Soon, wen Gaad govament weh deh da hevn staat tu rool oava aal hyoomanz, di ert wahn bee wahn hapi plays fi liv eena. Evribadi wahn liv eena pees ahn dehn wahn du gud werk. Gaad don apoint Jeezas Krais fi rool oava di ert. Jeezas da noh laik di roola dehn weh egzis tudeh, hihn aalwayz waahn di bes fi evribadi. Fi hihn roolaship wahn bays pahn lov, ahn hihn wahn bee wahn King weh kain, mersiful, ahn weh chreet evribadi fyaa.—Isaiah 11:4.

Peepl weh liv eena dis nyoo werl noh wahn divaid op bai dehn rays er wehpaat dehn kohn fram. Evribadi wahn liv eena yooniti. (Revilayshan 7:9, 10) Evribadi weh liv pahn ert wahn lov Gaad ahn peepl, ahn dehn wahn werk tugeda eena pees fi tek kayr a di ert.—Psalm 115:16.

Wen Gaad Kingdom staat tu rool oava di hoal ert, di Kriyayta wahn kanchroal di weda; ih wahn bee perfek. (Psalm 24:1, 2) Wen Jeezas mi deh pahn di ert, hihn mi kaam dong wahn big staam. Dis shoa weh hihn ku du wid di powa weh Gaad giv ahn. (Maak 4:39, 41) Wen Krais rool oava di hoal ert, nobadi wahn haftu frayd fi nachral dizaasta nohmoh. Anda Gaad Kingdom, evribadi wahn liv eena pees wid di animal dehn ahn hyoomanz noh wahn dischrai di ert nohmoh.—Hosea 2:18.

Evribadi wahn ga perfek helt. Nobadi wahn geh sik, geh oal, er ded. (Isaiah 35:5, 6) Evribadi wahn hapi fi liv eena wahn byootiful ahn kleen plays jos laik weh di fers hyooman kopl mi injai eena di gyaadn a Eedn. Jos laik eena Eedn, wahn lata food wahn deh fi evribadi eena di nyoo werl. (Genesis 2:9) Jos laik di Izrelaits eena di paas, evribadi eena Paradais wahn “eet [dehn] bred til [dehn] satisfai.”—Leviticus 26:4, 5.

Anda Gaad govament, evribadi wahn ga pees ahn dehn wahn kain tu wan anada an chreet eech ada eena wahn fyaa way. Dehn noh wahn ga nohmoh waar, peepl noh wahn abyooz dehn powa, an evribadi wahn ga weh dehn need fi liv. Di Baibl pramis: “Eech wan wahn sidong anda ih oan vain an anda ih oan fig chree, ahn nobadi wahn ku fraitn dehn.”—Micah 4:3, 4.

Evri famili wahn ga wahn hows fi liv eena widowt haftu frayd dat dehn wahn tek it weh fahn dehn. An evribadi wahn du werk weh dehn wahn injai. Laik weh di Baibl seh, di peepl weh liv eena Gaad nyoo werl “noh wahn haftu werk haad fi notn.” Evriting weh dehn du wahn ga sokses.—Isaiah 65:21-23.

Di Baibl pramis: “Di ert wahn bee ful op a di nalij a Jehoava.” (Isaiah 11:9) Peepl weh liv anda Gaad Kingdom wahn laan fahn di wizdom a dehn Kriyayta, Jehoava, ahn dehn wahn laan bowt di byootiful tingz weh hihn kriyayt. Dehn noh wahn yooz wat dehn laan fi mek wepan er fi hert peepl. (Isaiah 2:4) Insted, dehn wahn laan fi liv eena pees wid wan anada ahn dehn wahn tek kayr a di ert.—Psalm 37:11.

Gaad mi mek di ert perfek soh dat wee ku injai laif evri singl day. Hihn waahn hyoomanz liv pahn di ert fareva. (Psalm 37:29; Isaiah 45:18) Fi mek dis pasabl, Gaad “wahn dischrai det fareva.” (Isaiah 25:8) Di Baibl pramis: “Nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis.” (Revilayshan 21:4) Gaad wahn giv aal hyoomanz—dehn wan weh hihn sayv wen ih dischrai di wikid werl ahn dehn wan weh hihn rezorek eena di nyoo werl—di apachooniti fi liv fareva.—Jan 5:28, 29; Aks 24:15.

 Tudeh, milyanz a peepl don di pripyaa fi liv eena Gaad nyoo werl weh wahn soon kohn. Eevn doa dehn noh perfek, dehn di chrai dehn bes fi bee di kaina peepl weh Gaad waahn eena fi hihn nyoo werl. How dehn di pripyaa? Dehn di laan bowt Jehoava Gaad ahn di wan weh hihn sen, Jeezas Krais.—Jan 17:3.

Fain owt moa bowt how yoo ku servaiv di en a dis wikid werl ahn liv eena di nyoo werl weh wahn soon kohn. Aksep wahn free Baibl stodi proagram fahn wan a Jehoava Witnisiz, di yooz di buk Injai Laif Fareva!