Pryaa da wahn speshal gif fi peepl laik María, Raúl, Arne, an adaz. Dehn feel dat chroo pryaa, dehn ku taak tu Gaad, tel ahn tanks, an aks ahn fi help. Dehn bileev wid aala dehn haat weh di Baibl seh bowt pryaaz. Ih seh: “Wi chros dat noh mata weh wi aks Gaad fa, wans wi aks akaadn tu fi hihn wil, ih hyaa wi.”—1 Jan 5:14.

Pahn di ada han, wahn lata peepl fain it haad fi aksep weh di Baibl seh bowt pryaa. Wahn man weh naym Steve seh how hihn feel bowt pryaa. Ih seh: “Wen Ah ton 17, wan mi fren mi ded eena wahn kaar krash, ahn too a mi ada fren mi jrongdid da see.” Weh Steve mi du? Ih seh: “Ah pray tu Gaad an aks ahn wai aala dat mi hapm, bot hihn neva ansa mi. Soh Ah aks miself, ‘Da wai Ai shuda eevn pray?ʼ” Som peepl feel laik Gaad noh ansa dehn pryaaz, ahn soh dehn wanda if ih mek sens fi eevn pray.

 Ada peepl ga difrent reezn wai dehn feel laik pryaa noh help dehn. Som peepl seh dat sins Gaad noa evriting, hihn don noa weh wi need ahn wat da wi prablem, soh tu dehn ih noh eevn mek sens fi tel Gaad bowt dehndeh tingz.

Ada peepl feel dat bikaaz dehn mek sohn seeryos mistayk eena di paas, Gaad noh waahn lisn tu dehn wen dehn pray. Wahn laydi weh naym Jenny seh: “Ai feel laik Ai noh wert notn, ahn dat da mai bigis prablem. Eena di paas, Ah du tingz weh Ah sari fa, soh Ah tel miself dat Ai noh dizerv fi mek Gaad lisn tu mee.”

How yoo feel bowt pryaa? Yu eva ga dowts bowt pryaa er wanda if Gaad di lisn tu yu wen yu pray? Wel noh wori, kaaz di Baibl gat een ansaz pahn dis tapik weh wahn satisfai yu. Yu ku chros weh di Baibl seh bowt pryaa, * an ih ku help yu fain ansaz tu kweschan laik dehnya:

• Yu tink Gaad reeli lisn wen wi pray?

• Wai Gaad noh ansa som pryaaz?

• How yu ku pray ahn mek shoar dat Gaad di lisn tu yu?

• How pryaaz ku help yoo?