Erliya wi mi taak bowt how di prees da Delphi mi chrik Croesus wen ih gaahn fain owt if ih mi wahn win di waar gens di king a Perzha. Sayka dat hihn mi looz di waar. Pahn di ada han, di Baibl gat een wahn amayzin prafesi bowt di king a Perzha. Ahn dis prafesi mi did kohn chroo, dong tu di laas deetayl.

Di Heebroo prafit Aizaiya mi gi wahn prafesi bowt di king a Perzha 200 yaaz bifoa di king mi eevn baan. Hihn mi seh dat dis king mi wahn kanka di siti a Babilan, an ih mi seh egzakli how ih mi wahn du it. Aizaiya mi eevn seh dat di naym a di king mi wahn bee Sairos.

Isaiah 44:24, 27, 28: “Dis da weh Jehoava seh, . . . ‘Di Wan weh di tel di deep waata, “Ivaporayt, an Ah wahn jrai op aala yu riva dehn”; Di Wan weh di seh dis bowt Sairos, “Hihn da mi shepad, an ih wahn du evriting weh Ah waahn”; di Wan weh di seh bowt Jeroosalem, “Dehn wahn bil yu op bak agen,” ahn bowt di templ, “Dehn wahn put dong yu fongdayshan.”ʼ”

Bak eena Sairos dayz, di Yoofraytis Riva yoostu ron rait chroo Babilan Siti. Akaadn tu Herodotus, wahn man weh mi rait wahn lata Greek hischri, Sairos aami mi dig wahn jrayn fi mek di riva goh dong. Dis mi mek it pasabl fi mek Sairos soalja dehn waak rait chroo di riva fi get eena di siti. Afta Sairos mi tek oava Babilan, hihn mi free di Jooz weh da-mi slayv deh. Semti yaaz afta Jeroosalem mi geh dischrai, hihn mi mek dehn gaahn bak fi bil it op bak.

Isaiah 45:1: “Dis da weh Jehoava seh tu ih anointid wan, tu Sairos, fi hoo rait han Ai wahn yooz fi kanka nayshan heda hihn, fi tek weh di powa a sohn king, ahn fi oapm di dobl doa dehn soh dat di gayt dehn wahn lef oapm.”

Di Perzhan soalja dehn mi gaan eena di siti chroo di big dobl doa weh mi lef oapm. If di Babiloanyan dehn mi onli noa weh Sairos mi-di plan fi du, dehn mi wahn kloaz aala di gayt weh oapm tuwaadz di riva. Bot di way tingz mi werk owt, di siti neva ga no kaina protekshan.

Dis da jos wan a di lata prafesi weh wi ku fain eena di Baibl weh don kohn chroo dong tu di leelis deetayl. a Wen man pridik tingz, dehn wuda giv aal di gloari tu dehn faals gaadz, bot di prafesi dehn eena di Baibl kohn fahn di Wan weh seh: “Fahn di biginin Ai prafesai di tingz weh noh hapm yet, ahn fahn lang taim di tingz weh nobadi du yet.”—Isaiah 46:10.

Onli di chroo Gaad, hoo naym Jehoava, ku seh sohnting laik dat. Fi hihn naym meenz “Hihn Wahn Mek ih Bee er Hapm.” Dis shoa dat hihn ku pridik di fyoocha ahn mek fi hihn wil kohn chroo. Ih mek wi noa fi shoar dat hihn ku mek aala ih pramis dehn kohn chroo.

Yoo wuda waahn noa weh sohn Baibl prafesi seh bowt di taim weh wee di liv eena? Bowt 2,000 yaaz agoa, di Baibl mi seh dat “di laas dayz wahn bee daynjaros ahn laif wahn bee haad.” Weh dehnya laas dayz di rifaa tu? Wel, ih noh di taak bowt di en a di ert er hyoomanz, bot ih di taak bowt di en a di prablemz ahn sofarin weh peepl di fays fi towznz a yaaz now. Mek wi diskos sohn prafesi weh diskraib “di laas dayz.”

2 Timoti 3:1-5: “[Eena] di laas dayz. . . , peepl wahn lov dehnself ahn lov moni. Dehn wahn boasi ahn prowd. Dehn wahn insolt op Gaad ahn wan anada. Dehn noh wahn obay dehn payrents, dehn noh wahn bee tankful, ahn dehn noh wahn bee laayal. Dehn noh wahn ga no afekshan fi wan anada. Dehn noh wahn bee wilin fi get lang wid wan anada. Dehn wahn slanda eech ada, ahn dehn noh wahn ga no self-kanchroal. Dehn wahn bihayv laik wail animal, ahn dehn wahn hayt evriting weh gud. Dehn wahn bichray wan anada. Dehn wahn stobant an onli waahn du dehn oan ting. Dehn wahn tink tu moch a dehnself, ahn dehn wahn lov plezha insteda lov Gaad. Dehn wahn play laik dehn di wership Gaad wid aala dehn haat, bot dehn noh wahn liv dehn laif akaadn tu weh dehn seh dehn bileev.”

Moa ahn moa peepl di bihayv laik dat tudeh, noh chroo? Yoo noatis dat wi liv rong prowd peepl weh onli lov dehnself ahn lov moni? Yu mosi si peepl weh aalwayz waahn du tingz dehn oan way ahn weh noh wilin fi gree wid adaz. Ahn fi shoar yu si lata chiljren weh noh waahn obay dehn payrents ahn peepl weh lov plezha moa dan weh dehn lov Gaad. Ahn tingz jos di geh wosa ahn wosa evri day.

Machyu 24:6, 7: “Unu wahn hyaa bowt waar aal oava di plays. . . . Di nayshan dehn wahn fait gens wan anada ahn di kingdom dehn wahn fait gens wan anada.”

Akaadn tu sohn ripoat, di amonk a peepl weh ded fahn waar sins 1914 da moa dan 100 milyan peepl. Dat da moa dan di hoal papyulayshan a wahn lata konchri. Jos imajin aala di tyaaz, payn, ahn sofarin weh aala dehndeh det kaaz. Yu tink di nayshan dehn laan fahn dehn mistayk ahn du sohnting fi en waar?

Machyu 24:7: “Dehn wahn ga famin.”

The World Food Programme seh: “Di werl projoos inof food fi feed evribadi, bot 815 milyan peepl, weh da wan owta evri nain persn, stil goh sleep evri nait widowt eet. Pahn tap a dat, wan owta evri chree persn noh helti bikaaz dehn noh ga inof food fi eet.” An evri yaa bowt chree milyan chiljren ded bikaaz dehn noh ga nof food.

Look 21:11: “Sohn big ertkwayk wahn hapm.”

Evri yaa, dehn ga bowt 50,000 ertkwayk weh big inof fi mek peepl feel. Ahn bowt 100 a dehn kaaz lata damij tu bildinz. Bowt wans a yaa wi wuda ga wan big ertkwayk. Akaadn tu wahn ripoat, bitween di yaa 1975 ahn 2000, bowt 471,000 peepl ded bikaaz a ertkwayk.

Machyu 24:14: “Mai disaipl dehn wahn preech di gud nyooz bowt di Kingdom aal oava di ert soh dat aala di nayshan dehn ku noa bowt it, ahn den di en wahn kom.”

Moa dan ayt milyan Jehoava Witnisiz di preech di gud nyooz a Gaad Kingdom eena moa dan 240 konchri ahn teritori rong di werl. Dehn preech dis gud nyooz eena sohn bizi siti, da sohn faar vilij, eena di jongl dehn, an eevn pahn di mongtin dehn. Di prafesi tel wi dat wen Gaad seh dis werk don, “den di en wahn kom.” Weh dat meen? Ih meen dat nohmoh hyooman govament wahn rool agen. Insted, da Gaad Kingdom wahn rool. Weh aal Gaad Kingdom wahn du wen ih staat rool pahn ert? Reed di neks aatikl fi fain di ansa.