Yoo ku imajin weh laif wuda bee laik widowt di son? Di son gi di chree dehn weh dehn need fi groa leef ahn flowaz, ahn fi gi froots ahn seed. Di son aalso help di chree dehn fi jraa op waata fahn di grong chroo di root dehn. Den di waata goh tu di leef dehn ahn den intu di ayaa az waata vaypa.

Rayn da wahn preshos gif fahn Gaad weh help di ert fi projoos food fi mek wi eet. Gaad gi wi rayn fahn hevn ahn difrent froots akaadn tu dehn seezn. Hihn provaid food fi mek wi eet til wi satisfai ahn hapi.

Wahn lata payrents wori if dehn ku provaid inof food ahn kloaz fi dehn famili. Noatis weh di Skripchaz seh: “Unu stap ahn noatis di berd dehn weh flai eena di skai; dehn noh plaant no seed ner reep ner stoar op no food, yet unu hevnli Faada feed aala dehn. Unu noh tink dat unu wert moa dan dehndeh berd?”—Machyu 6:25, 26.

Di Skripchaz aalso seh: “Laan fahn di lili dehn weh di groa eena di feel . . . ; bot Ah di tel unu dat noh eevn King Salaman wid aala fi hihn fansi kloaz mi luk az byootiful az dehnya lili. Now if Gaad put aan byootiful kloaz pahn di plaants weh groa eena di feel . . . , unu noh tink dat ih wahn giv unu kloaz fi wayr tu?”—Machyu 6:28-30.

Sins Gaad ku gi wi food ahn kloaz, den fi shoar hihn ku gi wi di ada tingz weh wi need eena laif. If wi chrai fi du di wil a Gaad, hihn ku bles wi haad werk fi groa food er hihn ku help wi fain wahn jab fi bai di tingz weh wi need.—Machyu 6:32, 33.

Soh den, wen wi tink bowt di son, di rayn, di berd dehn, ahn di flowaz, wi ga lata reezn fi lov Gaad. Eena di neks aatikl wi wahn diskos how wi Kriyayta mi kamyoonikayt wid hyoomanz eena di paas an eena fi wee taim.