Eva sins Gaad mek hyoomanz, hihn mi kamyoonikayt wid dehn chroo ih aynjel ahn prafit dehn. Pahn tap a dat, Gaad mi chooz sohn man fi rait dong ih mesij an ih pramis dehn. Ahn dehnya pramis wahn gi wi lata hapinis eena di fyoocha. Soh wehpaat wi ku reed bowt dehndeh pramis tudeh?

Wi ku fain owt wat da Gaad mesij fi wee eena di Baibl. (2 Timoti 3:16) How Gaad mi yooz ih prafit dehn fi rait ih mesij? (2 Peeta 1:21) Gaad put ih taats eena di main a di man dehn weh mi rait di Baibl. Da jos laik if wahn baas wuda aks wahn sekiteri fi rait wahn leta far ahn; wi noa dat di leta da noh fahn di sekiteri bot da fahn di baas. Saym way, eevn doa Gaad mi yooz sohn man fi rait ih mesij, di Baibl kohn fahn hihn.

Gaad mesij weh deh eena di Baibl reeli impoatant, ahn hihn waahn evribadi fi reed it an andastan it. Tudeh, da mesij avaylabl tu “peepl fahn evri nayshan ahn chraib, ahn tu peepl fahn difrent rays, ahn tu peepl weh taak aal difrent kaina langwij.” (Revilayshan 14:6) Di hoal Baibl er paat a di Baibl avaylabl eena moa dan 3,000 langwij, ahn no ada buk deh eena soh moch langwij tudeh. Dis da proof a Gaad blesin.