Di moa wi laan bowt sombadi wayz, di moa wi geh fi noa da persn, ahn dis ku mek wi frenship geh schranga. Jos laik dat, di moa wi geh fi noa Jehoava wayz, di beta wi wahn geh fi noa hihn. Dis wahn help wi fi schrentn wi frenship wid hihn. Gaad ga wahn lata wandaful kwalitiz, bot ih ga foa mayn wanz—powa, wizdom, jostis, ahn lov.

“Oa Sovrin Laad Jehoava! Wid fi yoo grayt powa yu mek di hevn ahn di ert.” —JEREMIAH 32:17.

Wi ku si proof a di amonk a powa weh Gaad gat fahn di tingz weh ih mek. Fi egzampl, wen yu goh owtsaid pahn wahn hat day, da weh yu feel pahn yu skin? Di heet a di son. Akchwali, yu di feel di rizolt a Jehoava powa. Humoch powa yu tink di son gat? Wel, saiyentis seh dat di tempricha da di senta a di son da 27,000,000 digreez Farenhait (15,000,000°C). Evri sekant, di son giv aaf di saym amonk a powa az honjridz a milyanz a nyooklyaa bomz.

Bot di son smaal wen yu kompyaa it wid di chrilyanz a staarz eena di yoonivers. Saiyentis figa dat wan a di bigis staar, weh naym UY Scuti, bowt 1,700 taimz waida dan di son. If dis staar wuda tek di plays a di son, ih wuda swala di ert ahn reech way paas di planet weh naym Jupita. Maybi dat help wi fi beta andastan weh Jerimaiya  mi meen wen ih seh dat Jehoava mek di hevn ahn di ert wid fi hihn grayt powa.

How wi benifit fahn Gaad powa? Wi laif dipen pahn di tingz weh Gaad mek, laik di son an aala di ada wandaful tingz weh sopoat laif pahn di ert. Bisaidz dat, Gaad yooz ih powa fi benifit hyoomanz eena wahn persnal way. How ih du dis? Wen Jeezas mi deh pahn di ert, Gaad mi giv ahn fi Hihn powa fi du wahn lata mirakl. Di Baibl seh: “Blain peepl geh bak dehn sait, dehn wan weh mi kripl ku waak agen.” (Machyu 11:5) How bowt tudeh? Di Skripchaz seh: “Hihn gi schrent tu di wan weh taiyad. . . . Di wan dehn weh di hoap eena Jehoava wahn get bak dehn schrent.” (Isaiah 40:29, 31) Gaad gi wi ih “grayt powa” fi help wi deel wid di difrent chroblz ahn chraiyalz eena laif. (2 Korintyanz 4:7) Yoo wudn waahn ga wahn rilayshanship wid wahn Gaad laik dat?

“Yu mek wahn lata tingz, Oa Jehoava! Yu mi mek aala dehn eena wizdom.”—PSALM 104:24.

Di moa wi laan bowt di tingz dehn weh Gaad mek, di moa wi rispek ih wizdom. In fak, dehn ga sohn saiyentis weh stodi di dizain a naycha soh dat dehn ku improov fi dehn oan dizain. Dis ku bee sohnting az simpl az wahn kamara lenz tu di dizain a wahn playn. Dehn kaal dis stodi biomimicry.

Di hyooman badi da wan a di bes egzampl a di wizdom a Gaad. Fi egzampl, tink bowt di way how wahn baybi staat tu groa. Ih staat aaf az wan lee fertilaiz sel. An eena dis lee sel, Gaad put aala di infamayshan weh ih need fi groa. Di sel wahn staat tu divaid op intu lata ada sel; aala dehn luk di saym. Bot den, rait da di egzak taim, di nyoo sel dehn staat tu luk difrent, dehn staat tu divaid op intu difrent kaina sel, laik blod sel, nerv sel, ahn boan sel. Soon, di difrent aagan ahn sistem eena di badi staat tu fongshan. Eena jos nain monts, di orijinal lee sel ton intu wahn baybi wid bilyanz a selz. Di wizdom eena wahn dizain laik dis mek wahn lata peepl agree wid di saamis hoo mi seh: “Ah prayz yu bikaaz yu mek mi eena wahn wandaful way.”—Psalm 139:14.

How wi benifit fahn di wizdom a Gaad? Di Kriyayta noa weh wi need fi bee hapi. Bikaaz ih noa wi soh gud an ih andastan weh wi goh chroo, ih gi wi ih Werd, di Baibl. Fi egzampl, ih seh: “Aalwayz bayr wid wan anada, ahn if enibadi du unu eniting, fagiv dehn.” (Koloashanz 3:13) Yu tink dat da waiz kongsl? Yes. Risaach shoa dat wen wahn persn fagiv adaz, ih ku sleep beta ahn loawa ih blod presha. Yu mait ku eevn avoid dipreshan an ada helt prablemz. Yoo ga wahn waiz fren weh aalwayz kay bowt yu ahn gi yu gud advais? Wel, Jehoava da laik da fren! (2 Timoti 3:16, 17) Fi shoar, yu wuda waahn hihn bee yu fren.

“Jehoava lov jostis.”—PSALM 37:28.

Gaad aalwayz du weh rait. In fak, “ih noh pasabl fi mek di chroo Gaad du wikidnis, fi mek di Almaiti du weh rang!” (Job 34:10) Ih jojment dehn raichos. Di saamis mi tel Jehoava: “Yu wahn bee fyaa wen yu joj peepl.” (Psalm 67:4) Bikaaz “Jehoava si intu di haat,” nobadi kyaahn fool ahn; hihn ku si di chroot ahn mek di rait jojment. (1 Samuel 16:7) Moroava, Gaad si aala di injostis ahn koropshan pahn ert, an ih pramis ih wahn ‘kot aaf di wikid wan dehn fahn aafa di ertʼ veri soon.—Proverbs 2:22.

Bot Gaad da noh wahn kruwil joj weh kyaahn wayt fi ponish peepl. Hihn shoa mersi wen hihn seeʼt fit fi du dat. Di Baibl seh: “Jehoava shoa mersi ahn kompashan,” eevn tuwaadz wikid peepl if dehn reeli feel sari fi di rang tingz weh dehn du. Yu noh tink dat da chroo jostis?—Psalm 103:8; 2 Peeta 3:9.

How wi benifit fahn Gaad jostis? Di apasl Peeta mi seh: “Gaad chreet evribadi di sayhn way. Gaad wahn aksep enibadi weh liv rait ahn weh wership ahn, noh mata weh konchri dehn kohn fram.” (Aks 10:34, 35) Wi benifit fahn Gaad jostis bikaaz hihn noh shoa fayvritizm. Wi ku pray tu hihn ahn wership hihn noh mata wat da wi rays, weh wi kohn fram, weh kaina ejukayshan wi gat, er weda wi rich er poa.

Bikaaz Gaad waahn wi andastan ahn benifit fan ih jostis, ih gi wi wahn kanshans. Di Skripchaz seh dat wi kanshans da laik wahn laa weh deh ‘eena wi haatʼ kaaz ‘ih tel wiʼ wen wi du rait er rang. (Roamanz 2:15) How wi benifit? Wen wi chrayn wi kanshans eena di rait way, ih ku stap wi fahn du tingz weh ku hert adaz. An if wi mek  wahn mistayk, ih ku mek wi ripent ahn karek wi akshanz. Soh, wen wi andastan how Gaad feel bowt jostis, wi jraa kloas tu hihn ahn wi liv wahn beta laif!

“Gaad da lov.”—1 JAN 4:8.

Di Baibl seh dat Gaad da lov, ih neva seh dat hihn da powa, wizdom, er jostis, kaaz dehnya chree kwalitiz da weh hihn shoa. Yu si, ih powa help ahn fi ak an ih jostis ahn wizdom gaid di way ih ak. Bot Jehoava lov moov ahn fi ak. Lov da di reezn wai hihn du evriting.

Eevn doa Jehoava noh need eniting, ih lov mi moov hihn fi mek di aynjel dehn ahn hyoomanz. Aala wi injai fi hihn lov ahn kyaa. Hihn mek di ert az fi wee hoam. Da di bes plays fi mek wi liv. An ih kantinyu fi shoa lov tu aala wi, kaaz ‘hihn mek di son shain dong pahn di gud ahn pahn di bad, ahn sayhn way ih mek ih rayn pahn peepl weh du rait ahn peepl weh du rang.ʼ—Machyu 5:45.

Bisaidz dat, ‘ih lov wi bad an ih haat onli saaf tuwaadz wi.ʼ (Jaymz 5:11) Ih shoa lov tu hoosoeva waahn noa bowt hihn ahn jraa kloas tu ahn. Gaad noatis peepl laik dat. In fak, “hihn kyaa bowt yoo.”—1 Peeta 5:7.

How wi benifit fahn Gaad lov? Wi injai wahn byootiful sonset. Wi feel soh hapi wen wi hyaa wahn baybi laaf. Ahn wi cherish di lov a wahn kloas famili memba. Eevn doa wi noh mait need dehnya tingz fi liv, dehn mek wi laif beta fi shoar.

Pryaa da wahn nada way how wi benifit fahn Gaad lov. Di Baibl tel wi: “Unu noh fi wori bowt notn, bot unu mos pray ahn aks Gaad fi evriting. Ahn unu mos tank ahn tu wen unu di aks ahn fi weh unu need.” Jos laik wahn lovin pa, hihn waahn wi ton tu hihn fi help wid wi moas persnal kansaan dehn. Den Jehoava, owta lov fi wi, pramis fi gi wi “wahn kaina pees weh nobadi kyaahn andastan.”—Filipiyanz 4:6, 7.

Yu tink dis shaat lee diskoshan a Gaad mayn kwalitiz—ih powa, wizdom, jostis, ahn lov—mi help yu fi geh wahn beta aidyaa a di kaina persn Gaad? Wi waahn yu ga moa apreeshiayshan fi Gaad, soh wi invait yu fi kantinyu laan bowt weh ih don du fi yu aredi, ahn weh ih wahn du fi yu eena di fyoocha.