“Wen yu di pray, noh seh di saym tingz oava ahn oava agen.”—Machyu 6:7.

Jehoava noh waahn wi memoraiz wi pryaaz ahn seh dehn oava ahn oava agen er reed wi pryaa dehn fahn wahn pryaa buk. Insteda dat, hihn waahn wi taak tu hihn fahn wi haat. Imajin how yoo wuda feel if yu ga wahn fren weh tel yu di saym ting dehn evri singl day. Yu wuda geh taiyad a hyaa dehndeh werdz, noh chroo? Wahn gud fren oapm op ih haat tu yu an ih sinsyaa. Soh wen wi sinsyaa ahn seh weh deh eena fi wee haat, wi shoa wi hevnli Faada dat wi waahn bee fi hihn fren.

“Wen unu aks, unu noh geh notn bikaaz unu di aks fi di rang reezn.”—Jaymz 4:3.

If wee wuda pray bowt tingz weh Gaad noh waahn wi du, er aks ahn fi tingz weh hihn wudn gi wi, ih wudn mek sens fi ekspek hihn fi ansa wi pryaa dehn. Fi egzampl, if sombadi weh laik gyambl aks Gaad fi gud lok, yu tink hihn wuda ansa? Wel, di Baibl tel wi dat wi shudn bee greedi ner bileev eena gud lok. (Isaiah 65:11; Look 12:15) Soh ih wudn mek eni sens fi ekspek dat Jehoava wuda ansa dehndeh kaina pryaaz! Fi mek Gaad ansa wi wen wi pray tu ahn, wi need fi mek shoar dat weh wi di aks fa goh lang wid weh hihn tel wi eena di Baibl.

 “Wen sombadi rifyooz fi obay di laa, eevn ih pryaa da sohnting disgostin tu Gaad.” —Proverbs 28:9.

Bak eena Baibl taimz, Gaad neva ansa di pryaaz a peepl weh neva obay fi hihn raichos laa dehn. (Isaiah 1:15, 16) Di way how hihn feel bowt pryaaz noh chaynj tudeh. (Malachi 3:6) If wee waahn Gaad ansa wi pryaa dehn, wi haftu du wi bes fi liv akaadn tu fi hihn laa dehn. Bot sopoaz wi du tingz eena di paas weh rang? Yu tink dat meenz dat Jehoava wahn neva lisn tu wi? Af koars nat! Gaad lov wi ahn hihn wahn fergiv wi az lang az wi chaynj wi laif ahn du wi bes fi pleez hihn.—Aks 3:19.