Di fers owa afta wahn baybi baan reeli impoatant. Wai? Bikaaz wahn ma weh spen taim wid ih baybi joorin dis impoatant taim help ih baybi fi groa helti ahn fi machoar prapali. *

Weh mek wahn ma waahn tek kayr a ih nyoobaan baybi? Eena The Journal of Perinatal Education, wahn profesa weh naym Jannette Crenshaw seh dat wahn ma projoos wahn lata di hormoan weh naym oksitoasin afta di baybi baan. Ahn wail di ma di spen taim di toch, luk pan, ahn bresfeed ih nyoobaan baybi, dat ster op feelinz weh mek shee waahn tek kayr a ih baybi. Ahn wahn ma projoos wahn nada kaina hormoan joorin dis taim weh help ahn fi rispan tu ih baybi, an ih mek ih rilayshanship wid ih baybi schranga. Wai dat impoatant?

Wi Kriyayta, Jehoava Gaad, * da di wan weh kriyayt dis speshal kaina rilayshanship weh wahn ma ga wid ih baybi. King Dayvid seh dat Gaad da di wan weh bring ahn “owt fan ih ma woom” an Ih aalso mek ih feel sayf wen ih ma mi-di hoal ahn. Hihn mi pray: “Yoo tek kayr a mi fan Ah baan, fan Ah deh eena mi ma woom, yoo da mi Gaad.”—Psalm 22:9, 10.

TINK BOWT DIS: If Gaad mi set op dis komplikaytid sistem fi mek shoar dat wahn ma aalwayz lov ahn pay atenshan tu ih baybi ahn giv ih baybi weh ih need, yu noh tink ih mek sens dat Gaad wahn pay atenshan tu eech an evri wan a wi, “wee weh da Gaad pikni”?—Aks 17:29.

Jeezas Krais noa di Kriyayta beta dan eni wan a wi, ahn hihn seh: “Too lee berd sel fi jos wan smaal koin, noh chroo? Ahn stilyet, non a dehn wahn jrap da grong widowt unu Faada noa bowt it. An az fi unu, hihn eevn noa di nomba a hyaa weh deh pahn unu hed. Soh noh wori bowt notn; unu wert moa dan aala dehnya lee berd.”—Machyu 10:29-31.

Moas a wi noh pay atenshan tu evri smaal berd weh wi si, ahn moch les noatis wen wan jrap pahn di grong. Bot wi hevnli Faada noatis eech wan a dehn! Ahn tu hihn, wahn hyooman wert moa dan eni amonk a berd. Soh ih klyaa fi si wat da di lesn. Yu noh fi wori if Gaad noatis yu. In fak, hihn reeli inchrestid eena yoo!

 Di Skripchaz pramis wi

• “Jehoava si evriting, hihn si hoo du gud ahn hoo du bad.”—PROVERBS 15:3.

• “Kaaz Jehoava si di raichos wan dehn, an ih hyaa wen dehn di poar owt dehn haat eena pryaaz tu hihn.”—PSALM 34:15.

• “Ah wahn rijais wid aala mi haat wen yu shoa mi laayal lov, bikaaz yu si how Ah sofa; yu noa mi payn.”—PSALM 31:7.

Yu tink ih mek wahn difrens eena wi laif if wi noa dat Gaad reeli inchrestid eena wi an dat ih di wach oava wi? Af koars! Dis da weh Hannah, * fahn England, seh:

“Wahn lata taim, Ah mi feel laik Jehoava neva lov mi ahn dat ih neva ansa mi pryaaz. Ah mi tink da mi bikaaz Ah neva ga inof fayt. Ah mi feel laik hihn mi-di ponish mi er ignoar mi bikaaz Ai neva impoatant. Ah mi feel laik Gaad neva kay bowt mi.”

Bot now, Hannah noh ga no dowt da Jehoava di pay atenshan tu ahn, an dat ih lov ahn. Weh mi mek shee chaynj di way ih feel? Shee seh: “Dis chaynj hapm lee bit bai lee bit. Sohn yaaz abak, Ah memba wahn Baibl taak bowt Jeezas ransom sakrifais weh mi reeli toch mi haat, an ih gi mi kanfidens dat Jehoava lov mi. Ahn wen hihn ansa mi pryaaz, Ah staat tu krai anaal bikaaz Ah riyalaiz dat Jehoava lov mi fi chroo. Wen Ah stodi di Baibl an Ah goh da mi Kristyan meetin dehn, Ah laan moa bowt Jehoava, ih persnaliti, ahn di way ih feel bowt wi. Now, ih klyaa fi mek Ah si dat Jehoava lov ahn sopoat wi, ahn dat ih waahn luk afta eech an evri wan a wi.”

Weh Hannah seh reeli inkorijin. Bot how yu ku bee shoar dat Gaad andastan ahn memba di way yoo feel? Di neks aatikl wahn diskos da kweschan.