Op tu dis point eena dis magazeen, wi laan sohn tingz weh ku help wi ansa di kweschan, Hoo da Gaad? Wi mi laan fahn di Baibl dat Gaad naym da Jehoava ahn dat ih mayn kwaliti da lov. Wi mi aalso laan weh ih du soh faar ahn weh ih wahn du fi evribadi eena di fyoocha. Eevn doa wi ga lat moa fi laan bowt Gaad, yu mait wanda wat da som a di persnal benifits fi yoo.

Jehoava pramis dat “if yu saach far ahn, ih wahn help yu fi fain ahn.” (1 Chronicles 28:9) Wen yu geh fi noa Gaad, yu ku bee kloas frenz wid hihn—now dat da reeli sohnting preshos fi chroo! (Psalm 25:14) How yu wahn benifit if yoo da fren wid Gaad?

Chroo hapinis. Jehoava da wahn hapi Gaad. (1 Timoti 1:11) Soh if yu geh kloas tu hihn ahn kapi fi hihn wayz, yu wahn ga chroo hapinis, ahn dis ku benifit yu eena aal ayrya a yu laif. (Psalm 33:12) Fi egzampl, hihn ku help yu fi avoid tingz weh ku haam yu, fi ga gud ahn helti habits, ahn fi noa how fi liv eena pees wid adaz. Yu wahn geh fi agree wid di saamis hoo mi seh dat da ‘hihn mi benifit wen ih mi geh kloas tu Gaad.ʼ—Psalm 73:28.

Persnal kyaa an atenshan. Jehoava pramis ih servant dehn: “Ah wahn kip mi aiy pahn yu wen Ah di gi yu advais.” (Psalm 32:8) Dat meen dat Jehoava giv ih servant dehn persnal atenshan ahn giv eech wan a dehn egzakli weh dehn need. (Psalm 139:1, 2) Wans yu ga wahn gud rilayshanship wid Jehoava, yu wahn fain owt dat hihn aalwayz dehdeh fi yu.

Wahn wandaful fyoocha. Jehoava noh onli di help yu fi ga wahn hapi laif rait now, bot ih di aafa yu wahn wandaful fyoocha. (Isaiah 48:17, 18) Di Baibl seh: “Di onli way fi geh evalastin laif da fi geh fi noa yoo, di onli chroo Gaad, ahn di wan hoo yu mi sen, Jeezas Krais.” (Jan 17:3, NW) Eena dehnya haad taimz, wi hoap fahn Gaad da laik wahn anka weh ku kip wi “sayf ahn shoar.”—Heebrooz 6:19.

Dehnya da jos wahn fyoo a di reezn dehn wai ih impoatant fi mek wi geh fi noa Gaad beta ahn fi ga wahn persnal rilayshanship wid hihn. Yu ku taak wid eni wan a Jehoava Witnisiz er vizit jw.org fi moa infamayshan.