Lata peepl tink dat adaz weh ga wahn gud ejukayshan ahn weh rich, fi shoar wahn ga wahn beta fyoocha. Dehn bileev dat if sohnbadi goh da yooniversiti ih ku help da persn fi bee wahn beta werka, wahn beta famili memba, ahn wahn beta sitizn. Dehn praabli feel dat if dehn ga wahn gud ejukayshan, dehn wahn ga wahn beta jab weh pay gud ahn dat peepl weh mek wahn lata moni wahn bee hapi.

Noatis weh Zhang Chen, hoo da fahn China, seh: “Ai yoostu bileev dat Ah mi need fi ga wahn yooniversiti ejukayshan fi mek Ah stap bee poa. An Ah mi aalso bileev dat if Ah ga wahn gud jab weh pay gud, ih wuda mek Ah ga wahn hapi ahn beta laif eena di fyoocha.”

Fi ga wahn beta laif, wahn lata peepl prifaa fi goh da sohn faymos yooniversiti eena difrent konchriz. Dis da-mi wahn kaman ting fi du til COVID-19 mi mek it impasabl fi mek peepl chravl. Bowt ten yaaz agoa, wahn aaganaizayshan mi du wahn risaach ahn dehn mi ripoat dat moa dan haaf a di styoodents weh mi stodi da wahn nada konchri mi kohn fahn Asia.

Payrents yoozhwali werk veri haad soh dat dehn chiljren ku stodi da wahn yooniversiti eena wahn neks konchri. Qixiang, fahn Taiwan, seh: “Mai payrents neva ga lata moni, bot dehn mi sen aal foa a wi da kalij da di United States.” Fi pay fi fi dehn ejukayshan, fi hihn payrents mi haftu baro wahn lata moni, ahn dat hapm tu wahn lata ada famili.

Da chroo, ejukayshan ku mek yu laif beta eena sohn wayz, bot ih noh aalwayz bring di rizolts weh styoodents ekspek. Fi egzampl, afta wahn lata yaaz di werk haad ahn di baro wahn lata moni fi pay fi skool, lata peepl kyaahn fain di jab weh dehn waahn. Wahn ripoat weh Rachel Mui du eena di Business Times seh: “Moa ahn moa styoodents weh grajuayt fahn wahn yooniversiti kyaahn fain wahn jab.” Jianjie, wahn man fahn Taiwan weh ga wahn veri gud ejukayshan, seh: “Wahn lata peepl kyaahn fain di jab weh dehn mi gaahn stodi fa.”

Peepl weh doo geh di jab weh dehn gaahn stodi fa fain owt dat dehn laif neva tern owt di way dehn mi waahn. Afta Niran, hoo da fahn Thailand, mi kohn bak fahn wahn yooniversiti da di United Kingdom, hihn mi fain wahn jab weh ih mi waahn; ih seh: “Jos laik weh Ah mi-di ekspek, di ejukayshan weh Ah mi geh mi help mi fi geh wahn jab wid gud pay. Bot, dat mi meen dat Ah mi wahn haftu werk wahn lata owaz. Afta sohn taim, di kompani weh Ah mi-di werk fa mi faiya moas a ih werkaz, inkloodin mee. Dat da wen Ah riyalaiz dat no jab ku pramis yu wahn beta fyoocha.”

Eevn peepl weh ga wahn lata moni ahn weh luk laik dehn gat it gud stil ga famili prablemz, helt prablemz, ahn wori bowt moni. Katsutoshi, fahn Japan, seh: “Ai mi ga wahn lata moni, bot Ah stil neva hapi bikaaz adaz mi jelos mi, ahn dehn mi chreet mi bad.” Lam, wahn uman weh liv da Vietnam, seh: “Lata peepl chrai fi geh wahn lata moni bikaaz dehn tink dat dat wahn mek dehn laif beta, bot dehn en op di wori moa ahn dehn eevn geh sik ahn feel dipres.”

Jos laik Franklin, wahn lata peepl kohn fi riyalaiz dat dehn ga moa impoatant tingz eena laif dan fi goh afta wahn gud ejukayshan ahn richiz. Rada dan foakos pahn mateeryal tingz, som peepl luk fi wahn beta fyoocha di chrai bee wahn gud persn ahn di chrai du gud fi adaz. Yu tink if wi du dat wi wahn ga wahn beta fyoocha? Di neks aatikl wahn ansa da kweschan.