Wat Da Gaad Naym? Gaad seh: “Ai da Jehoava. Dat da mai naym.” (Isaiah 42:8) Gaad persnal naym deh eena di Baibl moa dan 7,000 taim. Bot, wahn lata peepl weh chranslayt di Baibl tek owt Gaad naym ahn yooz di taitl “Laad” insted. Gaad waahn yoo fi bee ih fren, soh hihn inkorij yu fi “kaal pahn fi hihn naym.”—Psalm 105:1.

Wat Da Sohn Taitl Weh Rifaa tu Jehoava? Sohntaim di Baibl rifaa tu Jehoava wid difrent taitl, laik “Gaad,” “Almaiti,” “Kriyayta,” “Faada,” “Laad,” ahn “Sovrin.” Wahn lata pryaaz weh deh eena di Baibl yooz wahn rispekful taitl lang wid ih persnal naym, Jehoava.—Daniel 9:4.

 Weh Kaina Badi Gaad Ga? Gaad da wahn spirit. (Jan 4:24) Di Baibl tel wi dat “nobadi neva si Gaad yet.” (Jan 1:18) Ih aalso tel wi how hihn feel. Peepl ku mek Gaad feel sad, er dehn ku mek ih feel hapi.—Proverbs 11:20; Psalm 78:40, 41.

Wat Da Som a Gaad Kwalitiz? Gaad chreet evribadi di saym, noh mata weh dehn kohn fram er wat da dehn bakgrong. (Aks 10:34, 35) Hihn aalso ‘mersiful ahn kompashanayt, noh eezi fi geh beks, ahn da wahn Gaad wid lata lov ahn chroot.ʼ (Exodus 34:6, 7) Bot, foa a Gaad kwalitiz reeli speshal.

Powa. Sins hihn da “Gaad Almaiti,” hihn ga di powa fi du wateva hihn pramis fi du.—Genesis 17:1.

Wizdom. Nobadi els noh ga wizdom laik Gaad. Dis da weh di Baibl meen wen ih seh dat hihn “da di onli wan weh ga wizdom.”—Roamanz 16:27.

Jostis. Gaad aalwayz du weh rait. Evriting weh hihn du “perfek,” ahn hihn da wahn “fyaa” Gaad.—Deuteronomy 32:4.

Lov. Gaad noh onli shoa lov, di Baibl seh dat “Gaad da lov.” (1 Jan 4:8) Bikaaz hihn da lov, evriting weh hihn du bays pahn lov, ahn dat benifit wi eena wahn lata difrent wayz.

Yu Tink Gaad Waahn Wi Bee Ih Fren? Gaad da wi lovin hevnli Faada. (Machyu 6:9) If wi put fayt eena hihn, wi ku bee ih fren. (Psalm 25:14) In fak, Gaad invait yoo fi kohn kloas tu hihn, fi pray, ahn fi ‘chroa aala yu woriz ahn kyaa pahn hihn, bikaaz hihn kay bowt yoo.ʼ—1 Peeta 5:7; Jaymz 4:8.

Jeezas Da Gaad Son. Jeezas da wahn speshal persn—hihn da di onli wan weh Gaad mi kriyayt bai ihself. Dat da wai di Baibl kaal hihn Gaad wan an onli Son. (Jan 1:14) Afta Jehoava mi kriyayt Jeezas, hihn mi yooz Jeezas az wahn “maasta werka” fi kriyayt evriting an evribadi els.—Proverbs 8:30, 31; Koloashanz 1:15, 16.

 Jeezas Krais neva klaym fi bee Gaad. Insted, hihn mi seh: “Ai da fahn hihn [Gaad], ahn da hihn sen mee.” (Jan 7:29) Wen Jeezas mi-di taak tu wan a ih disaiplz, hihn mi kaal Jehoava “mai Faada, weh da fi unu Faada” ahn “mai Gaad, weh da fi unu Gaad.” (Jan 20:17) Afta Jeezas mi ded, Jehoava mi rezorek ahn bak tu laif eena hevn. Jehoava mi aalso put Jeezas fi sidong da ih rait han said ahn gi ahn grayt atariti.—Machyu 28:18; Aks 2:32, 33.

Jeezas Krais Ku Help Yu Geh Kloas tu Gaad

Jeezas mi kohn pahn ert fi teech wi bowt ih Faada. Jehoava mi seh dis bowt Jeezas: ‘Dis da mai Son, weh Ah onli lov. Lisn tu ahn.ʼ (Maak 9:7) Jeezas noa Gaad moa dan enibadi els. Hihn seh: “Nobadi reeli noa hoo da di Faada eksep di Son, ahn enibadi els weh di Son waahn shoa ih Faada tu.”—Look 10:22.

Jeezas ga di sayhn egzak kwalitiz laik Gaad. Dats wai hihn kuda mi seh: “Enibadi weh don si mee don si mai Faada tu.” (Jan 14:9) Jeezas mi help peepl geh kloas tu Gaad bikaaz ih mi fala ih Pa egzampl ahn shoa lov eena weh ih mi seh ahn du. Hihn mi seh: ‘Da mee da di way, da mee da di chroot, ahn da mee da di laif. Di onli way peepl ku kohn tu Gaad di Faada da fi kohn chroo mee.ʼ (Jan 14:6) Hihn mi aalso seh: “Peepl weh reeli waahn wership Gaad fi chroo wahn wership ahn fahn deep dong eena dehn haat, jos laik how di Spirit a Gaad waahn dehn wership; kaa dat da di kaina peepl weh Gaad di Faada di luk fa fi wership ahn.” (Jan 4:23) Jos imajin! Jehoava di luk fi peepl laik yoo weh waahn noa di chroot bowt hihn.