Bot lata peepl dowt dat dehn wahn geh di fyoocha weh dehn dizaiya. Tingz laik di COVID-19 pandemik hapm sodn-wan an ih afek di way peepl liv, ih mek lata peepl geh poa, an ih eevn kil lata peepl. Bikaaz a aala dat, dehn feel dat fi dehn fyoocha noh wahn geh beta.

Bikaaz lata peepl noh shoar weh fi dehn fyoocha wahn stan laik, wahn lata dehn di saach fi sohnting weh ku gaid dehn tu wahn beta fyoocha. Sohn peepl bileev eena tingz weh dehn kyaahn si, laik lok. Wahn lata peepl tink dat ejukayshan ahn lata moni wahn mek dehn geh weh dehn waahn. Adaz feel dat yu jos haftu bee wahn gud persn fi ga wahn beta fyoocha.

Yu tink eni a dehndeh tingz wahn help yu geh di kaina fyoocha weh yoo waahn? Fi fain di ansa, yu need fi tink bowt dehnya kweschan:

• Da hoo fi disaid weh yu fyoocha wahn bee laik?

• Yu tink ejukayshan ahn lata moni ku mek yu ga wahn beta fyoocha?

• Yu tink if wi da wahn gud persn, dat inof fi ga wahn beta fyoocha?

• Weh ku help wi fi ga wahn beta fyoocha?

Dis kapi a Di Wachtowa ku help yu fain di ansa tu dehndeh kweschan.