YOO eva feel soh bad dat yu feel laik yu noh waahn kantinyu liv? Den yu wuda andastan how Adriana mi feel. Shee sofa fahn wahn siknis weh wuda mek ih aalwayz feel sad ahn hoaples [acute anxiety]. Shee mi fain owt dat ih sofa fahn dipreshan.

Wahn man fahn Japan weh naym Kaoru mi-di luk afta ih payrents weh mi don oal ahn weh mi ga helt prablemz. Hihn seh: “Dehn taim, Ah mi-di geh lata presha fahn werk. Afta wahn wail, Ah neva mi eevn feel laik eet an Ah neva mi-di sleep gud. Ah mi-di staat tu tink dat Ah ku geh rid a mi prablemz if Ah ded.”

Wahn man fahn Nigeria weh naym Ojebode seh: “Ah aalwayz yoostu sad, soh sad dat Ah wuda krai ahn krai, soh Ah wuda luk fi wayz fi en mi laif.” Tank gudnis Ojebode, Kaoru, ahn Adriana neva did kil dehnself. Sad fi seh doh, evri yaa towznz a peepl en op di kil dehnself.

Moas a di peepl weh kil dehnself da man. Dehn feel tu shaym fi aks fi help. Jeezas mi seh dat sik peepl need wahn dakta. (Look 5:31) Soh if yoo eva feel soh dipres dat yu waahn kil yuself, pleez noh bee shaym fi aks fi help. Lata peepl weh sofa fahn dipreshan geh help fahn dakta ahn geh chreetment far it. Ojebode, Kaoru, an Adriana mi geh medikal help ahn now dehn di koap wid dehn prablemz; dehn di du moch beta.

Daktaz mait yooz sertn medikayshan er dehn mait jos taak wid di payshent bowt weh di bada dehn an alow dehn fi taak bowt how dehn feel. Dehn kaal dis taak terapi. Somtaimz dehn mait yooz di too opshan. Peepl weh sofa fahn dipreshan aalso need di sopoat ahn payshens a lovin famili ahn frenz. Di bes bes fren enibadi kuda eva gat da Jehoava Gaad, bikaaz hihn provaid wi wid di bes help weh deh eena fi hihn Werd, di Baibl.

Peepl weh sofa fahn dipreshan mait need fi deh pahn kanstant chreetment, dehn mait eevn haftu chaynj di way dehn liv dehn laif. Bot if yoo schrogl wid dipreshan, yoo ku luk faawod tu wahn brait ahn hapi fyoocha, jos laik Ojebode. Dis da weh hihn seh: “Ah luk faawod fi si di skripcha eena Isaiah 33:24 kohn chroo, weh pramis wi bowt wahn taim wen nobadi wahn seh ‘Ah sik.ʼ” Jos laik Ojebode, fain komfert eena Gaad pramis a wahn “nyoo ert,” wehpaat nobadi noh wahn “feel payn nohmoh.” (Revilayshan 21:1, 4) Da pramis wahn geh rid a aala di mental an imoashanal payn weh egzis tudeh. Di payn weh yoo di goh chroo tudeh, noh wahn egzis nohmoh. Ih “noh wahn kohn bak op eena [yu] main ner eena [yu] haat.”—Isaiah 65:17.