Jeezas mi seh: “Lata difrent nayshan ahn kingdom wahn waar gens wan anada. Lata big ertwayk wahn deh, ahn eena aal difrent plays peepl wahn di staav, ahn lata dizeez wahn deh.” (Look 21:10, 11) Aala di lain dehn pahn wahn finga mek wahn fingaprint, ahn da fingaprint ku aidentifai wahn persn. Saym way soh, aala dehnya ting weh di hapm tugeda da wahn klyaa sain, ahn da sain shoa wi dat “di taim soon kohn fi Gaad set op ih kingdom.” Yoo si aala dehndeh ting weh Jeezas mi taak bowt di hapm saym taim? Yoo si dehn di hapm aal oava di werl? Luk pahn di evidens.

1. WAAR

Eena 1914, wahn waar brok owt weh mi soh moch biga dan eni ada waar bifoa! Peepl weh stodi ahn rikaad hischri seh dat di yaa 1914 mi chaynj hyooman hischri bikaaz da mi di fers werl waar eva. Da mi joorin da waar peepl staat tu yooz waar tank, bom, masheen gon, paizn gyas, an ada dedli wepan laik dehndeh moa dan eva bifoa. Den di sekant werl waar mi kohn, ahn dat da wen dehn mi mek ahn yooz di fers atomik wepan dehn. Fahn sins 1914, hyoomanz di fait waar eena wan plays er di neks, ahn milyanz a peepl ded eena dehndeh waar.

2. ERTKWAYK

Evri yaa dehn ga bowt 100 ertkwayk weh big inof fi kaaz “seeryos damij,” akaadn tu di Britannica Academic. Ahn di United States Geological Survey seh dat “akaadn tu rekadz weh goh bak tu bowt di yaa 1900, wi ku ekspek bowt 16 big ertkwayk fi hapm evri yaa.” Som peepl tink dat wi noh ga moa ertkwayk, wi jos ga beta teknalaji fi mezha dehn now. Bot di faks shoa dat big ertkwayk di hapm aal oava di werl ahn dehn di kaaz moa sofarin ahn det dan eva bifoa.

 3. STAAVAYSHAN

Staavayshan di hapm aal oava di werl bikaaz a waar, koropshan, seeryos moni prablemz, peepl noh manij dehn faam prapa, er dehn noh pripyaa fi bad weda. Di World Food Programme’s “2018 Year in Review” seh: “Aal oava di werl, 821 milyan peepl goh hongri—124 milyan a dehn neva ga inof food.” Evri yaa, paat a di reezn wai bowt 3.1 milyan chiljren ded da bikaaz dehn noh ga inof helti food fi eet. Eena 2011, dis da-mi di kaaz a det fi nayli haaf a di chiljren weh ded rong di werl.

4. SIKNIS AHN DIZEEZ

Wahn World Health Organization poblikayshan seh: “Di 21st senchri don ga sohn seeryos dizeez weh spred aal oava di werl. Sohn dizeez weh mi kaman eena di paas, laik kolera, di blak playg ahn yelo feeva, kohn bak, ahn sohn nyoo wan kom owt tu, laik SARS, sertn kaina flooz weh spred aal oava di werl, MERS, Ibola ahn Zeeka.” Di laytis wan da di COVID-19 pandemik. Eevn doa saiyentis ahn dakta don laan wahn lat bowt dizeez, dehn stil kyaahn fain wahn kyoar fi aala dehn.

5. DI PREECHIN WERK WEH DI HAPM AAL OAVA DI WERL

Jeezas mi seh sohnting els mi wahn hapm az paat a da sain: “Di Gud Nyooz bowt di kingdom a hevn wahn geh preech oava di hoal werl soh dat aala di nayshan dehn ku yehr di chroot, ahn den di en wahn kohn.” (Machyu 24:14) Wail di werl di sofa wid lata seeryos prablemz, oava ayt milyan peepl fahn aal difrent konchri di preech di gud nyooz bowt Gaad Kingdom. Dehn di preech eena 240 konchri ahn teritori an eena oava 1,000 difrent langwij. Dis neva hapm eena aal hyooman hischri.

Evriting weh da paat a di sain weh Jeezas gi wi di hapm tudeh. Wai wi shuda pay main tu dat? Bikaaz Jeezas mi seh: “Wen unu si dehnya ting di hapm, unu wahn noa seh dat di taim soon kohn fi Gaad set op ih kingdom.”—Look 21:31.

Wen wi luk pahn di sain weh Jeezas mi gi wi, ahn kalkyulayt taim bays pahn Baibl prafesi, wi geh fi andastan dat Gaad set op fi hihn Kingdom da hevn eena 1914. a Dat da wen hihn mi mek fi hihn Son, Jeezas Krais, di King. (Psalm 2:2, 4, 6-9) Soon, Gaad Kingdom wahn rool di ert, an ih wahn geh rid a evri ada govament an ih wahn mek di ert wahn paradais fi mek peepl liv eena fareva.

Soon, di werdz a di pryaa weh Jeezas mi teech wi wahn kohn chroo: “Kohn kohn set op yu kingdom, ahn mek evribadi obay yu pahn ert jos laik how evribadi obay yu da hevn.” (Machyu 6:10) Bot da weh di Kingdom di du aal di wail sins ih staat rool eena 1914? Ahn weh wi ku luk faawod tu wen di Kingdom rool oava aal hyoomanz?