Weh Jeezas Mi Seh Bowt Wen di En Wahn Kohn?
Laik weh wi laan eena di aatikl bifoa dis wan, wen di Baibl taak bowt di en a di werl, ih noh meen dat di ert ahn di hoal hyooman famili wahn geh dischrai. Rada, ih meen dat dis wikid ahn korop sistem, an evribadi weh sopoat it, wahn geh dischrai. Bot yu tink di Baibl seh wen dis wahn hapm?
MEK WI LUK PAHN WEH JEEZAS MI SEH BOWT DI EN:
“Soh den, kip pahn di lukowt bikaaz unu noh noa di day ner di owa.”—MACHYU 25:13.
“Soh den, unu kip pahn di lukowt ahn noh jrap asleep, kaaz unu noh noa wen da taim wahn kom.”—MAAK 13:33.
Soh nobadi pahn ert noa egzakli wen dis sistem wahn en. Bot Gaad don set wahn taim wen dat wahn hapm; wahn egzak “day” an “owa”. (Machyu 24:36) Bot yu tink dis meenz dat wee noh ga no way fi noa wen di en deh kloas? Af koars wi ku noa. Jeezas mi tel ih disaiplz fi luk fi sohn sain weh wahn shoa dat di en deh kloas.
WEH JEEZAS SEH MI WAHN HAPM?
Jeezas mi taak bowt sohn tingz weh mi wahn bee “di sain a di en a dis sistem a tingz.” Hihn mi seh: “Di nayshan dehn wahn fait gens wan anada ahn di kingdom dehn wahn fait gens wan anada, ahn dehn wahn ga famin an ertkwayk eena wahn lata plays.” (Machyu 24:3, 7) Hihn mi aalso seh dat “aal kaina dizeez wahn deh aal oava di plays.” (Look 21:11) Yu si dehnya ting weh Jeezas mi taak bowt di hapm rait now?
Tudeh, lata peepl di sofa bikaaz dehn noh ga food fi eet, waar ahn ertkwayk di hapm aal oava di plays, ahn lata dizeez di spred aal oava di werl. Fi egzampl, eena 2004, wahn big ertkwayk eena di Indian Ocean mi kaaz wahn sunami weh mi kil bowt 225,000 peepl. Eena chree yaaz, bowt 6.9 milyan peepl mi ded sayka di COVID-19 pandemik. Jeezas mi seh dat tingz laik dehnya mi wahn bee di sain dat di en a dis sistem deh kloas.
“DI LAAS DAYZ”
Di Baibl taak bowt di taim jos bifoa di en, ih kaal it “di laas dayz.” (2 Peeta 3:3, 4) Akaadn tu 2 Timoti 3:1-5, eena di laas dayz peepl wahn rijek gud moaral standadz. (Si di baks “ Weh Wahn Hapm Bifoa di En a di Werl?”) Yu si peepl weh selfish, weh greedi, weh lov vailens, ahn weh noh shoa lov tu eech ada tudeh? Dis da proof dat wi di liv kloas tu di en a di werl.
Bot da how lang dehnya “laas dayz” wahn laas? Di Baibl seh dat onli “lee bit a taim lef” fi mek Gaad dischrai “di wan dehn weh di rooin di ert.”—Revilayshan 11:15-18, futnoat; 12:12.
DI ERT WAHN SOON BEE WAHN PARADAIS!
Gaad don set di day an owa wen hihn wahn bring wahn en tu dis wikid sistem a tingz. (Machyu 24:36) Bot, moa gud nyooz deh—Gaad “noh waahn nobadi geh dischrai.” (2 Peeta 3:9) Hihn di gi evribadi wahn apachooniti fi laan bowt fi hihn wil an obay ahn. Wai hihn du dat? Bikaaz hihn waahn aala wi servaiv di en a dis werl ahn liv eena fi hihn nyoo werl; di wandaful Paradais weh hihn pramis.
Gaad di mek shoar dat evribadi ga wahn apachooniti fi laan how fi bee paat a fi hihn nyoo werl. Jeezas mi seh dat di gud nyooz bowt Gaad Kingdom wahn geh preech “aal oava di ert.” (Machyu 24:14) Jehoava Witnisiz rong di werl spen bilyanz a owaz di preech ahn teech bowt di mesij a hoap weh deh eena di Baibl. Jeezas mi seh dat dis preechin werk wahn hapm aal oava di werl bifoa di en kom.
Hyooman roolaship wahn soon en. Bot di gud nyooz da dat yoo ku servaiv di en a di werl ahn bee paat a di Paradais weh Gaad pramis. Di neks aatikl wahn diskos weh yoo ku du fi bee paat a dis nyoo werl.
Jeezas prafesi bowt “di laas dayz” gi wi hoap
Yu Mait Aalso Laik
DI WACHTOWA
Wen Gaad Kingdom Wahn Staat tu Rool Oava di Ert?
Som a Jeezas faytful falowaz mi waahn noa dat tu. How hihn mi ansa dehn kweschan?
ANSAZ TU KWESCHANZ BOWT DI BAIBL
Wat Da di Sain a “di Laas Dayz,” er “di Taim a di En”?
Di Baibl prafesai bowt wahn lata tingz weh wahn hapm at di saym taim bifoa di en a dis sistem.
