How Gaad Wahn Bles di Wan Dehn Weh Obay Hihn
Di prafit Moaziz mi seh dat if wi obay Gaad komanment dehn, Hihn wahn bles wi. (Deuteronomy 10:13; 11:27) Wen wi laan bowt di kaina wayz weh Gaad gat, wi waahn obay ahn eevn moa, ahn wi wudn du eniting fi mek hihn feel sad. Soh wi obay Gaad bikaaz wi lov ahn, noh bikaaz wi frayd dat hihn wahn ponish wi. Di Baibl seh: “Ahn fi lov Gaad meenz dat wi wahn obay fi hihn komanment dehn, ahn fi hihn komanment dehn noh haad fi obay.”—1 Jan 5:3.
Bot how Gaad bles wi wen wi obay ahn? Mek wi diskos too wayz.
1. WEN WI OBAY GAAD, WI WAHN BEE WAIZ
Di Baibl seh: “Ai, Jehoava, da yu Gaad, di Wan weh di teech yu fi yu oan gud, di Wan weh di gaid yu eena di way how yu shuda waak.”—ISAIAH 48:17.
Jehoava Gaad, wi Kriyayta, noa wi ahn gi wi weh wi need fi gaid wi eena laif. If wi waahn fi hihn teechinz help wi mek waiz disizhanz, wi need fi laan weh Gaad waahn wi du fan ih Werd ahn den du it.
2. WEN WI OBAY GAAD, WI WAHN BEE HAPI
Di Baibl seh: “Gaad wahn bles dehn wan weh lisn tu hihn ahn du weh ih seh!” —LOOK 11:28.
Milyanz a peepl tudeh hapi bikaaz dehn obay Gaad werd. Fi egzampl, dehn mi ga wahn man da Spain weh mi eezi fi geh beks, an ih mi chreet adaz eena wahn kruwil way, inkloodin ih waif. Wahn day hihn mi reed weh di Baibl seh bowt Joazef, di son a Jaykop, hoo da-mi wahn kaam ahn jentl persn. Joazef breda dehn mi sel hihn az wahn slayv ahn den ih mi en op da jayl fi sohnting weh ih neva du. Bot eevn soh, ih mi kip wahn kaam ahn jentl ahn peesabl atichood, an ih mi wilin fi fergiv adaz. (Genesis, chapta 37-45) Di man fahn Spain mi seh: “Joazef egzampl mi help mi fi bee wahn jentl ahn kaam persn weh kain ahn fi ga self-kanchroal. Bikaaz a dat, now Ah liv wahn hapi laif.”
Di Baibl gat een moa advais pahn how wi shuda chreet adaz. Wi wahn diskos moa bowt dis eena di neks aatikl.
