais. Jehoava noh waahn wi pray tu hihn chroo wahn aidol, wahn saynt, wahn aynjel, er eni a wi ded relitiv dehn. Wen wi pray chroo Jeezas naym, wi shoa dat wi andastan dat Gaad di lisn tu wi pryaaz bikaaz a weh Jeezas du fi wi. Jeezas seh: “Nobadi ku kohn tu di Faada eksep chroo mee.”—Jan 14:6.

“Poar owt yu haat fronta hihn.”—Psalm 62:8.

Wen wi pray tu Jehoava, wi fi taak tu ahn di saym way wi wuda taak tu wahn lovin pa. Insteda reed owta wahn buk er seh sohnting weh wi memoraiz, wi fi taak tu ahn fahn wi haat an eena wahn rispekful way.

“Noh mata weh wi aks Gaad fa, wans wi aks akaadn tu fi hihn wil, ih hyaa wi.”—1 Jan 5:14.

Eena di Baibl, Jehoava Gaad tel wi weh hihn wahn du fi wi ahn weh ih waahn wi du fi hihn. Fi mek hihn aksep wi pryaa dehn, wi need fi pray “akaadn tu fi hihn wil.” Fi mek wi du dis, wi need fi stodi di Baibl soh dat wi ku get fi noa hihn gud. Den, ih wahn pleez wid wi pryaa dehn.

Pray fi Tingz Yu Need. Wi ku pray tu Gaad fi di tingz weh wi need eech day, laik food, kloaz, ahn wahn plays fi liv. Wi ku aalso pray fi wizdom fi mek di rait disizhanz eena laif ahn fi di schrent fi bayr op chroo wi chraiyal dehn. Wi ku pray fi fayt, fi fergivnis, ahn fi help fahn Gaad.—Look 11:3, 4, 13; Jaymz 1:5, 17.

Pray fi Ada Peepl. Payrents hoo lov dehn chiljren feel hapi wen dehn si dehn chiljren lov wan anada. Jehoava waahn di saym ting tu. Hihn waahn aala ih chiljren ya pahn di ert shoa inchres eena ada peepl ahn tek kayr a wan anada. Soh ih wuda bee gud fi mek wi pray fi wi hozban er waif, wi relitiv dehn, wi chiljren, ahn wi fren dehn. Di disaipl Jaymz seh: “Pray fi wan anada.”—Jaymz 5:16.

Tel Gaad Tanks. Di Baibl seh dis bowt wi Kriyayta: “Ih giv unu rayn fahn hevn ahn di difrent froots akaadn tu dehn seezn; ih provaid food fi mek unu eet til unu satisfai ahn hapi.” (Aks 14:17) Wen wi tink bowt aal weh Gaad du fi wi, dis wahn moov wi fi tel ahn tanks wen wi pray. Af koars, wi ku aalso shoa dat wi tankful bai di way wi liv wi laif.—Koloashanz 3:15.

Sohntaim, wi mait feel diskorij bikaaz wi noh geh wahn ansa tu wi pryaa kwik inof. Yu tink dat meen seh dat Gaad noh inchrestid eena wi? Non ataal! Pleez tek wahn luk pahn sohn ekspeeryens weh teech wi dat wi need fi bee payshent ahn kip aan di pray.

Steve, weh wi mi menshan eena di fers aatikl, seh: “If da neva sayka pryaa, Ah wuda mi giv op pahn laif lang taim.” Soh weh mi help ahn fi chaynj? Ih staat tu stodi di Baibl an ih laan dat ih need fi pray, noh jos wan taim ahn den giv op, bot aal di taim. Steve seh: “Ai pray tu Gaad ahn tel ahn tanks fi aala di lov ahn sopoat weh Ah get fahn mi fren dehn. Now, Ah feel hapiya dan eva bifoa.”

How bowt Jenny, hoo mi feel dat shee neva wert notn ahn dat Gaad noh lisn tu ahn? Shee seh: “Wen Ai mi feel reeli reeli dong, Ah bayg Gaad fi help mi andastan wai Ai mi feel laik Ah neva wert notn.” How dat mi help ahn? Shee seh: “Wen Ah taak tu Gaad, ih help mi fi get di rait vyoo a tingz ahn fi si dat eevn if Ai stil feel gilti ahn feel laik Ah noh wert notn, hihn noh kandem mi bot ih stil lov mi. Dis mi help mi fi noh giv op.” Wat da-mi di rizolt fi shee? Shee seh: “Pryaa help mi fi si Jehoava az wahn reel persn, wahn lovin Gaad, wahn Gaad weh kyaa fi mi, wahn Faada, ahn wahn Fren, hoo wahn aalwayz dehdeh fi mi ahn help mi az lang az Ah chrai fi kip aan di du weh hihn waahn Ah du.”

Er how bowt dis neks ekspeeryens bowt wahn laydi weh naym Isabel? Wen shee mi geh pregnant, di dakta dehn tel ahn dat di baybi wahn baan kripl. Shee mi feel laik di hoal werl mi-di kohn dong pan ahn. Som peepl mi eevn di tel ahn fi geh wahn aboarshan. Shee seh: “Ai mi feel laik Ai mi wahn ded fahn di payn weh Ah mi-di feel eena mi haat. Ai mi waahn disapyaa an en aala di sofarin rait away.” Soh weh shee mi du? Shee seh: “Ah pray ahn pray tu Gaad fi mek ih pleez help mi.” Wel, shee an ih hozban gaahn hed ahn ga dehn baybi, wahn son, weh dehn naym Gerard, an ih mi kripl fi chroo. Yu tink Isabel mi feel dat Gaad neva ansa fi shee pryaaz? No! In fak, shee mi feel dat Gaad mi did ansa shee. Eena weh way Gaad mi ansa fi shee pryaaz? Isabel seh: “Wen Ah si mi son, hoo 14 yaaz oal now, di injai laif eevn doa ih kripl, Ah riyalaiz dat hihn da di bes ansa tu mi pryaa dehn. Tu mee, hihn da wahn blesin fahn Jehoava Gaad.”

Weh dehnya chree peepl seh rimain wi a weh wan a di saamis dehn mi seh. Ih mi seh: “Oa Jehoava, yoo hyaa wen hombl peepl pray tu yoo. Yu mek dehn fain korij eena dehn haat ahn yoo reeli lisn tu dehn.” (Psalm 10:17) Dehnya da wandaful reezn fi mek wi kantinyu pray tu Gaad!

Di Baibl gat een lata pryaa weh Jeezas mi seh. Di wan weh moas peepl noa da di wan weh ih mi teech ih disaipl dehn. Weh wi ku laan fahn da pryaa?