• Gaad chooz. “Ai put mai oan king pahn di chroan . . . Ai wahn gi yu aala di nayshan dehn az yu inheritans ahn di hoal ert wahn bee fi yoo.”—Psalm 2:6, 8.

• Da wahn disendant a King Dayvid. “Wahn baybi baan fi wi, Gaad gi wi wahn son . . . Fi hihn roolaship wahn praspa fareva, ahn pees wahn deh tu, pahn Dayvid chroan ahn pahn fi hihn kingdom fi mek it schrang.”—Isaiah 9:6, 7.

• Baan da Betlihem. “[Herod] aks dehn seh, “Da wehpaa dis Krais fi baan?” Dehn ansa ahn seh, “Da Betlihem eena Judeeya. Dis da weh di prafit dehn mi rait fahn lang taim.”—Machyu 2:4, 5.

• Hyoomanz rijek ahn kil. “Peepl mi hayt ahn, an wi luk pan ahn laik hihn da noh notn. . . . Hihn mi geh stab fi fi wee sin dehn; hihn mi sofa fi fi wee mistayk dehn.”—Isaiah 53:3, 5.

• Rayz op bak fahn di ded ahn geh gloari. “Dat yoo, Gaad, noh wahn lef mi eena di plays a di ded, ner lef yu Hoali Wan fi ratn eena di grayv. . . . Bikaa yu deh wid mi, Ah oanli feel hapi.”—Psalm 16:10, 11.

Owta aala di peepl weh eva liv, onli wan persn eva mach aala dehnya deetaylz weh diskraib wahn gud Roola, ahn da persn da Jeezas Krais. In fak, wahn aynjel mi tel Mayri, Jeezas ma: “Gaad wahn gi ahn ih grayt-grayt-grayt-granfaada Dayvid chroan. . . . ahn fi hihn kingdom wahn neva kohn tu wahn en.”—Look 1:31-33.

Jeezas neva staat tu rool az king wen hihn mi deh ya pahn di ert. Rada, hihn wahn rool oava hyoomanz fahn hevn az di King a Gaad Kingdom. Weh mek hihn di bes Roola? Tink bowt weh Jeezas mi du wen ih mi liv ya pahn di ert.

•   Jeezas mi kay bowt peepl. Jeezas mi help peepl noh mata weh dehn kohn fram, ahn noh mata if dehn da-mi man er uman, if dehn mi yong er oal, er weda dehn mi rich er poa. (Machyu 9:36; Maak 10:16) Wen wahn man weh mi ga leprosi mi bayg ahn: “Sa, if yoo waahn, yoo ku heel mi,” Jeezas mi feel soh sari far ahn, soh ih mi heel ahn.—Maak 1:40-42.

• Jeezas mi teech wi how fi pleez Gaad. Hihn mi seh: “Unu kyaahn serv Gaad ahn moni sayhn taim.” Hihn mi aalso seh dat wi mos chreet ada peepl di way wi wuda waahn dehn chreet wee. Ahn hihn mi shoa wi dat Gaad noh onli pay main tu weh wi du, hihn pay atenshan tu how wi tink ahn feel tu. Soh fi pleez Gaad, wi mos kanchroal weh wi feel eena wi haat. (Machyu 5:28; 6:24; 7:12) Ahn Jeezas tel wi dat if wi waahn bee reeli ahn chrooli hapi, wi haftu laan weh Gaad waahn wi du ahn den du it.—Look 11:28.

• Jeezas mi teech wi weh ih meenz fi lov peepl. Weh Jeezas mi seh ahn du mi powaful an ih mi toch peepl haat. “Di krowd kudn bileev weh dehn mi-di yehr, sayka how ih mi-di teech. Hihn mi-di teech laik sohnbadi weh noa egzakli weh dehn mi-di taak bowt, ahn ga aal atariti fi seh it tu.” (Machyu 7:28, 29) Hihn mi teech dehn: “Lov yu enimi dehn.” Hihn mi eevn pray fi som a dehn wan weh mi rispansabl fi fi hihn det. Ih mi seh: “Faada, fagiv dehnya peepl kaa dehn noh noa weh dehn di du.”—Machyu 5:44; Look 23:34.

Jeezas ga di perfek kwalifikayshanz fi bee wahn helpful ahn kain Roola a di werl. Bot da wen hihn wahn staat tu rool?