Gaad gi wi wahn speshal gif, ahn da gif da pryaa. Wen wi pray tu Gaad wi ku tel ahn how wi feel. Di saamis Dayvid mi pray seh: “Oa Gaad, di Wan weh hyaa wi pryaaz, aal kaina peepl wahn kohn tu yoo.” (Psalms 65:2) Bot how wi ku pray soh dat Gaad wahn hyaa wi ahn bles wi?

Wen wi seh wi persnal pryaaz, wi ku “poar owt wi haat tu [Gaad]” ahn tel hihn how wi reeli di feel. (Psalms 62:8) Gaad lov dehndeh kaina pryaaz.

Eevn doa Gaad ga lata taitl, ih onli ga wan persnal naym. Hihn seh: “Ai da Jehoava. Dat da mai naym.” (Isaiah 42:8) Di naym Jehoava deh eena di Baibl 7,000 taimz. Wahn lata di prafit dehn mi yooz Gaad persnal naym wen dehn mi pray tu ahn. Aybraham mi seh: ‘Jehoava, pleez mek Ah kantinyu taak tu yu.ʼ (Genesis 18:30) Wi shuda aalso yooz Gaad naym, Jehoava, wen wi pray tu ahn.

Gaad ku andastan weh wi tink ahn feel noh mata weh langwij wi taak. Di Baibl tel wi: “Gaad chreet evribadi di saym way. Ahn hihn aksep enibadi weh fyaa Gaad ahn du weh rait, noh mata weh nayshan dehn kohn fram.”—Aks 10:34, 35.

Bot wi need fi du moa dan jos pray if wi waahn Gaad bles wi. Eena di neks fyoo aatikl, wi wahn laan weh wi need fi du.