DAT DA WAHN WANDAFUL HOAP FI DI FYOOCHA! Wi Kriyayta don pramis wi dat wi wahn liv fareva, rait ya pahn ert. Bot lata peepl fain it haad fi bileev da pramis. Dehn wuda seh dat evribadi wahn ded ahn dat da jos paat a laif. Ada peepl tink dat ih pasabl fi liv fareva, bot onli afta dehn ded ahn goh da hevn. Weh yoo tink?

Bifoa yu eevn ansa, noatis how di Baibl ansa dehnya ada kweschan: Bays pahn di way wi geh mek, how lang hyoomanz sopoas tu liv pahn ert? Wai Gaad mi mek di ert ahn hyoomanz? Wai wi ded?

Owta evriting weh Gaad mek, wee geh mek eena wahn veri speshal way. Weh dis meen? Di Baibl seh dat onli hyoomanz geh mek eena Gaad “imij.” (Genesis 1:26, 27) Dat meen dat Gaad mek wi wid di saym kwalitiz weh hihn ga, laik lov ahn jostis.

Pahn tap a dat, wi ga di abiliti fi noa gud fahn bad, ahn wi ga wahn dizaiya fi noa ahn ga wahn frenship wid Gaad. Dat da wai tingz laik di yoonivers, naycha, art, ahn myoozik amayzin tu wee. Bot weh soh speshal bowt wee da dat wi ku wership Gaad. Dehndeh kwalitiz mek wi veri difrent fahn aal ada livin tingz pahn ert.

Tink bowt dis: If Gaad mi waahn mek hyoomanz liv fi jos wahn fyoo yaaz, wai ih mek wi wid aala dehnya wandaful kwalitiz? Di reezn wai Gaad mek wi eena wahn speshal way da bikaaz hihn waahn wi injai laif fareva rait ya pahn ert.

Som peepl seh dat Gaad neva mek hyoomanz fi liv fareva pahn ert. Dehn klaym dat di ert da wahn plays weh ih put hyoomanz fi tes dehn owt ahn si if dehn reeli dizerv fi liv fareva wid hihn da hevn. Bot if dat da chroo, yu noh tink dat da Gaad fi blaym fi aala di wikidnis weh egzis pahn ert tudeh? Now dat da di opozit a weh di Baibl teech bowt Gaad; ih seh: “Evriting weh di Rak du perfek, bikaaz hihn aalwayz fyaa. Wahn Gaad weh faytful ahn hoo neva joj rang, hihn fyaa an ih aalwayz du weh rait.”—Deuteronomy 32:4.

Di Baibl tel wi wai Gaad mek di ert tu. Ih seh: “Az tu di hevnz, dehn bilangz tu Jehoava, bot di  ert ih gi tu hyoomanz.” (Psalm 115:16) Yu si, Gaad mek dis byootiful ert fi mek ih bee wi hoam. An ih mek it wid evriting weh wi need fi injai laif fareva.—Genesis 2:8, 9.

“Az tu di hevnz, dehn bilangz tu Jehoava, bot di ert ih gi tu hyoomanz.”—Psalm 115:16

Eena di Baibl, Gaad aalso seh wai ih mek hyoomanz. Dis da weh hihn mi tel Adam ahn Eev: “Ful op di ert ahn koltivayt it. Unu mos ga kanchroal oava . . . aal di animal weh di moov bowt pahn di grong.” (Genesis 1:28) Soh hihn tel dehn fi tek kayr a di hoal ert ahn mek it intu wahn paradais. Dat da-mi wahn privilij fi chroo! Adam, Eev, ahn dehn chiljren mi fi liv fareva pahn ert, noh da hevn.

Soh da wai wi ded den? Di Baibl eksplayn dat wahn aynjel weh Gaad mek mi ribel gens ahn, an ih mi chrai mes op Gaad planz. Di Baibl rifaa tu da aynjel az Saytan di Devl.

Saytan mi chrai kanvins wi fers payrents, Adam ahn Eev, fi jain hihn eena ih ribelyan gens Gaad. Wen Saytan mi klaym dat Gaad mi-di hoal bak sohnting gud fahn dehn—di rait fi noa gud fahn bad—dehn chooz fi tek Saytan said ahn ton dehn bak pahn Gaad. Weh mi en op di hapm? Az taim paas, dehn mi en op di ded jos laik how Gaad mi waan dehn. Dehn mi looz dehn chaans fi liv fareva eena Paradais pahn ert.—Genesis 2:17; 3:1-6; 5:5.

Adam ahn Eev ribelyan afek evri singl hyooman dong tu dis day. Dis da weh Gaad Werd seh: “Sin mi fos kom eena di werl sayka wan man [Adam], ahn sin bring det. Soh det spred tu evribadi.” (Roamanz 5:12) Wi ded bikaaz wi inherit sin ahn det, noh bikaaz Gaad ga wahn ‘planʼ fi hyoomanz weh nobadi kyaahn andastan.

Di ribelyan da Eedn neva chaynj weh Gaad waahn fi di ert ahn fi hyoomanz. Sins Gaad shoa lov ahn jostis eena wahn perfek way, hihn disaid fi free wi fahn slayvri tu sin ahn det. Di apasl Paal mi eksplayn: “Di pay weh sin gi wi da det, bot di gif weh Gaad gi wi da evalastin laif bikaaz a weh wi Laad Jeezas Krais mi du.” (Roamanz 6:23) Di lov weh Gaad ga fi wi mek “ih giv ih onli Son [Jeezas Krais], soh dat evribadi weh shoa fayt eena ahn noh wahn geh dischrai bot wahn liv fareva.” (Jan 3:16) Bikaaz Jeezas mi wilin fi aafa ihself az wahn ransom sakrifais, hihn mi pay di prais fi geh bak evriting weh Adam laas. a

Soon, Gaad pramis fi mek di ert wahn paradais wahn kohn chroo. If yu waahn injai dis wandaful fyoocha, yu need fi fala Jeezas advais: “Goh chroo di gayt weh naro, bikaaz di gayt ahn di road weh waid an eezi fi goh chroo wahn leed unu tu dischrokshan, ahn wahn lata peepl di goh chroo it; bot di gayt ahn di road weh naro wahn leed unu tu evalastin laif, ahn lee bit a peepl di fain it.” (Machyu 7:13, 14) Yes, fi yoo fyoocha dipen pahn di chois dehn weh yoo mek. Weh yoo wahn chooz?