How Yu Ku Liv Eena Wahn Nyoo Werl
Di aatikl dehn bifoa dis wan shoa wi dat Gaad wahn put wahn en tu dis korop werl weh ful op a prablemz. Wee ku bee shoar dat dis wahn hapm. Wai? Bikaaz Gaad Werd, di Baibl, pramis wi:
“Di werl . . . di kohn tu wahn en.” —1 JAN 2:17.
Wee ku bee shoar dat peepl wahn servaiv bikaaz di skripcha aalso pramis wi:
“Di wan weh du di wil a Gaad wahn liv fareva.”
Soh if wi waahn servaiv, wi need fi du weh Gaad waahn. Bot fi noa weh hihn waahn wi du, wi haftu geh fi noa hihn fers.
YU KU SERVAIV DI EN IF YU “GET FI NOA” GAAD
Jeezas mi seh: “Di wan dehn weh wahn get evalastin laif need fi get fi noa yoo, di onli chroo Gaad.” (Jan 17:3) Fi servaiv di en ahn liv fareva, wi need fi “get fi noa” Gaad. Dis meenz dat wi noh jos bileev dat Gaad egzis er noa sohn tingz bowt hihn. Insted, wi need fi ga wahn rilayshanship wid hihn; wi need fi bee ih fren. An if wi waahn wi frenship wid Gaad geh schrang, wi need fi spen taim wid ahn jos laik weh wi du wid eni ada fren. Mek wi luk pahn sohn chroot fahn di Baibl weh ku help wi fi ga wahn schrang frenship wid Gaad.
REED GAAD WERD, DI BAIBL, EVRI DAY
Yoo ku servaiv di en a di werl if yu pray an aks Gaad fi help yu du weh hihn waahn yu du
Wi eet food evri day fi stay alaiv. Bot Jeezas mi seh: “Wahn man noh fi liv pahn jos food, bot ih fi liv pahn evri werd weh kom owta Jehoava mowt.”—Machyu 4:4.
Tudeh, wee ku fain weh Jehoava seh eena di Baibl. Az yu stodi da hoali buk, yu wahn laan weh Gaad mi du eena di paas, weh ih di du now, ahn weh ih wahn du eena di fyoocha.
PRAY TU GAAD AN AKS AHN FI HELP YU
Weh wi ku du if wi waahn obay Gaad bot wi fain it haad fi stap du tingz weh hihn seh bad? Eena dis kays, weh ku reeli help wi da if wi geh fi noa Gaad gud.
Mek wi luk pahn Sakura b egzampl, shee mi-di liv wahn imoaral laif. Wen shee mi staat stodi di Baibl, shee laan bowt Gaad koman fi “ron weh fahn sekshwal imoraliti.” (1 Korintyanz 6:18) Sakura mi pray tu Gaad fi giv ahn di schrent fi stap du weh ih mi-di du. Bot dis noh eezi far ahn. Shee seh: “If dehnya bad taats ahn temtayshan kohn tu main, Ah pray tu Jehoava an Ah tel ahn evriting weh Ah tink ahn feel bikaaz Ah kyaahn fait dis pahn mi oan. Pryaa soh powaful; ih jraa mi kloasa tu Jehoava.” Jos laik Sakura, milyanz a peepl di geh fi noa Gaad. Hihn gi dehn di schrent weh dehn need fi mek chaynjiz eena dehn laif ahn fi liv eena wahn way weh pleez hihn.—Filipiyanz 4:13.
Di moa yu get fi noa Gaad, di moa “Gaad [wahn] noa” yu az wahn preshos fren. (Galayshanz 4:9; Psalm 25:14) Den yu wahn ku servaiv ahn bee paat a Gaad nyoo werl. Bot weh dis nyoo werl wahn bee laik? Di neks aatikl wahn ansa da kweschan.