Yu tink ih nachral fi mek wi ga dehnya kaina dizaiyaz? Af koars! Di Baibl tel wi dat Gaad mi put da dizaiya eena wi haat. (Ecclesiastes 3:11) Di Baibl aalso seh dat “Gaad da lov.” (1 Jan 4:8) Yu tink ih mek sens dat wahn lovin Gaad wuda put di dizaiya fi liv fareva eena wi haat if ih noh pasabl?

Nobadi noh waahn ded. Az a mata a fak, di Baibl kaal det wahn “enimi.” (1 Korintyanz 15:26) Som peepl ded yong, an adaz liv lang, bot non a wi kyaahn ron weh fahn det. Wahn lata peepl feel frayd wen dehn tink bowt det. Yu tink det wahn eva geh dischrai? Dat eevn pasabl?

Yoo wuda bee sopraiz fi laan dat da neva Gaad perpos fi mek hyoomanz ded? Di Baibl buk a Genesis gi wi proof dat Gaad mi waahn hyoomanz fi liv fareva pahn ert. Jehoava Gaad mi kriyayt di ert wid evriting weh hyoomanz need fi liv wahn hapi laif. Den hihn mi kriyayt di fos man, Adam, an ih put ahn eena wahn paradais; wahn gyaadn eena Eedn. Afta dat, “Gaad mi si evriting weh ih mi mek, ahn wen ih luk pan it, ih mi veri gud!”—Genesis 1:26, 31.

 Gaad mi kriyayt Adam perfek. (Deuteronomy 32:4) Adam waif, Eev, mi aalso ga wahn perfek main ahn badi. Jehoava mi tel dehn: “Unu mos ga chiljren ahn ful op di ert ahn koltivayt it. Unu mos ga kanchroal oava di fish dehn eena di see ahn di berd dehn weh di flai eena di skai an aala di animal dehn weh di moov pahn di grong.”—Genesis 1:28.

Ih wuda mi tek taim fi Adam ahn Eev ful di ert wid dehn chiljren. Eev wuda ga chiljren ahn dehn chiljren wuda mi ga chiljren til di hoal ert get ful, laik weh Gaad mi waahn. (Isaiah 45:18) Yu tink Jehoava wuda mi gi Adam ahn Eev da hoap fi luk faawod tu if Hihn mi onli mek dehn fi liv fi wahn shaat taim; fi si dehn chiljren ahn maybi dehn granchiljren ahn den ded?

Tink aalso bowt di kanchroal weh dehn mi fi gat oava di animalz. Pahn tap a dat, Jehoava mi aalso tel Adam fi naym aala di animal dehn, ahn dat mi wahn tek sohn taim fi du. (Genesis 2:19) Bot fi ga kanchroal oava di animalz wuda mi meen dat Adam mi wahn haftu laan bowt dehn an aalso andastan how fi tek kayr a dehn. Dat mi wahn tek far moa taim fi du.

Soh di inschrokshanz weh Gaad mi gi tu Adam ahn Eev fi ga kanchroal oava di animalz shoa dat Hihn mi mek di fos kopl fi liv fi wahn lang taim. Az a mata a fak, Adam mi did liv fi wahn lang taim.

Di Baibl shoa wi dat hyoomanz doz liv moch langa dan weh wee liv tudeh. Ih seh: “Adam mi liv fi 930 yaaz.” Den, ih kantinyu fi lis aaf siks ada man hoo mi liv fi moa dan 900 yaaz! Dehn da-mi Set, Eenosh, Keenan, Jayred, Metoosela, ahn Noawa. Aala dehn mi liv bifoa di Flod bak eena di taim a Noawa, ahn Noawa mi liv fi 600 yaaz bifoa di Flod mi kohn. (Genesis 5:5-27; 7:6; 9:29) Wai dehn mi liv fi soh lang?

Aala dehn man mi baan noh tu lang afta di taim wen Adam ahn Eev mi perfek. Dat da praabli di reezn wai dehn mi liv fi soh lang. Bot weh perfekshan ga fi du wid how lang wi liv? Ahn how det wahn geh dischrai? Fi fain di ansa, fos wi need fi andastan wai wi geh oal ahn ded.