Weh di Baibl Seh Bowt Rait ahn Rang Ku Reeli Help Wi
Noatis dehnya difrent wayz how di Baibl help milyanz a peepl.
1. How fi Ga Wahn Hapi Marij
Peepl ga difrent aidyaaz bowt marij ahn weh dehn need fi du fi ga wahn hapi marij.
DI BAIBL SEH: “Eech wan a unu fi lov ih waif jos laik how ih lov ihself, ahn di waif fi ga lata rispek fi ih hozban.”—Ifeezhanz 5:33.
WEH DAT MEEN? Marij kohn fahn Gaad, soh hihn noa weh wahn kopl need fi bee hapi. (Maak 10:6-9) Wen wahn hozban ahn waif foakos, noh pahn weh eech wan get, bot pahn weh eech wan ku giv, too a dehn wahn bee hapi. Wahn hozban weh lov ih waif wahn tek gud kayr a shee ahn chreet ahn gud. Ahn wahn waif weh rispek ih hozban wahn sopoat ahn, an taak tu ahn eena wahn rispekful way.
DI BAIBL KU HELP: Quang ahn Thi, wahn kopl fahn Vietnam, mi feel laik dehn wuda neva ga wahn hapi marij. Quang neva aalwayz kain tu ih waif. Hihn seh: “Ah wuda reeli hert Thi feelinz; ih neva reeli impoatant tu mee.” Thi mi seh: “Ah mi feel laik Ah kyaahn chros ner rispek mi hozban nohmoh.” Soh shee mi waahn divoas ih hozban.
Afta sohn taim, Quang ahn Thi mi laan weh di Baibl seh ahn how fi fala Ifeezhanz 5:33 eena dehn marij. Quang seh: “Dis vers help mi fi si dat Ah need fi bee kain wid mi waif. Shee mi need fi feel dat Ah lov ahn, an Ah mi need fi luk afta ahn eena wahn fizikal, imoashanal, ahn mateeryal way. Wen Ah du dat, shee lov ahn rispek mi eevn moa.” Dis da weh Thi seh: “Di moa Ah du weh Ifeezhanz 5:33 seh ahn shoa mi hozban dat Ah rispek ahn, di moa hihn mek Ah feel sayf, ih shoa mi dat ih lov mi, an Ah ga pees a main ahn haat.”
Fi moa infamayshan bowt marij, reed di Awayk! No. 2 2018, weh naym “12 Advais Weh Ku Mek Yu Famili Hapi” pahn jw.org.
2. How fi Chreet Adaz
Peepl yoozhwali chreet peepl bad bikaaz a dehn rays, di konchri dehn kohn fram, how dehn luk, dehn rilijan, er bikaaz dehn da homosekshwalz.
DI BAIBL SEH: “Shoa rispek fi aal kaina peepl.”—1 Peeta 2:17.
WEH DAT MEEN? Di Baibl teech wi fi noh hayt peepl kaaz a dehn rays, di plays dehn kohn fram, er if dehn da homosekshwalz. Rada, ih teech wi fi rispek evribadi, noh mata dehn rays, wehpaat dehn kohn fram, er if dehn rich er poa. (Aks 10:34) Eevn if wi noh gree wid weh ada peepl bileev er wid di tingz weh dehn du, wi ku stil shoa dehn rispek ahn chreet dehn eena wahn kain way.—Machyu 7:12.
DI BAIBL KU HELP: Daniel mi si enibadi weh kohn fahn Asia az wahn chret tu ih konchri. Hihn mi hayt dehn soh moch dat ih wuda kos dehn owt eena poblik. Daniel seh: “Ai mi tink dat Ah mi-di sopoat mi konchri. Nat wans Ah mi tink dat weh Ai mi-di du mi rang.”
Afta sohn taim, Daniel mi laan weh di Baibl seh. Hihn seh: “Ah mi haftu kompleetli chaynj di way Ah tink. Ah mi haftu si peepl di way Gaad si dehn—dat evribadi da di saym noh mata wehpaat wi kohn fram.” Daniel eksplayn how hihn feel wen ih meet peepl now. Hihn seh: “Ih noh eevn mata tu mee wehpaat peepl kohn fram. Now, Ah lov aal kaina peepl an Ah ga gud frenz fahn aal oava di werl.”
Fi moa infamayshan bowt dis, reed di Awayk! No. 3 2020, weh naym “Yu Tink Prejudis Wahn Eva En?” pahn jw.org.
3. How fi Vyoo Moni
Lata peepl chrai geh rich soh dat dehn ku bee hapi ahn ga wahn beta fyoocha.
DI BAIBL SEH: “Wizdom ku protek wi jos laik how moni ku protek wi, bot di advantij weh nalij gat oava moni da dis: Wizdom wahn sayv wi.”—Ecclesiastes 7:12.
WEH DAT MEEN? Wi need moni, bot ih kyaahn bai wi hapinis ner wi fyoocha. (Praverbz 18:11; 23:4, 5) Insted, chroo hapinis ahn wahn gud fyoocha pen pahn di wizdom weh wi fain eena di Baibl.—1 Timoti 6:17-19.
DI BAIBL KU HELP: Cardo, wahn man fahn Indonesia, mi foakos pahn geh rich. Ih seh: “Ah mi ga aal di tingz weh moas peepl waahnt. Ah kuda mi chravl tu difrent plays ahn bai kaar, hows, an eniting weh Ah waahnt, eevn if ih ekspensiv.” Bot ih moni neva laas ahn lang. Cardo seh: “Sombadi chrik mi ahn teef aal di moni weh Ah mi werk soh haad fa. Ah spen aal mi laif di chrai geh rich, bot den Ah mi feel disapointid bikaaz Ah mi looz evriting an Ah mi feel wertles.”
Cardo mi staat fala di Baibl advais pahn how fi vyoo moni. Now, fi hihn foakos da noh fi geh rich, bot ih chooz fi liv wahn laif weh foakos pahn Gaad. Cardo seh: “Now Ai feel laik Ah ga reel richiz bikaaz Ah ga wahn gud rilayshanship wid Gaad. Ah ku sleep gud da nait, an Ah chrooli hapi.”
Fi moa infamayshan bowt how di Baibl vyoo moni, reed di aatikl weh naym “Yu Tink Ejukayshan ahn Lata Moni Ku Mek Yu Ga Wahn Beta Fyoocha?” eena Di Wachtowa No. 3 2021, pahn jw.org.
4. How fi Vyoo Seks
Peepl ga difrent opinyan bowt seks.
DI BAIBL SEH: “Kip weh fahn sekshwal imoraliti. Eech wan a unu shuda noa how fi kanchroal unu oan badi soh dat unu ku kip it hoali ahn mek Gaad pleez wid unu. Unu noh fi bee laik di peepl a di nayshan dehn weh noh noa Gaad, bikaaz dehn kyaahn kanchroal dehn sekshwal dizaiyaz ahn dehn neva feel satisfai.”—1 Tesaloanyanz 4:3-5.
WEH DAT MEEN? Di Baibl teech wi dat wi need fi kanchroal wi sekshwal dizaiyaz. Sekshwal imoraliti inklood adolchri, prastichooshan, seks bitween peepl weh noh marid, seks bitween man ahn man ahn bitween wuman ahn wuman, ahn seks bitween hyoomanz an animalz. (1 Korintyanz 6:9, 10) Seks da wahn gif fahn Gaad. Hihn waahn mek onli wahn man ahn wuman weh marid tu eech ada injai da gif.—Praverbz 5:18, 19.
DI BAIBL KU HELP: Kylie, wahn laydi fahn Australia, seh: “Wen Ah mi singl, Ah mi tink dat di persn Ah mi ga seks wid wuda lov mi ahn tek kayr a mi. Bot dat neva hapm. Insted, Ah mi feel angshos ahn dat ih neva lov mi.”
Afta sohn taim, Kylie mi laan weh di Baibl teech bowt how fi vyoo seks. Shee seh: “Ai ku si how Gaad standadz dehdeh fi help wi fi noh geh hert eena wahn fizikal an imoashanal way. Now Ah du tingz di way Jehoava waahnt. Ah ga wahn hozban weh lov mi ahn weh tek kayr a mi. Di Baibl reeli help mi wahn lat!”
Fi moa infamayshan bowt dis, reed di aatikl weh naym “What Does the Bible Say About Living Together Without Marriage?” pahn jw.org.
Wi Kriyayta help wi fi noa weh rait ahn weh rang. Eevn doa ih noh aalwayz eezi fi obay weh hihn seh, wi ku chros dat weh hihn seh wahn aalwayz mek wi hapi.
