LUZIA LIMP PAN IH LEF FUT. Wen shee mi smaal, shee mi kech polio, wahn terabl dizeez weh atak di nervz eena di badi. Wen shee mi 16, wahn laydi weh ih yoostu werk fa tel ahn, “Gaad ponish yu ahn mek yu geh paralaiz bikaaz yu neva obeedyant ahn yu chreet yu ma bad.” Yaaz layta, Luzia stil memba how terabl dat mi mek shee feel.

WEN DAMARIS MI FAIN OWT DAT IH GA BRAYN KYANSA, fi shee pa mi aks ahn: “Weh yu gaahn du fi mek dis hapm tu yu? Yu mosi mi du sohnting reeli bad. Dat da wai Gaad di ponish yu.” Weh hihn mi tel Damaris mi hert shee reeli bad.

Fahn way bak, peepl bileev dat Gaad yooz siknis fi ponish peepl. Di buk Manners and Customs of Bible Lands seh dat peepl weh mi liv rong di saym taim laik Krais mi bileev dat “wen sohnbadi geh sik da bikaaz dehn er sohnbadi eena dehn faamli sin, ahn di siknis da ponishment fi da sin.” Di buk Medieval Medicine and the Plague seh dat honjridz a yaaz afta Krais “sohn peepl mi bileev dat Gaad kaaz difrent playg fi ponish dehn fi dehn sinz.” Soh yu tink dat Gaad mi-di joj aala dehn peepl da Europe hoo mi ded fahn di blak playg eena di 14th senchri az wikid peepl? Er da mi jos wahn bakteerya weh mi kaaz da playg, laik weh saiyentis mi fain owt laytaraan? Bot sohn peepl mait wanda if Gaad reeli yooz siknis fi mek peepl sofa fi dehn sinz. *

TINK BOWT DIS: Wai Jeezas wuda kyoar peepl weh sik if dehn siknis ahn sofarin da-mi wahn ponishment fahn Gaad? Dat wuda goh gens Gaad raichosnis ahn jostis. (Machyu 4:23, 24) Ahn Jeezas wuda neva goh gens eniting weh Gaad du. Hihn mi seh: “Ai aalwayz du di tingz weh pleez hihn” an, “Ai du egzakli weh di Faada koman mi fi du.”—Jan 8:29; 14:31.

Di Baibl mek it klyaa dat Jehoava Gaad “aalwayz raichos ahn fyaa.” (Deuteronomy 32:4) Fi egzampl, Gaad wuda neva kaaz wahn playn fi krash ahn kil honjridz a inosent peepl jos bikaaz ih mi waahn ponish sohnbadi weh mi deh pahn da playn! Aybraham, wan a Gaad faytful servant, mi seh dat bikaaz Gaad raichos hihn wuda neva “dischrai di gud peepl lang wid di wikid peepl.” Hihn mi seh: ‘Ih impasabl fi tink dat Gaad wuda du sohnting laik dat!ʼ (Genesis 18:23, 25) Di Baibl aalso seh dat “Gaad noh du notn wikid”; hihn noh “du notn rang.”—Job 34:10-12.

Wen wi sofa da noh bikaaz Gaad di ponish wi fi wi sin dehn. Jeezas ihself mi mek dat veri klyaa wen hihn an ih disaipl dehn mi si wahn man weh mi baan blain. “Ih disaipl dehn aks ahn: ‘Rabai, da wai dis man baan blain? Da sayka weh hihn sin, er da ih payrents mi sin?ʼ Jeezas tel dehn: ‘No, hihn noh blain bikaaz hihn sin ner bikaaz ih payrents mi sin, bot weh hapm tu hihn wahn gi peepl wahn chaans fi si di powa a Gaad.ʼ”—Jan 9:1-3.

Lata peepl eena Jeezas taim mi bileev dat Gaad yooz bad tingz fi ponish peepl fi dehn sinz. Soh Jeezas disaipl dehn mosi mi sopraiz wen hihn tel dehn dat dis man neva baan blain sayka eni sin weh hihn er ih payrents komit. Ahn Jeezas neva jos kyoar di man blainis, bot ih mi aalso shoa evribadi dat Gaad noh kaaz sofarin fi ponish peepl. (Jan 9:6, 7) Ih komfertin fi peepl weh sofa seeryos helt prablemz tudeh fi noa dat da noh Gaad kaaz dehn sofarin.

Di Skripchaz pramis wi

• “Nobadi kyaahn tes Gaad wid eevl tingz, ahn hihn noh tes nobadi needa.” (JAYMZ 1:13) Soon, Gaad wahn geh rid a aala di “eevl tingz” weh hyoomanz di sofa fi honjridz ahn honjridz a yaaz, inkloodin siknis, payn, ahn det.

• Jeezas Krais mi “kyoar di wan dehn weh mi sik.” (MACHYU 8:16) Wen Gaad Son mi kyoar aala di sik peepl weh kohn tu ahn, ih mi shoa weh Gaad Kingdom wahn du fi evribadi aal oava di werl.

• “Hihn [Gaad] wahn waip weh dehn tyaaz fahn dehn aiy, nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis. Di tingz weh yoostu hapm noh wahn egzis nohmoh.”—REVILAYSHAN 21:3-5.

Soh da wai hyoomanz sofa soh moch? Peepl di wanda bowt dat fi wahn lang taim. If da noh Gaad kaaz it, den hoo rispansabl? Di neks aatikl wahn ansa dehndeh kweschan.