Yu Tink Dis Werl Wahn En?
Yu praabli noa dat di Baibl taak bowt di en a di werl. (1 Jan 2:17) Yu tink ih meen dat hyoomanz noh wahn egzis nohmoh? Er dat di ert wahn geh dischrai ahn nobadi ahn notn wahn servaiv?
DI BAIBL ANSA TU DEHNDEH TOO KWESCHAN DA NO!
Weh Noh Wahn En?
DI HYOOMAN FAMILI
Di Baibl seh: Gaad “neva mek di [ert] fi notn bot ih mek it fi mek peepl liv pan.”—ISAIAH 45:18.
DI ERT
Di Baibl seh: “Wahn jenarayshan di goh, ahn wahn jenarayshan di kohn, bot di ert deh ya fi fareva.” —ECCLESIASTES 1:4.
WEH IH MEEN? Akaadn tu di Baibl, di ert wahn neva geh dischrai ahn peepl wahn aalwayz liv pan it. Soh, weh ih meen wen ih seh dat di werl wahn en?
TINK BOWT DIS: Di Baibl kompyaa di en a di werl tu weh mi hapm eena Noawa dayz. Joorin da taim, di ert mi “ful a vailens.” (Genesis 6:13) Bot Noawa da-mi wahn raichos man. Soh Gaad mi sayv Noawa an ih famili, bot Hihn mi dischrai di wikid peepl wid wahn flod. Di Baibl seh weh mi hapm bak den; ih seh: “Dehnya saym tingz mi dischrai di peepl bak den. Dis mi hapm wen waata mi kova di hoal ert.” (2 Peeta 3:6) Dat da-mi di en a di werl bak den. Bot weh mi geh dischrai? Da neva di ert, bot da mi di wikid peepl weh mi liv pahn di ert. Soh wen di Baibl taak bowt di en a di werl, ih noh di seh dat di ert wahn geh dischrai. Rada, ih di taak bowt di en a di wikid peepl weh liv pahn di ert an aal di bad tingz weh dehn di du.
Weh Wahn En fi Shoar?
PRABLEMZ AHN WIKIDNIS
Di Baibl seh: “Jos wahn lee bit langa, ahn di wikid wan dehn wahn geh dischrai; yu wahn luk wichpaat dehn yoostu deh, ahn dehn noh wahn dehdeh. Bot di hombl wan dehn wahn liv pahn di ert, ahn lata pees wahn deh, soh dehn wahn bee hapi hapi.” —PSALM 37:10, 11.
WEH IH MEEN? Di Flod eena Noawa dayz neva dischrai aal di wikidnis weh mi deh pahn di ert. Afta di Flod, wikid peepl mi stil deh bowt di mek laif mizarabl fi evribadi. Bot soon, Gaad wahn bring wahn en tu aal wikidnis. Jos laik weh di Saamis mi seh: “Di wikid wan dehn wahn geh dischrai.” Gaad wahn yooz fi hihn Kingdom—wahn werl govament weh wahn rool fahn hevn oava aal raichos an obeedyant hyoomanz—fi en aal di wikidnis pahn dis ert.
TINK BOWT DIS: Yoo tink dat dehn wan weh di rool di ert wahn bee hapi fi sopoat Gaad Kingdom? Di Baibl seh no. In fak, dehn gwehn gens Gaad Kingdom. (Psalm 2:2) Weh wahn hapm sayka dat? Gaad Kingdom wahn geh rid a aal hyooman govament, an fi Hihn Kingdom wahn bee “di onli wan weh wahn laas fareva.” (Daniel 2:44) Bot wai hyooman roolaship need fi en?
WEH WI NEED, AHN WAI? Hyooman Roolaship Need fi En
Di Baibl seh: “Ih noh eevn bilangz tu man weh di waak fi seh how fi tek di neks step.”—JEREMIAH 10:23.
WEH IH MEEN? Gaad neva kriyayt hyoomanz fi mek dehn rool dehnself. Dehn kyaahn rool oava ada peepl ahn dehn kyaahn eevn solv dehn oan prablemz.
TINK BOWT DIS: Di Britannica Academic seh dat di difrent govaments weh egzis tudeh kyaahn “solv di prablemz weh wi di fays laik poverti, honga, dizeez, nachral dizaasta, waar, ahn vailens.” Ih kantinyu seh: “Sohn peepl . . . bileev dat anles evribadi kohn tugeda, dehn wahn ku fain wahn way owt.” Bot eevn if aala di hyooman govament dehn kohn tugeda, imperfek hyoomanz wahn stil di rool dis werl ahn dehn wahn stil kyaahn solv di prablemz weh wi mi menshan erliya. Gaad Kingdom da di onli govament weh ga di powa fi solv aala wi prablemz fareva.
Soh akaadn tu di Baibl, di en a di werl—di werl weh wi di liv eena rait now—da noh sohnting weh gud peepl shuda frayd fa. Insteda dat, da gud nyooz bikaaz Gaad Kingdom wahn bring wahn nyoo werl ahn dis oal werl weh ful a wikidnis noh wahn egzis nohmoh!
Wen aala dis wahn hapm? Di neks aatikl wahn ansa da kweschan.
Yu Mait Aalso Laik
ANSAZ TU KWESCHANZ BOWT DI BAIBL
Yu Tink Enibadi Wahn Eva Dischrai di Ert?
Di Baibl tel wi playn ahn schrayt wat da Gaad plan fi di ert.
