Eevn doa di Baibl da noh wahn buk weh foakos pahn helt, ih stil gat een wahn lata gud advais weh ku help wi. Mek wi luk pahn sohn egzampl.

“Peepl weh helti noh goh si wahn dakta, da onli peepl weh sik goh.”—MACHYU 9:12.

Di Baibl seh dat sohntaim wi haftu goh si wahn dakta fi geh help. Lata peepl staat tu feel beta wen dehn geh help fahn wahn dakta ahn wen dehn laan moa bowt dehn mental helt kandishan. Dehn aalso mek shoar dat di infamayshan weh dehn geh karek.

“Eksasaiz gud fi yu badi.”—1 TIMOTI 4:8, Contemporary English Version.

If yu tek taim fi bil op sohn gud habit fi tek kayr a yu fizikal helt, ih ku help yu mental helt tu. Sohn gud habit fi ga da fi eksasaiz inof, eet helti, ahn get inof sleep.

“Wahn haat weh ful a jai da gud medisn, bot sadnis mek wahn persn noh ga no schrent.”—PROVERBS 17:22.

Wen yu reed sohn vers fahn di Baibl weh inkorij yu ahn wen yu set goalz weh yu ku reech, dat ku help yu stay hapi. Fi help yu deel wid yu mental helt prablemz, ih gud fi aalwayz foakos pahn di gud tingz eena yu laif  ahn fi tink bowt how tingz wahn geh beta eena di fyoocha.

“Di modes persn wahn ga wizdom.”—PROVERBS 11:2.

Sohntaim yu kyaahn du evriting weh yu waahn du pahn yu oan, soh bee wilin fi aksep help fahn adaz. Yu frenz ahn famili mait waahn help yu, bot dehn noh mait noa how fi help. Mek dehn noa weh dehn, ku du fi help yu. Noh ekspek tu moch fahn dehn, an aalwayz bee tankful fi di help weh dehn gi yu.

“Ah mi feel laik sohnting mi rang wid mi, soh Ah gaahn si wahn dakta. Shee help mi fi fain owt wat da-mi mai kandishan. Dis help mi fi aksep weh Ah mi-di goh chroo ahn fi laan bowt sohn chreetment weh ku help mi deel wid mi kandishan.”—Nicole. a Shee sofa fahn bipolar disaada.

“Wen Ah tek di taim fi reed di Baibl wid mi waif evri day, ih help mi fi staat aaf di day wid wahn pazitiv atichood. Espeshali wen Ah ga wahn rof day, wan a di vers weh Ah reed wuda komfert mi ahn mek Ah feel beta.”—Peter. Hihn sofa fahn dipreshan.

“Ih mi haad fi tel peepl bowt weh Ah mi-di goh chroo bikaaz Ah mi feel shaym bowt miself. Bot Ah mi ga wahn kloas fren weh mi reeli lisn tu mi ahn weh chrai andastan mi. Shee reeli help mi feel beta ahn mek Ah noh feel laik Ah deh bai miself.”—Ji-yoo. Shee schrogl wid wahn eetin disaada.

“Di Baibl help mi fi noa humoch res Ah need ahn humoch taim Ah shuda spen di werk. Di waiz advais fahn di Baibl help mi fi deel wid di imoashanal prablemz weh Ah schrogl wid.”—Timothy. Hihn di koap wid obsessive-compulsive disaada.