Gaad mi pramis Aybraham dat Hihn mi wahn bles “aala di nayshanz a di ert” chroo wan a ih disendant dehn. (Genesis 22:18) Da hoo Gaad mi-di taak bowt?

Moa dan 2,000 yaaz agoa, Gaad mi gi Jeezas, hoo da-mi wan a Aybraham disendant, di powa fi du sohn powaful mirakl. Dehndeh mirakl mi shoa dat Gaad mi wahn yooz Jeezas fi bles aala di nayshanz a di ert.—Galayshanz 3:14.

Di miraklz weh Jeezas mi du help wi fi andastan dat hihn da di wan weh Gaad pik fi bles hyoomanz. Dehndeh mirakl aalso shoa wi how Gaad wahn yooz hihn fi bles wi fareva. Noatis how di mirakl dehn weh Jeezas mi du help wi fi laan bowt som a ih byootiful wayz.

Jeezas mi kain—ih mi kyoar peepl weh mi sik.

Wahn taim, wahn man weh mi ga leprosi mi bayg Jeezas fi heel ahn. Jeezas mi toch ahn, an tel ahn: “Ah waahn heel yu. Yu heel!” Rait away, di man geh heel ahn di leprosi disapyaa.—Maak 1:40-42.

Jeezas mi jenaros—ih mi feed peepl weh mi hongri.

Jeezas neva laik si wen peepl mi hongri ahn neva ga food fi eet. Sevral taimz, hihn mi du wahn mirakl ahn feed towznz a peepl wid jos wahn lee bit a bred ahn fish. (Machyu 14:17-21; 15:32-38) Evribadi mi eet til dehn mi satisfai, ahn stilyet wahn lata lefoavaz mi deh.

Jeezas mi shoa kompashan—ih mi rezorek wahn fyoo peepl weh mi ded.

Wahn day, Jeezas mi meet wahn wido ahn fi shee onli son mi ded. Hihn “mi feel sari” fi di wido kaaz shee neva ga nobadi fi tek kayr a ahn, soh hihn rayz op bak ih son fahn di ded.—Look 7:12-15.