Wai Wi Need Gaad Kingdom?
Wen di fers hyoomanz mi staat liv pahn di ert, wi Kriyayta, weh naym Jehoava, da-mi di onli Roola. Hihn mi rool eena wahn lovin way. Hihn mi mek wahn byootiful gyaadn da Eedn ahn giv it tu hyoomanz fi liv eena. Hihn mi mek shoar dehn ga lata food fi eet tu. Noh onli dat, bot hihn mi gi dehn gud werk fi du weh wuda mek dehn feel satisfai. (Genesis 1:28, 29; 2:8, 15) Hyoomanz mi wahn injai pees if dehn mi stay anda Gaad lovin roolaship.
Di fers too hyooman mi rijek Gaad az dehn Roola
Di Baibl tel wi dat wahn aynjel mi ribel gens Gaad ahn seh dat Gaad noh ga di rait fi rool oava peepl. Da aynjel da Saytan di Devl. Akaadn tu hihn, hyoomanz wuda mi bee moa hapi widowt Gaad dairekshan ahn roolaship. Sad fi seh, wi fers payrents, Adam ahn Eev, mi fala Saytan egzampl ahn ribel gens Gaad.—Genesis 3:1-6; Revilayshan 12:9.
Bikaaz Adam ahn Eev mi rijek Gaad az dehn Roola, dehn mi looz dehn hoam eena Paradais ahn dehn hoap fi liv fareva wid perfek helt. (Genesis 3:17-19) Fi dehn disizhan mi afek dehn pikni laytaraan tu. Di Baibl seh dat sayka Adam sin, “sin spred tu evribadi,” ahn sayka dat “evribadi wahn ded.” (Roamanz 5:12) Sin mi bring wahn nada prablem tu: “Man rool oava man an onli kaaz payn.” (Ecclesiastes 8:9) Dat meenz dat wen hyoomanz rool dehnself, dehn wahn aalwayz ga prablemz.
HYOOMAN ROOLASHIP STAAT
Nimrad mi ribel gens Jehoava
Di fers hyooman roola weh di Baibl menshan da-mi Nimrad. Hihn mi ribel gens Jehoava roolaship tu. Eva sins Nimrad dayz, peepl weh ga powa di abyooz dehn atariti. Bowt 3,000 yaaz abak, King Salaman mi rait: “Ah si peepl di krai kaaz dehn di sofa, ahn nobadi noh dehdeh fi gi dehn komfert. Ahn di peepl weh ga powa da di saym wan weh di mek dehn sofa.”—Ecclesiastes 4:1.
Tingz stan di saym tudeh. Eena 2009, wahn poblikayshan fahn di United Nations seh dat bad roolaship da wan a di mayn reezn wai eevl tingz di hapm tudeh.
TAIM FI AKSHAN!
Di werl need wahn beta roola ahn wahn beta kaina govament. Ahn dat da weh wi Kriyayta pramis wi!
Eevn di bes hyooman govament dehn kyaahn solv di seeryos prablem dehn weh hyoomanz fays
Gaad set op wahn Kingdom, er govament, weh wahn tek weh roolaship fahn hyoomanz, ahn da Kingdom “wahn bee di onli wan weh wahn laas fareva.” (Daniel 2:44) Dat da di Kingdom weh milyanz a peepl di pray fa. (Machyu 6:9, 10) Bot Gaad noh wahn rool dis govament ihself. Insteda dat, hihn pik sombadi weh mi liv az wahn hyooman fi bee di Roola. Da hoo Gaad pik?
