Wahn lata peepl rong di werl noh ga inof food ahn wahn plays fi liv. An adaz jos need sombadi fi gi dehn hoap fi di fyoocha. How Gaad wahn bles wi wen wi du aal weh wi kud fi help adaz?

“Di persn weh shoa kainis tu sombadi weh poa di len tu Jehoava, ahn Hihn wahn pay ahn bak fi weh ih du.”—PROVERBS 19:17.

Jeezas mi tel wahn stoari bowt wahn man weh sohn teef mi atak ahn weh dehn mi lef pahn di roadsaid haaf-ded. (Look 10:29-37) Wahn kain Samaritan man mi stap ahn tek kayr a dis man kaaz ih mi reeli need help, eevn doa hihn da-mi fahn wahn difrent rays.

Dis kain Samaritan mi kleen op di man kot ahn brooz dehn ahn put bandij pan ahn. Pahn tap a dat, ih kehr ahn da wahn in ahn pay di oana fi tek kayr a ahn. Soh di Samaritan mi gi komfert tu di man an eez ih sofarin.

Weh wi ku laan fahn dis stoari? Jeezas mi teech wi dat wi shuda du wateva wi kud fi help adaz. (Proverbs 14:31) Gaad pramis wi chroo ih Werd di Baibl dat peepl noh wahn sofa ner bee poa nohmoh. Wi mait wanda, doh, how Gaad wahn du dat, ahn wen? Eena di neks aatikl wi wahn diskos som a di blesinz weh wi lovin Kriyayta wahn gi wi eena di fyoocha.