Peepl Aal Rong di Werl Di Sofa Fahn Mental Helt Prablemz
“Ah aalwayz geh wahn lee bit schres owt, eevn if Ah deh eena wahn room bai miself.”
“Wen Ah feel reeli gud ahn hapi, Ah staat wori, kaaz Ah jos noa dat soon afta dat Ah wahn feel reeli sad.”
“Ah chrai haad fi foakos pahn onli weh di hapm tudeh, bot aal aaf a sodn Ah wuda staat wori bowt wahn lata tingz.”
Dehndeh da sohn tingz weh peepl wid mental helt prablemz di deel wid. Yoo er sohnbadi weh yu lov eva feel da way?
Wahn lata peepl eena dis werl di deel wid mental helt prablemz. If da noh dehn di deel wid it, den da sohnbadi weh dehn lov. Soh, yu ku bee shoar dat yoo da noh di onli wan weh di goh chroo dis.
Wid aal weh di hapm, wi noa dat di taim weh wi di liv eena “daynjaros ahn laif wahn bee haad.” (2 Timoti 3:1) Wahn risaach shoa dat wan owta ayt peepl di deel wid wahn metal helt prablem. Eena 2020, bikaaz a di COVID-19 pandemik, 26 persent moa peepl mi sofa fahn schres dan eena 2019 ahn 28 persent moa peepl mi sofa fahn seeryos dipreshan.
Ih impoatant fi noa humoch peepl di sofa fahn schres ahn dipreshan. Bot weh moa impoatant da fi noa weh yoo ahn di peepl weh yu lov ku du fi feel beta.
Wat da mental helt?
Wen yu ga gud mental helt, yu feel gud ahn naamal. Yu ku handl schres beta, yu werk gud, ahn yu hapi wid yu laif.
Wahn mental helt prablem . . .
-
NOH kohn fahn wahn persnal weeknis.
-
DA wahn seeryos helt prablem weh ku mek wahn persn feel reeli sad ahn schres owt. Ih afek di way di persn tink, how ih ak, an ih haada fi mek dehn kanchroal dehn feelinz.
-
Ku mek it haad fi ga frenz ahn fi du evriday tingz.
-
Ku afek enibadi, noh mata dehn ayj, kolcha, rays, chraib, rilijan, ejukayshan, er if dehn rich er poa.
Geh help fi deel wid mental helt prablemz
Wahn mental helt prablem ku mek wahn persn staat sleep tu moch, ga chrobl fi sleep, staat eet wahn lat moa er les dan ih yoostu, er staat schres ahn feel sad. If yu noatis dat yoo er sohnbadi weh yu lov staat goh chroo dehnya chaynjiz, den ih impoatant fi chrai geh profeshanal help. Wen yu geh di help weh yu need, ih wahn help yu andastan wai yu feel an ak da way ahn weh yoo ku du bowt it. Wehpaat yoo ku goh fi fain di help weh yu need?
Jeezas Krais, di waizis man weh eva liv, mi seh: “Peepl weh helti noh goh si wahn dakta, da onli peepl weh sik goh.” (Machyu 9:12) Wen peepl wid mental helt prablemz geh di rait kaina help ahn medikayshan, dehn ku deel wid di difrent chalenjiz weh kohn fahn dehn kandishan ahn dehn ku staat feel beta. If sohnbadi di sofa wid dehnya prablemz fi wahn lang taim an if ih di geh wers, ih impoatant fi mek dehn geh di medikal chreetment weh dehn need az soon az pasabl. a
Eevn doa di Baibl da noh wahn medikal buk, ih gat een wahn lata advais weh ku help wi wid wi mental helt. Soh wi waahn invait yu fi reed di aatikl dehn eena dis magazeen weh shoa how di Baibl ku help yu.
a Di Wachtowa noh inkorij nobadi fi tek wahn spesifik kaina chreetment. Eech persn need fi disaid fi dehnself wich chreetment dehn wahn tek bays pahn dehn oan sichuwayshan.
Yu Mait Aalso Laik
ESSENTIAL BIBLE TEACHINGS
Wai Gaad Talarayt Sofarin?
Di Baibl eksplayn it eena wahn way weh satisfai wi ahn gi wi komfert.
KIP PAHN DI LUKOWT!
Moa ahn Moa Teenayjaz di Ga Mental Helt Prablemz—Weh di Baibl Ga fi Seh?
Di Baibl gi gud sojeshanz weh ku help teenayjaz weh di fays mental helt prablemz.
LAAN BOWT WI
Aks fi Mek Sohnbadi Vizit Yu
Diskos wahn Baibl kweschan, er laan moa bowt Jehoava Witnisiz.
