Wee mait feel laik wi kyaahn du notn wen wahn fren di sofa wid wahn mental helt prablem. Bot wi ku shoa dehn humoch wi kay fi dehn wen wi help dehn deel wid wahn mental helt prablem. How wi ku du dat?

“Bee redi fi lisn.”—JAYMZ 1:19.

Wan a di bes way fi help wahn fren da fi lisn tu ahn wen ih waahn taak. Noh feel laik yu haftu ansa evriting weh ih seh. Mek ih noa dat yu di lisn tu ahn, an dat yu kay bowt ahn. Chrai andastan how ih di feel, ahn noh kritisaiz ahn. Memba dat yu fren mait seh tingz weh ih noh meen ahn weh ih mait wish ih neva seh.—Job 6:2, 3.

“Komfert dehn.”—1 TESALOANYANZ 5:14.

Yu fren mait wori wahn lat, feel frayd er schres owt, er maybi ih di schrogl bikaaz ih aalwayz feel wertles. Wen yu rimain ahn dat yu kay bowt ahn, dat ku komfert an inkorij ahn, eevn if yu noh noa egzakli weh fi seh.

“Wahn chroo chroo fren shoa lov aala di taim.”—PROVERBS 17:17.

Aafa fi help ahn eena difrent wayz. Aks ahn weh yu ku du fi help ahn, insteda tink dat yoo noa weh fi du. If yu noatis dat ih haad fi mek yu fren tel yu weh ih need, chrai fi spen sohn taim wid ahn. Fi egzampl, maybi yu ku aks ahn if ih wuda waahn goh tek wahn waak wid  yu. Yu ku aalso aafa fi help ahn kleen, du ih shapin, er eni ada ting.—Galayshanz 6:2.

“Bee payshent.”—1 TESALOANYANZ 5:14.

Yu fren mait noh aalwayz redi fi taak. Soh mek ih noa dat yu wahn aalwayz dehdeh fi lisn tu ahn wen ih redi. Bikaaz a yu fren mental helt prablem, ih mait seh er du tingz weh hert yu. Ih mait kyansl planz weh unu mek er ih mait deh eena wahn bad mood. Wen yu di sopoat ahn, bee payshent an andastandin.—Proverbs 18:24.

“Ah mek shoar dat Ah aalwayz dehdeh far ahn, an dat Ah aalwayz redi fi lisn tu ahn, eevn doa Ah mait kyaahn fiks ih prablemz. Sohntaim shee onli need sombadi fi lisn tu ahn, an dat wuda mek ih feel beta.”—Farrah. a Fi shee fren sofa fahn difrent eetin an anxiety disaada ahn bad dipreshan.

“Wan a mi fren veri kain, an ih aalwayz di inkorij mi. Shee invait mi oava da ih hows fi eet sohn nais food. Shee mi soh lovin an ih mi mek it eeziya fi mek Ah tel ahn how Ah feel. Dat mi reeli inkorij mee!”—Ha-eun. Shee sofa fahn bad dipreshan.

“Payshens veri impoatant. Wen mi waif du sohnting weh wuda get mi beks, Ah rimain miself dat shee da noh laik dat, da ih mental helt prablem mek ih ak da way. Wen Ah tink laik dis, ih help mi fi noh geh beks ahn fi bee moa kansidarayt wid shee.”—Jacob. Fi hihn waif sofa fahn bad dipreshan.

“Mi waif aalwayz sopoat ahn komfert mi. Wen Ah feel angshos, shee noh foas mi fi du eniting weh Ah noh feel laik du. Sohntaim dat meen dat shee noh geh fi du sohnting weh shee wuda lov fi du. Shee da sohnbadi speshal tu mee bikaaz shee noh tink onli bowt ihself an ih jenaros.”—Enrico. Hihn sofa fahn anxiety disaada.