EEVN doa Adam ahn Eev mi disobay ahn mek aala wi baan eena sin ahn det, ih stil noh chaynj Gaad perpos fi di hyooman famili. Aal chroo di Baibl, Gaad seh oava an oava dat fi hihn perpos fi hyoomanz noh chaynj.

• “Di raichos wan dehn wahn inherit di ert, ahn dehn wahn liv fareva pan it.”​—Psalm 37:29.

• “Hihn wahn dischrai det fareva, ahn di Sovrin Laad Jehoava wahn waip weh aala dehn aiywaata fahn dehn fays.”​—Isaiah 25:8.

• “Di laas enimi weh Gaad wahn dischrai wahn bee det.”​—1 Korintyanz 15:26.

• “Dehn noh wahn ded nohmoh ner sofa, ner krai ner feel payn nohmoh.”​—Revilayshan 21:4.

How Gaad wahn “dischrai det fareva?” Di Baibl seh dat “di raichos wan dehn . . . wahn liv fareva.” Bot ih aalso seh dat “no raichos persn deh pahn di ert hoo aalwayz du gud ahn neva sin.” (Ecclesiastes 7:20) Soh yu tink dis meenz dat Gaad wahn chaynj ih standadz jos soh dat imperfek hyoomanz ku liv fareva? No! Hihn wahn neva du dat bikaaz “Gaad [kyaahn] tel no lai.” (Taitos 1:2) Soh den, weh Gaad wahn du fi fulfil ih perpos fi hyoomanz?

Owta lov, Jehoava Gaad pay wahn ransom fi sayv hyoomanz fahn det. Wahn ransom da di egzak prais weh kova, er pay fi di kaas a sohnting. Sins aal hyoomanz da sinaz ahn geh sentens tu det, di Baibl seh: “Non a dehn ku eva bai bak wahn brada er pay Gaad wahn ransom far ahn, (di ransom prais fi dehn laif soh hai dat ih aalwayz impasabl fi reech).”—Psalm 49:7, 8.

Wen wahn imperfek hyooman ded, ih onli ku pay di prais fi ih oan sin dehn; ih kyaahn bai bak perfekshan, ner ih kyaahn pay fi enibadi els sin. (Roamanz 6:7) Wi mi need sombadi weh perfek ahn weh neva ga no sin fi aafa op ih laif, noh fi ih oan sin, bot fi fi wee wan.—Heebrooz 10:1-4.

Dat da egzakli weh Gaad mi mek planz fi du. Hihn mi sen ih Son, Jeezas, fahn hevn fi mek ih baan pahn ert az wahn perfek hyooman widowt sin. (1 Peeta 2:22) Jeezas mi seh dat hihn kohn “fi giv op fi hihn laif soh dat lat moa peepl ku geh free fahn dehn sin dehn.” (Maak 10:45) Hihn mi ded fi pay fi fi wee sin dehn ahn fi free wi fahn det soh dat wi ku ga laif.—Jan 3:16.

Laik weh di Baibl mi prafesai, tudeh, wi “ga sohn terabl taimz,” weh proov dat wi di liv eena “di laas dayz” a dis wikid sistem a tingz. (2 Timoti 3:1) Di laas dayz wahn finish “pahn di Day wen Gaad . . . joj di peepl weh noh waahn du weh ih seh, ahn ih wahn dischrai dehn.” (2 Peeta 3:3, 7) Bot peepl weh lov Gaad wahn servaiv da dischrokshan ahn wahn geh bles wid evalastin laif.—Machyu 25:46.

Wahn lata ada peepl wahn aalso ga di apachooniti fi geh evalastin laif wen dehn geh rezorek. Jeezas mi rezorek sombadi wen ih mi vizit di siti a Nayn. Wahn wido onli son mi ded, ahn Jeezas “haat gaahn owt tu ahn,” soh ih rezorek di wido son. (Look 7:11-15) Aalso, di apasl Paal mi seh: “Ai ga fi mee hoap ahn kanfidens eena Gaad . . . dat wan day Gaad wahn rayz op di raichos ahn di [wan  dehn weh noh raichos].” Dis hoap da wahn speshal way how Gaad shoa ih lov fi hyoomanz.—Aks 24:15.

Bilyanz ku luk faawod fi liv fareva. Di Baibl seh: “Di raichos wan dehn wahn inherit di ert, ahn dehn wahn liv fareva pan it.” (Psalm 37:29) Wen dat hapm, dehn wahn bee veri hapi ahn feel inkorij fi si di komfertin werdz weh di apasl Paal mi rait bowt 2,000 yaaz agoa geh fulfil: “Det, wehpaa yu vikchri deh? Det, wehpaa yu powa deh fi hert mi?” (1 Korintyanz 15:55) Wi powaful enimi det wahn don geh dischrai!