Hoo Da Gaad?
Wahn lata peepl seh dat dehn bileev eena Gaad. Bot if yu wuda aks dehn hoo da Gaad, yu wuda geh wahn lata difrent ansa. Som peepl bileev dat Gaad da wahn kruwil joj weh onli waahn ponish peepl wen dehn du sohnting rang. An adaz bileev dat hihn da wahn lovin Gaad weh wahn aalwayz fagiv dehn, noh mata weh dehn du. Stil adaz bileev dat Gaad deh faar fahn dehn ahn dat ih noh inchrestid eena dehn. Bikaaz a aala dehndeh difrent opinyan, wahn lata peepl feel dat ih noh pasabl fi geh fi noa Gaad.
Yu tink ih mata? Yes, ih mata. Wen yu geh fi noa Gaad, yu laif wahn ga meenin ahn perpos. (Aks 17:26-28) Di kloasa yu get tu Gaad, di moa hihn wahn lov yu ahn help yu. (Jaymz 4:8) Noh onli dat, if yu geh fi noa hihn, yu ku geh evalastin laif.—Jan 17:3.
How yu ku geh fi noa Gaad? Tink bowt sombadi weh yu reeli noa, laik wahn kloas fren. How da frenship mi staat? Yu praabli mi geh fi noa da persn naym, ih wayz, weh ih laik fahn weh ih noh laik, weh ih mi du eena di paas ahn plan fi du eena di fyoocha, ahn moa. How yu mi geh kloas tu da persn? Yu mi geh fi noa ahn, noh chroo?
Jos laik dat, wi ku geh fi noa Gaad. Kansida dehnya kweschanz:
Dis magazeen wahn ansa dehndeh kweschanz fahn di Baibl. Di aatikl dehn wahn help yu fi laan bowt Gaad ahn dehn wahn shoa yu som a di benifits yu ku geh if yu ga wahn persnal rilayshanship wid hihn.
