HOROSKOAP: Sohn peepl bileev dat wen dehn baan, fi dehn fyoocha don get rait dong bays pahn di pozishan a di staarz. Dehn reed horoskoap fi mek dehn noa bowt dehn fyoocha er fi help dehn avoid daynja er fi fain sokses eena laif.

FENG SHUI: Wahn lata peepl bileev dat if dehn bil dehn hows wahn sertn way, ih wahn mek dehn ga sokses. Lo Wing, * hoo liv da Hong Kong, seh: “Wahn feng shui ekspert mi tel mi dat if Ah put wahn speshal kristal pahn wahn sertn spat eena mi shap, ih wahn help mi fi mek moa moni.”

WERSHIP A DI DED: Wahn lata peepl seh dat dehn haftu aana di ded fi geh dehn protekshan ahn blesin. Van, hoo liv da Vietnam, seh: “Ai mi bileev dat if Ah aana mi ansestaz weh ded, Ah wahn ga wahn beta laif now an Ah wahn ga wahn beta fyoocha fi mee ahn mi chiljren.”

DI DED KOHN BAK AHN LIV WAHN NADA LAIF: Wahn lata peepl bileev dat wen wahn persn ded, ih wahn baan agen, ahn dat wahn hapm oava ahn oava agen. Dehn bileev dat wateva hapm tu dehn now, weda gud er bad, da bikaaz a weh dehn mi du eena dehn laif bifoa.

Eevn doa wahn lata peepl noh bileev eena dehndeh ting, dehn stil praktis tingz laik reed han, reed kyaad, horoskoap, er tingz laik dehndeh. Dehn bileev dat dehndeh tingz ku help dehn noa weh wahn hapm eena di fyoocha.

Yu tink di peepl weh chros eena dehndeh bileef en op di ga wahn gud laif ahn wahn beta fyoocha?

Kansida di ekspeeryens a Hào, weh liv da Vietnam. Hihn mi yooz horoskoap, feng shui, an ih mi wership di ded. Yu tink dat mi help hihn fain wahn beta fyoocha? Hào seh: “Az wahn biznizman, Ah looz wahn lata moni, Ah mi oa wahn lat, Ah mi fays famili prablemz, an Ah mi feel dipres.”

Qiuming, hoo da fahn Taiwan, mi aalso bileev eena horoskoap, dat di ded wahn kohn bak ahn liv wahn nada laif, eena feng shui, an ih mi wership di ded. Afta hihn mi egzamin dehndeh bileef, hihn seh: “Ai mi fain owt dat dehndeh teechinz ahn kostomz noh mek no sens. Ah mi noatis dat weh di horoskoap pridik neva karek moas a di taim. Ahn wen ih kohn tu di bileef dat di ded wahn kohn bak ahn liv wahn nada laif, wel, if yu noh ga no memri bowt di laif yu mi ga bifoa, how yu ku eevn chaynj ahn du beta eena di neks laif?”

Wi si dat Hào, Qiuming, ahn wahn lata ada peepl kohn fi riyalaiz dat wi fyoocha noh geh rait dong heda taim, ih noh deh eena di staarz, ih noh geh beta wen wi aana di ded, an ih noh geh beta if wi wuda baan agen. Soh den, yu tink dis meenz dat wee noh ga kanchroal oava wi fyoocha?

Wahn lata peepl bileev dat if wi waahn ga wahn beta fyoocha, ih impoatant fi goh afta haiya ejukayshan ahn mek lata moni. Yu tink da kaina tinkin reeli help peepl?