Di gud nyooz a Gaad Kingdom di geh preech aal oava di ert, jos laik weh Jeezas seh mi wahn hapm. (Machyu 24:14) Di Baibl buk a Daniel tel wi dat dis Kingdom da Gaad govament. Daniel chapta 2 prafesai dat sohn powaful govament mi wahn rool wan afta di ada, staatin fahn di taim a aynshent Babilan dong tu fi wee day. Ahn vers 44 tel wi weh wahn hapm aftawodz. Ih seh:

“Eena di dayz a dehndeh king, di Gaad a hevn wahn set op wahn kingdom weh wahn neva geh dischrai. Ahn dis kingdom wahn neva geh paas aan tu eni ada peepl. Ih wahn krosh ahn put wahn en tu aala dehnya kingdom, an ih wahn bee di onli wan weh wahn laas fareva.”

Dis ahn sohn ada Baibl prafesi pridik dat Gaad Kingdom wahn geh rid a aal hyooman govament, an evribadi wahn ga chroo pees ahn dehn wahn feel sayf. Weh yu tink laif wahn bee laik anda Gaad Kingdom? Fi ansa dat, wi wahn diskos sohn wandaful pramis weh wahn soon kohn chroo.

• WI NOH WAHN GA NOHMOH WAAR

  Psalm 46:9: “[Gaad] di put wahn en tu aal waar fi di hoal ert. Hihn dischrai di boa an aro ahn di spyaa; ih bon op di waar chariyat dehn wid faiya.”

  Imajin weh di werl wuda bee laik if peepl wuda yooz aal di moni, taim, an enerji weh dehn spen fi mek wepan fi help peepl insteda kil dehn! Gaad pramis wahn kohn chroo wen fi hihn Kingdom staat rool.

• WI NOH WAHN GEH SIK NOHMOH

  Isaiah 33:24: “Nobadi wahn seh: ‘Ah sik.ʼ”

  Tink bowt wahn werl weh nobadi wahn ga haat prablemz, kyansa, daiyabeetis, er eni ada siknis. Eena wahn werl laik dat wi noh wahn need haaspital ner medisn. Evribadi pahn ert wahn ga perfek helt.

• EVRIBADI WAHN GA NOF FOOD FI EET

  Psalm 72:16: “Plenti a grayn wahn deh pahn di ert; pahn di tap a di mongtin ih wahn di oavafloa.”

  Di ert wahn projoos nof food fi evribadi, ahn nobadi wahn lef widowt. Peepl wahn eet helti food ahn dehn noh wahn sofa bikaaz a honga nohmoh.

• WI NOH WAHN GA NOHMOH PAYN, SOFARIN, NER DET

  Revilayshan 21:4: “[Gaad] wahn waip weh dehn tyaaz fahn dehn aiy, nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis. Di tingz weh yoostu hapm noh wahn egzis nohmoh.”

   Peepl wahn bee perfek ahn dehn wahn liv fareva eena Paradais pahn ert! Dat da egzakli weh Jehoava, wi lovin Gaad, pramis wi.

Yu tink yu ku bileev aala dehnya pramis? Eevn doa moas peepl tink dat di kaina laif weh di Baibl pramis wi song gud, dehn fain it haad fi andastan weh ih meen fi liv fareva. Bot dat noh sopraiz wi, bikaaz no hyooman eva yet liv fareva.

Aal chroo hischri peepl liv az slayv tu sin ahn det, soh dat mek dehn feel laik payn ahn sofarin da wahn naamal paat a laif. Bot dat da noh di kaina laif weh Jehoava Gaad mi waahn fi wee.

Gaad garantee dat fi hihn pramis dehn wahn kohn chroo wen ih seh: “Ih noh wahn kohn bak tu mi widowt rizolts. Fi shoar ih wahn du wateva Ai dizaiya. Ahn fi shoar ih wahn ga sokses eena weh Ai sen it fi du.”—Isaiah 55:11.

Di Baibl seh dat Gaad “kyaahn tel lai.” (Taitos 1:2) Sins hihn pramis wi aala dehnya wandaful tingz fi di fyoocha, ih mek sens fi mek wi kansida di ansa tu dehnya kweschan: Ih reeli pasabl fi liv fareva eena paradais pahn ert? Weh wi need fi du if wi waahn injai evriting weh Gaad pramis wi? Di neks aatikl dehn eena dis magazeen wahn help wi fain di ansa tu dehndeh kweschan.