Eena di laas aatikl, wi mi kansida di sain weh Jeezas mi taak bowt. Da sain gi wi reel proof dat Gaad Kingdom don set op da hevn wid Jeezas az di King.

Di Baibl seh dat wen Jeezas mi staat rool az King a di Kingdom, hihn mi wahn chroa Saytan an ih deemonz fahn owta hevn. Now, dehn ku onli afek weh di hapm pahn di ert. Dis da wan a di reezn wai tingz geh soh bad sins 1914.—Revilayshan 12:7, 9.

Eevn doa kandishanz eena di werl di geh wers, Jeezas, hoo da di King a Gaad Kingdom, don du tingz fi help peepl rong di ert. Tanks tu di Baibl ejukayshan werk weh Jeezas mi seh wahn hapm aal oava di werl, wahn lata peepl di yooz Baibl prinsiplz eena dehn laif. (Isaiah 2:2-4) Milyanz a peepl don laan how fi ga wahn hapi famili, ahn fi noh mek dehn jab er mateeryal tingz bee di moas impoatant ting eena dehn laif. Dehnya peepl di laan fi benifit dehnself now ahn dehn di geh fi bee di kaina peepl weh Gaad waahn fi bee paat a ih Kingdom.

Eevn doa Jeezas don di rool da hevn, hyooman govament stil di rool pahn ert. Bot Gaad don dairek Jeezas fi mek hihn “goh ahn ga vikchri oava ih enimi dehn.” (Psalm 110:2) Soon Jeezas wahn dischrai aala dehn wan weh di goh gens Gaad, ahn hihn wahn bring rileef fi dehn wan weh wilin fi obay Gaad.

Soon Gaad Kingdom wahn tek akshan ahn

• Geh rid a faals rilijan. Di Baibl kompyaa faals rilijan tu wahn prastichoot. Rilijan weh teech lai bowt Gaad ahn weh mek peepl laif haad noh wahn deh nohmoh. Wahn lata peepl wahn shak wen dat hapm.—Revilayshan 17:15, 16.

• Geh rid a hyooman roolaship. Gaad Kingdom wahn tek akshan ahn put wahn en tu aal hyooman roolaship.—Revilayshan 19:15, 17, 18.

• Geh rid a wikid peepl. Weh wahn hapm tu dehn wan weh chooz fi du weh bad ahn rifyooz fi obay Gaad? “Az fi di wikid, dehn wahn geh kot aaf fahn di ert.”—Proverbs 2:22.

• Geh rid a Saytan an ih deemonz. Saytan an ih deemonz wahn “kyaahn fool di nayshan dehn nohmoh.”—Revilayshan 20:3, 10.

Weh aala dis wahn meen fi peepl weh aksep Gaad Kingdom?

Wail Jeezas di rool da hevn az King, hihn wahn du wahn lat moa dan weh eni hyooman roola eva du pahn di ert. Hihn wahn ga di help a 144,000 anointid king weh wahn rool lang wid ahn. (Revilayshan 5:9, 10; 14:1, 3) Hihn wahn mek shoar dat Gaad perpos geh fulfil pahn di ert. Weh Gaad Kingdom wahn du fi peepl weh di liv pahn di ert?

• Geh rid a siknis ahn det. “Nobadi wahn seh: ‘Ah sik’” ahn “dehn noh wahn ded nohmoh.”—Isaiah 33:24; Revilayshan 21:4.

• Mek shoar dat evriting fain ahn peesful fi chroo. “Yu son dehn wahn ga lata pees,” ahn “dehn wahn sidong, eech wan a dehn anda dehn oan vain an anda dehn oan fig chree, ahn nobadi wahn ku fraitn dehn.”—Isaiah 54:13; Micah 4:4.

• Gi wi werk weh wi ku injai. “Di werk weh fi mee peepl dehn du wid dehn oan han, dehn wahn geh fi injai tu nohmoh nohmoh. Dehn noh wahn hafu werk haad fi notn.”—Isaiah 65:22, 23.

• Solv prablemz wid di envaiyament. “Di wildanes ahn di jrai lan wahn rijais, ahn di dezert wahn bee ful a jai an ih wahn blaasam laik di safron.”—Isaiah 35:1.

• Teech peepl weh dehn need fi du fi mek dehn ku liv fareva. “Ahn di way fi mek dehn liv wid Gaad fareva da fi mek dehn noa yoo, weh da di oanli chroo Gaad, ahn fi mek dehn noa Jeezas Krais, weh da di Wan weh yoo sen.”—Jan 17:3.

Gaad waahn yu injai dehndeh blesinz. (Isaiah 48:18) Di neks aatikl wahn eksplayn weh yu ku du now soh dat yu ku ga wahn wandaful fyoocha.