Wi Laan Bowt Gaad Chroo Ih Prafit Dehn
Eena di paas, Gaad mi yooz ih prafit dehn fi gi sohn impoatant mesij tu peepl. Yu tink dehnya mesij ku shoa wi how fi geh blesinz fahn Gaad? Yes, dehn kud. Mek wi si weh wi ku laan fahn chree faytful prafit.
AYBRAHAM
Gaad noh shoa fayvritizm, ahn hihn waahn bles evribadi.
Gaad mi pramis di prafit Aybraham dat ‘aala di famili weh di liv pahn di ert wahn geh wahn blesin bikaaz a hihn.ʼ—Genesis 12:3.
Weh wi ku laan? Gaad lov wi wahn lat, ahn hihn waahn bles evri famili weh obay hihn.
MOAZIZ
Gaad da wahn mersiful Gaad ahn hihn wahn bles enibadi weh mek di efoat fi noa hihn.
Gaad mi gi di prafit Moaziz di powa fi du sohn wandaful mirakl. Ahn stilyet, Moaziz mi pray an aks Gaad: “Teech mi yu wayz, soh dat Ah ku noa yu ahn kantinyu fi mek yu hapi.” (Exodus 33:13) Gaad mi hapi wid weh Moaziz mi aks fa, soh ih bles ahn wid moa nalij ahn help ahn fi andastan fi Hihn wayz ahn weh kaina persn Hihn. Fi egzampl, Moaziz mi laan dat di Kriyayta da “wahn mersiful ahn kain Gaad.”—Exodus 34:6, 7.
Weh wi ku laan? Gaad waahn bles aala wi—man, uman, ahn pikni—bot wi haftu werk haad fi geh fi noa hihn beta. Eena fi hihn werd di Baibl, hihn teech wi how fi wership ahn. Ih aalso tel wi how ih feel bowt wi ahn dat ih wahn bles wi.
JEEZAS
Jeezas mi kain an ih mi kyoar aal kaina siknis
Wi ku geh blesinz fahn Gaad if wi laan bowt Jeezas ahn bowt weh hihn mi du ahn teech.
Wi ku laan wahn lata tingz fahn di Baibl bowt Jeezas laif ahn bowt weh ih yoostu teech. Gaad mi gi Jeezas di powa fi du sohn powaful mirakl. Fi egzampl, ih mi kyoar peepl weh mi blain, weh kudn hyaa, ahn weh mi kripl. Ih mi eevn rayz op bak sohn peepl weh mi ded. Di mirakl dehn weh Jeezas mi du shoa wi how Gaad wahn bles hyoomanz eena di fyoocha. Ih tel wi weh wi need fi du fi injai dehndeh blesin; ih mi seh: “Ahn di wan dehn weh wahn get evalastin laif need fi get fi noa yoo, di onli chroo Gaad, ahn di wan weh yu sen, Jeezas Krais.”—Jan 17:3.
Jeezas da-mi wahn kain ahn lovin persn. Wahn lata peepl—man an uman, yong an oal—yoostu laik deh rong ahn. Soh dehn mi aksep ih invitayshan: “Laan fahn mi, kaaz Ai kain ahn hombl, an unu wahn fain res fi unu soal.” (Machyu 11:29) Bak den, som peepl neva yoostu rispek uman, bot Jeezas mi difrent; hihn mi chreet dehn wid kainis ahn rispek.
Weh wi ku laan? Jeezas mi ga lata lov fi peepl, an ih mi set wahn byootiful egzampl a how wi shuda chreet wan anada.
JEEZAS DA NOH GAAD
Di Baibl teech wi dat “onli wan Gaad deh” ahn dat Jeezas Krais da-mi Gaad mesinja. (1 Korintyanz 8:6) Jeezas mi seh playn-wan dat Gaad moa powaful dan hihn ahn dat Gaad mi sen ahn tu di ert.—Jan 11:41, 42; 14:28. *
^ párr. 17 Fi laan moa bowt Jeezas Krais, pleez si lesn 4 eena di Gud Nyooz Fahn Gaad broashoar weh aalso avaylabl onlain da www.pr418.com/bzj.
