“Oa Gaad, di Wan weh hyaa wi pryaaz, aal kaina peepl wahn kohn tu yoo.” —Psalm 65:2.

Som peepl pray bikaaz dehn seh ih mek dehn feel beta, eevn doa dehn tink dat nobadi reeli di lisn. Bot pryaa da noh sohnting wi du jos fi feel beta soh dat wi ku deel wid wi prablem dehn. In fak, di Baibl tel wi dat “Jehoava * noh deh faar fahn di wan dehn weh di kaal pahn hihn wid chroot. . . . Hihn hyaa wen dehn krai fi help.”—Psalm 145:18, 19.

Soh den, wi ku bee shoar dat Jehoava Gaad hyaa wen fi hihn servants pray tu ahn. Bikaaz ih lov wi, ih tel wi: “Unu wahn kaal mi ahn kom ahn pray tu mi, an Ah wahn lisn tu unu.”—Jeremiah 29:12.

“Unu mos kip aan di pray aal di taim.” —Roamanz 12:12.

Di Baibl tel wi fi “aalwayz pray” ahn fi ‘kip aan di pray wid aala wi haat eena evri sichuwayshan.ʼ Soh ih klyaa fi si dat Jehoava waahn mek wi pray tu ahn.—Machyu 26:41; Ifeezhanz 6:18.

Wai Gaad waahn wi pray tu ahn? Wel, tink bowt dis: Wahn pa wahn aalwayz feel hapi fi hyaa ih pikni tel ahn “Yu ku pleez help mi, Dadi?” Af koars, di pa mait don noa weh di chail need er feel, bot wen hihn hyaa dehndeh werdz, ih shoa dat di chail chros ahn an dat ih lov ahn. Soh eena di saym way, wen wi pray tu Jehoava Gaad, wi shoa hihn dat wi chros ahn an dat wi lov ahn.—Proverbs 15:8; Jaymz 4:8.

“Chroa aala unu woriz ahn kyaa pahn hihn, bikaaz hihn kay bowt unu.”—1 Peeta 5:7.

Gaad waahn wi pray tu hihn bikaaz ih lov wi an ih kay bowt wi. Hihn noa aala wi prablemz an aala wi woriz, ahn hihn waahn help wi.

King Dayvid yoostu aalwayz pray tu Jehoava Gaad an aks ahn fi help. Ih yoostu tel Gaad bowt di tingz weh deh pan ih main ahn how ih mi feel. (Psalm 23:1-6) How yu tink Gaad mi feel bowt Dayvid? Wel, Gaad mi lov Dayvid an ih lisn tu ih pryaa dehn. (Aks 13:22) Eena di saym way, Gaad lisn tu fi wee pryaa dehn bikaaz ih kay bowt wi.

Wahn man weh mi rait wan a di saam dehn eena di Baibl mi seh dehndeh werdz. Hihn mi noa dat Gaad lisn tu ih pryaa dehn, ahn dat mi help ahn wahn lat. Hihn mi feel kloasa tu Gaad, ahn soh hihn mi fain di schrent fi deel wid aala di prablemz ahn schres eena ih laif.—Psalm 116:1-9.

Wen wi noa dat Gaad di lisn tu wi pryaa dehn, wi wahn kantinyu pray tu ahn; wi noh wahn giv op. Kansida di ekspeeryens a wahn man weh naym Pedro, hoo liv eena di naadan paat a Spain. Ih 19-yaa-oal son mi ded eena wahn chrafik aksident. Eena aala ih sadnis, Pedro poar owt ih haat tu Gaad ahn pray oava ahn oava fi komfert an help. Weh mi hapm? Pedro seh: “Jehoava ansa mi pryaaz. Hihn mi yooz mi waif ahn mi Kristyan bradaz ahn sistaz fi gi mi di komfert ahn help weh Ah mi need.”

Pedro pryaaz neva bring ih son bak tu laif, bot dehn mi help hihn an ih famili wahn lat. Ih waif, María Carmen, seh: “Pryaaz help mi fi bayr op chroo mi sadnis. Ai noa dat Jehoava Gaad andastan mi, bikaaz wen Ah pray tu hihn, Ah feel kaam an Ah feel peesful.”

Wen wi reed di Baibl ahn hyaa weh ada peepl gaahn chroo eena laif, wi ku si klayr-wan dat Gaad lisn tu wi pryaa dehn. Bot ih klayr fi si tu dat Gaad noh ansa evri pryaa. Wai Gaad ansa som pryaaz, an ada pryaaz ih noh ansa?