DA CHROO DAT YOO KU DISAID WEH YU FYOOCHA WAHN BEE LAIK? Som peepl bileev dat evriting weh wahn hapm eena di fyoocha don set ahn dat dehn kyaahn du notn fi chaynj it. Wen dehn chrai du sohnting an ih noh werk owt, dehn jos brosh it aaf ahn seh sohnting laik, “Ih jos neva sopoas tu hapm!”

Ada peepl looz hoap wen dehn si aal di sofarin an injostis eena di werl. Maybi dehn mi chrai mek laif beta, bot den tingz laik waar, kraim, nachral dizaasta, ahn siknis mes op dehn planz. Soh dehn mait jos giv op ahn seh, ‘Wai Ah eevn chrai?ʼ

Da chroo, tingz kom op eena laif weh ku mes op yu planz. (Ecclesiastes 9:11) Bot wen ih kohn tu yu reel fyoocha, yu doo ga wahn chois. In fak, di Baibl seh dat yu fyoocha pen pahn yoo. Wai wi seh dat?

Wen Moaziz mi-di leed di Izrelait dehn ahn dehn mi-di geh redi fi goh eena di Pramis Lan, Gaad mi tel dehn chroo Moaziz: “Ah di giv unu wahn chois. Unu ku pik laif er det, di blesin er di kers. Unu an unu disendant dehn mos chooz laif soh dat unu ku liv. Soh unu mos lov Jehoava unu Gaad, lisn tu ahn, an stik tu ahn.”—Deuteronomy 30:15, 19, 20.

“Ah di giv unu wahn chois. Unu ku pik laif er det, di blesin er di kers. Unu . . . mos chooz laif.”—Deuteronomy 30:19

Yes! Gaad mi sayv di Izrelait dehn fahn slayvri da Eejip an ih gi dehn wahn chaans fi liv free ahn hapi eena di Pramis Lan. Bot dat neva mi wahn hapm rait soh. If dehn mi waahn geh dehndeh blesin, dehn mi haftu “chooz laif.” How? Dehn mi fi ‘lov Gaad, lisn tu ahn, an stik tu ahn.ʼ

Now, yoo ga wahn simila disizhan fi mek, ahn weh yu chooz fi du wahn afek weh kaina fyoocha yu wahn gat. If yu chooz fi lov Gaad, lisn tu ahn, an stik tu ahn, yu wahn di chooz laif—evalastin laif eena Paradais rait ya pahn ert. Bot how yu ku du dehndeh tingz?

Lov da Gaad nomba wan kwaliti. Di apasl Jan mi rait: “Gaad da lov.” (1 Jan 4:8) Dats wai wen dehn mi aks Jeezas wich komanment da di graytis wan owta aala dehn, hihn mi seh: “Yu fi lov Jehoava yu Gaad wid yu hoal haat ahn wid yu hoal soal ahn wid yu hoal main.” (Machyu 22:37) Soh if yu waahn ga wahn reel frenship wid Jehoava Gaad, yu kyaahn frayd far ahn er bileev eena ahn jos bikaaz hihn da Gaad, yu mos lov ahn. Bot wai wi shuda chooz fi lov ahn?

Jehoava lov peepl jos laik how payrents lov dehn chiljren. Payrents noh perfek, bot bikaaz dehn lov dehn chiljren dehn teech, inkorij, sopoat, ahn disiplin dehn. Dehn du dis soh dat dehn chiljren ku bee hapi ahn liv wahn gud laif. Ahn weh payrents waahn fahn dehn chiljren? Dehn waahn mek dehn chiljren lov dehn bak ahn tek tu haat aal weh dehn teech dehn fi dehn oan gud. Yu noh tink dat ih onli rait fi mek wi hevnli Faada ekspek wee fi lov ahn, an fi bee tankful fi aal weh ih du fi wi?

Eena di orijinal langwij weh dehn mi yooz fi rait di Baibl, di werd “lisn” sohntaim gi di saym aidyaa az “obay.” Da jos laik wen yu tel wahn pikni, “Lisn tu yu ma ahn pa.” Yu noh jos di tel ahn fi hyaa weh ih payrents di seh, yu di tel ahn fi obay. Soh fi lisn tu Gaad meenz fi obay weh ih seh. Laik how Gaad noh akchwali taak tu hyoomanz tudeh, wi need fi reed di Baibl an obay weh ih seh if wi waahn lisn tu ahn.—1 Jan 5:3.

Fi shoa wi dat ih impoatant fi lisn tu Gaad vais, Jeezas mi seh: “Wahn man noh fi liv pahn jos food, bot ih fi liv pahn evri werd weh kom owta Jehoava mowt.” (Machyu 4:4) Jos laik how wi need food fi liv, wi need fi laan bowt Gaad fi liv. In fak, dat eevn moa impoatant dan food. Wai? Waiz King Salaman mi seh: “Wizdom ku protek wi jos laik how moni ku protek wi, bot di advantij weh nalij gat oava moni da dis: Wizdom wahn sayv wi.” (Ecclesiastes 7:12) Di nalij ahn wizdom weh wi geh fahn Gaad ku protek wi now an ih ku help wi chooz di rait road weh wahn leed tu evalastin laif eena di fyoocha.

Memba Jeezas iloschrayshan weh wi menshan eena di laas aatikl? Hihn mi seh: “Di gayt ahn di road weh naro wahn leed unu tu evalastin laif, ahn lee bit a peepl di fain it.” (Machyu 7:13, 14) If wi chravl pahn da road, wi wahn geh evalastin laif, soh ih wuda bee gud fi ga sohnbadi weh noa di road gud fi gaid wi. Dat da wahn gud reezn fi stik kloas tu Gaad. (Psalm 16:8) Bot, how wi ku du dat?

Evri day, wi ga soh moch tingz weh wi need fi du ahn lat moa weh wi wuda waahn du. Dehndeh tingz ku kip wi bizi er dischrak wi ahn lef wi wid lee bit er no taim ataal fi tink bowt weh Gaad waahn wi du. Dat da wai di Baibl rimain wi: “Kip aan di chek unuself gud fi mek shoar dat unu di liv laik how waiz peepl liv, ahn noh laik how foolish peepl liv. Mek di bes yoos a unu taim, kaaz di dayz weh wi di liv eena wikid.” (Ifeezhanz 5:15, 16) Wen wi mek wi rilayshanship wid Gaad di moas impoatant ting eena wi laif, wi wahn stay kloas tu ahn.—Machyu 6:33.

Eevn doa yu kyaahn du notn fi chaynj di paas, yu kud du sohnting fi mek yoo ahn yu famili ga wahn brait fyoocha. Di Baibl teech wi dat wi hevnli Faada, Jehoava Gaad, lov wi wahn lat, an ih tel wi weh hihn waahn wi du. Tink bowt weh di prafit Maika mi seh:

“Jehoava don tel yu bowt weh gud. Ahn da wat hihn di aks bak fahn yu? Onli fi mek yu shoa jostis, lov laayalti, ahn liv wahn modes laif fronta yu Gaad!”—Micah 6:8.

Yoo wahn aksep Jehoava invitayshan fi stay kloas tu ahn an injai di wandaful blesinz weh ih pramis fi di fyoocha? Di chois op tu yoo!