WAHN lata di yong bradaz ahn sistaz da Betel kaal mi “Dadi,” “Papa,” er “Onkl.” Ahn bikaaz Ai 89 yaaz oal, Ai laik it. Tu mee, Ai seeʼt az paat a di riwaad fahn Jehoava fi serv ahn fi di paas 72 yaaz eena ful-taim servis. Ahn bays pahn mi ekspeeryens eena Gaad servis, Ai inkorij yong peepl fi neva giv op. Ah tel dehn: ‘Unu wahn geh wahn riwaad fi unu werk if unu noh geh diskorij ahn giv op.ʼ—2 Chron. 15:7.

Mi payrents mi moov tu Canada fahn Ukraine. Dehn mi setl dong eena wahn tong da Manitoba weh naym Rossburn. Mi ma mi ga 8 bwai ahn 8 gyal an Ai da-mi nomba 14. Mi pa mi lov di Baibl an ih yoostu reed it tu wi evri Sondeh maanin, bot tu hihn, rilijan da-mi jos wahn way fi skyam peepl owta dehn moni. Sohntaim, ih wuda mi ron wahn lee joak wid wi an aks, “Ah wanda hoo mi pay Jeezas fi goh preech ahn teech?”

Foa a mi breda dehn ahn foa a mi sista dehn mi aksep di chroot. Mi sista weh naym Rose mi painyaa til shee mi ded. Shee mi spen fi shee laas dayz di inkorij evribadi fi lisn tu di Werd a Gaad. Shee yoostu seh: “Ah waahn si unu eena di nyoo werl.” Mi oalda breda weh naym Ted yoostu bee wahn helfaiya preecha. Evri Sondeh maanin ih yoostu preech pahn di rayjo. Ih yoostu tel di peepl dat sinaz wahn bon op eena hel fareva. Laytaraan doh, ih mi en op di serv az wahn faytful servant a Jehoava, an ih mi reeli lov di minischri.

Wan day eena Joon 1944 wen Ah mi kohn hoam fahn skool, Ah mi fain wahn lee buk pahn di kichin taybl weh mi naym The Coming World Regeneration. * Ah mi reed di fos payj, den di sekant payj, ahn den Ah kudn stap reed. Afta Ah mi don reed di buk, Ah disaid dat Ai waahn serv Jehoava di way Jeezas mi serv ahn.

How dis lee buk mi en op pahn wi taybl? Mi oalda breda Steve mi tel mi dat too man weh mi-di sel buk mi kohn da wi hows. Ih seh: “Ah bai da wan kaaz ih mi onli kaas fai sehn.” Di man dehn kohn bak di neks Sondeh. Dehn tel wi dat dehn da Jehoava Witnisiz ahn dat dehn yooz di Baibl  fi ansa kweschanz weh peepl mait gat. Wi mi apreeshiayt dat kaaz fi wee payrents mi rayz wi op fi rispek di Baibl. Di man dehn tel wi dat di Witnisiz mi wahn ga wahn kanvenshan da Winnipeg, di saym siti weh mi sista Elsie mi liv. Soh, Ah mi disaid dat Ah mi gwehn da di kanvenshan.

Ah mi raid mi baisikl fi bowt 200 mailz (320 km) tu Winnipeg bot Ah stap lang di way da wahn tong weh naym Kelwood, wehpaat di saym too Witnisiz mi liv. Wen Ah mi dehdeh, Ah gaahn wid dehn da wahn meetin an Ah laan wat da wahn kangrigayshan. An Ah get fi andastan dat evri man, uman, ahn yong persn haftu goh teech peepl hows-tu-hows laik Jeezas.

Da Winnipeg, Ah mi meet mi oalda breda Jack. Hihn mi chravl tu di kanvenshan fahn naadan Ontario. Pahn di fos day a di kanvenshan, wahn brada mi anonks dat dehn mi wahn ga wahn baptizm. Wel, mee ahn Jack mi disaid dat wi mi wahn geh baptaiz da dis kanvenshan. Di too a wi mi waahn painyaa rait afta wi geh baptaiz. Jack mi staat painyaa afta di kanvenshan fi chroo. Bot Ai mi onli 16 yaaz oal soh Ah mi haftu goh bak da skool. Bot Ah mi staat painyaa di neks yaa.

Mee ahn Stan Nicolson mi staat painyaa tugeda eena wahn tong da Manitoba weh naym Souris. Ah mi laan dat fi bee wahn painyaa noh mi wahn aalwayz bee eezi. Wi moni mi-di ron owt, bot wi neva giv op. Wan taim afta wi mi-di preech aal day, wi mi-di goh bak hoam; wi mi hongri bad, ahn neva ga wahn kapa tu wi naym. Wen wi get hoam, wi mi sopraiz fi fain wahn big bag a food da wi doa! Tu dis day, wi noh noa da hoo mi put it deh. Da eevnin, wi mi eet laik king. Dat da-mi wahn riwaad fi weh wi neva geh diskorij ahn giv op! In fak, da di en a da mont, Ah mi way moa dan Ah mi eva way eena mi hoal laif.

Wahn fyoo monts layta, wi mi get asain tu wahn tong weh naym Gilbert Plains, bowt 150 mailz (240 km) naat a Souris. Eena dehn dayz deh, eech kangrigayshan yoostu ga wahn big chaat pahn di platfaam weh mi shoa how di kangrigayshan mi du eena di minischri fi eech mont. Wan mont di feel servis mi loa, soh Ah mi gi wahn taak tu di kangrigayshan fi tel di bradaz ahn sistaz dat dehn mi need fi du beta. Eena dis kangrigayshan, wi mi ga wahn oalda painyaa sista; fi shee hozban da neva wahn Witnis. Afta di meetin, shee kom op tu mi di krai ahn tel mi, “Ah mi chrai bot Ah jos kudn du moa dan weh Ah mi du.” Ah mi feel soh bad dat Ai staat krai tu an Ah tel ahn dat Ah mi soh sari.

Ai mi yong ahn neva ga moch ekspeeryens, soh wen Ah mi mek wahn mistayk laik da wan deh, Ah mi feel diskorij. Ih eezi fi yong bradaz feel diskorij wen dehn mek mistayk. Bot Ah laan dat insteda geh diskorij ahn giv op, ih beta fi laan fahn di mistayk ahn memba di lesn. If wi stay faytful eena wi servis ahn noh giv op, Jehoava wahn riwaad wi.

Wen Ah mi 21 yaaz oal, Ah mi ga di privilij fi gaahn da di 14th klaas a Gilyad! Ah mi grajuayt eena Febiweri 1950. Bowt kwaata a mi klaasmayt dehn mi geh asain tu Quebec fi preech tu peepl weh taak French. Joorin da taim, dehn mi-di persikyoot Jehoava Witnisiz wahn lat. Ah mi geh asain tu Val-dʼOr. Wan day, wahn groop a wi gaahn preech da wahn vilij naym Val-Senneville. Di prees mi chretn fi hert wi if wi neva lef di vilij rait away. Bikaaz a da chret, Ah mi en op da koat wid wahn kays gens di prees. Dehn mi chaaj di prees. *

Da kays, ahn wahn lat moa laik it, mi en op di bee paat a di “Batl a Quebec.” Di Roaman Kyaatlik Cherch mi-di kanchroal Quebec fi moa dan 300 yaaz. Di cherch leedaz ahn sohn politikal leedaz jain op fi persikyoot Jehoava Witnisiz. Dehn dayz neva eezi fi wi, ahn da-mi lee bit a wi; bot wi neva geh diskorij ahn giv op. Wi stil mi  fain sohn hombl peepl hoo mi rispan tu di gud nyooz. Ah mi ga di privilij fi stodi wid wahn fyoo peepl hoo mi aksep di chroot. Ah mi kandok wahn Baibl stodi wid wahn hoal famili—ten a dehn aal tugeda. Aala dehn mi staat serv Jehoava. Dehn mi ga korij, ahn fi dehn egzampl mi help adaz fi lef di Kyaatlik Cherch. Wi kip aan di preech, ahn wi en op di win di batl!

Eena 1956, Ah mi geh wahn nyoo asainment fi goh serv da Haiti. Moas a di nyoo mishineri dehn mi-di schrogl fi laan French, bot di peepl mi stil lisn tu dehn. Wahn mishineri brada weh naym Stanley Boggus mi seh: “Wi mi hapi fi si how di peepl chrai dehn bes fi help wi laan di langwij.” Fi di fos, Ah mi ga wahn advantij kaaz Ah mi laan French da Quebec. Bot wi mi fain owt dat moas a di bradaz da Haiti taak Hayshan Kriol. Soh if wee az mishineri mi waahn help di peepl, wi mi need fi laan di loakal langwij. Wel, wi laan it ahn wi mi geh lata riwaad fi wi haad werk.

Di Govanin Badi mi aproov di chranslayshan a Di Wachtowa an ada poblikayshanz intu Hayshan Kriol soh dat di bradaz kuda mi benifit. Di atendans da di meetin dehn mi gaan op. Dehn mi ga 99 poblishaz da Haiti eena 1950, bot bai 1960, moa dan 800 poblishaz mi dehdeh! Rong da taim deh, Ah mi geh asain fi serv da Betel. Eena 1961, Ah mi ga di privilij fi help kandok di Kingdom Minischri Skool. Wi mi chrayn 40 kangrigayshan oavaseeya ahn speshal painyaaz. Da di kanvenshan eena Janiweri 1962, wi mi inkorij di loakal bradaz hoo mi kwalifai fi du moa eena dehn minischri. Som a dehn mi geh apointid fi serv az speshal painyaa. Dis mi hapm da di rait taim kaaz noh lang afta dat persikyooshan mi staat.

Pahn Janiweri 23, 1962, jos afta di kanvenshan, dehn mi ares mee ahn wahn nada mishineri, Brada Andrew DʼAmico, da di branch aafis. Dehn mi tek weh di stak a di Janiweri 1962 Awake! weh mi deh eena French. Di Awake! mi koat wahn French nyoozpaypa weh mi seh dat  peepl praktis spiritizm da Haiti. Wel, som peepl neva laik dat ataal ahn klaym dat da wee mi rait di aatikl da di branch aafis. Wahn fyoo weeks layta, dehn dipoat aala di mishineri dehn. * Bot di loakal bradaz weh mi geh di chraynin tek di leed. Tudeh, Ah feel hapi fi si how dehn neva giv op ahn fi si di spirichwal proagres dehn mi mek. Now, dehn ga di New World Translation of the Holy Scriptures eena Hayshan Kriol. Dis da-mi sohnting wi kuda mi onli jreem bowt bak eena di day.

Afta mi asainment da Haiti, Ah mi geh asain fi serv da di Central African Republic. Layta, Ah mi ga di privilij fi serv az wahn serkit oavaseeya ahn den az branch oavaseeya.

Eena dehn dayz, wahn lata di Kingdom Haal dehn da-mi jos wahn lee tach hows. Soh Ah mi laan how fi kalek schraa fahn bakabush ahn how fi tach wahn roof. Dat reeli da-mi sohnting fi di loakal peepl dehn si! Bot, ih mi inkorij di bradaz fi bil ahn mantayn dehn oan Kingdom Haal. Sohn rilijos leedaz yoostu mak wi kaaz fi dehn cherch mi ga zink roof ahn fi wee Kingdom Haal dehn mi gat aan tach. Dat neva stap wi doh. Dehn mi stap mak wi wen wahn bad staam mi hit Bangui, di kyapital. Ih mi bloa aaf di zink roof aafa wan a dehn cherch ahn di roof mi en op pahn di schreet. Bot fi wee tach roof dehn mi stay aan. Wi mi bil wahn nyoo branch aafis ahn mishineri hoam fi provaid beta dairekshan fi di werk. Di kanschrokshan proajek mi tek onli faiv monts. *

Di preechin werk mi geh ban da di Central African Republic eena 1976. Da saym yaa, Ah mi geh asain tu NʼDjamena, di kyapital a Chad. Pahn di pazitiv said, Ah mi meet Happy, wahn speshal painyaa fahn Cameroon. Wi mi geh marid pahn Aypril 1, 1978. Da saym mont, waar mi brok owt, ahn laik moas peepl, wi gaahn tu di sowt a di konchri. Wen di waar mi oava, wi gaahn bak hoam ahn fain owt dat sohn soalja mi-di yooz wi hows az dehn hoam bays. Dehn gaahn wid di lichricha, Happy wedn jres, ahn wi wedn gif dehn. Bot wi neva geh diskorij ahn giv op. Wi mi stil ga wan anada ahn wi mi-di luk faawod tu moa werk.

Bowt too yaaz layta, dehn lif di ban eena di Central African Republic. Wi gaahn bak hoam, an Ah mi serv az wahn serkit oavaseeya. Wi mi en op di liv eena wahn van weh mi ga wahn bed weh kuda mi foal op. Wi mi ga wahn jrom weh kuda mi hoal 53 gyalan (200 L) a waata, wahn gyas rifrij, ahn wahn lee taybl-tap gyas stoav. Ih neva mi eezi fi chravl. Pahn wan chrip, wi mi stap da bowt 117 polees chekpoint.

Di weda mi soh hat, ih wuda get op tu 122 digreez Farenhait (50°C). Ih mi haad fi fain waata fi du baptizm da di asembli dehn. Soh di bradaz yoostu dig op jrai riva bed ahn kalek waata lee bit bai lee bit til wi get inof fi di baptizm. Lata taim dehn wuda du di baptizm eena wahn jrom.

Eena 1980 wi mi geh asain tu Nigeria. Fi too-an-a-haaf yaaz, wi mi help wid di preparayshan fi di kanschrokshan werk a di nyoo branch. Di bradaz mi bai wahn too-stoari wyaahows weh dehn mi brok dong ahn den set op bak pahn di kanschrokshan sait. Wahn maanin, Ah klaim op hai pahn di bildin fi help wid di werk. Rong lonch taim, Ah staat tu klaim bak dong di saym way Ah mi gaan op. Bot Ah neva noa dat dehn mi don tayr dong da said deh. Wel, Ah step intu di ayaa ahn dong Ah gaan. Mi kandishan mi luk seeryos, soh Ah mi du sohn X-ray ahn di dakta mi egzamin mi. Wen ih mi don, ih tel Happy: “Noh wori. Ih jos damij sohn ligament. Ih wahn bee aarait eena wahn week er soh.”

 Eena 1986 wi mi geh asain tu Côte dʼIvoire, weh Ah mi serv az wahn serkit oavaseeya. Wi mi vizit di bradaz da Burkina Faso tu. Bot wi neva imajin dat yaaz layta, wi mi wahn en op di liv da Burkina fi wahn wail.

Ah mi lef Canada eena 1956, bot eena 2003, wi mi geh asain fi serv da di Betel da Canada. Ah mi lef Canada bowt 47 yaaz aal tugeda. Pahn paypa wi da Canadian, bot wi mi feel dat wi mi bilangz da Africa.

Den eena 2007, wen Ah mi 79 yaaz oal, wi gaahn bak tu Africa agen! Ahn wi mi geh asain tu Burkina Faso, wehpaat Ah mi help az wahn memba a di Konchri Komiti. Laytaraan, dehn chaynj di aafis tu wahn rimoat chranslayshan aafis anda di branch da Benin. Den eena Aagas 2013, wi mi asain fi serv da di Betel da Benin.

Eevn doa Ah kyaahn du az moch now, Ah stil lov di minischri. Joorin di paas chree yaaz, Ah mi ga di jai fi si too a mi Baibl styoodents, Gédéon ahn Frégis, geh baptaiz. Dehn lov dehn servis tu Jehoava. Af koars, Ah onli kuda mi du dis wid di help a di eldaz ahn di lovin sopoat a mi waif.

Eena di meentaim, mee ahn mi waif mi geh asain tu di branch da South Africa, wehpaat di Betel famili reeli di tek kayr a mi helt. South Africa da di sevent konchri eena Africa weh Ah mi geh di privilij fi serv. Den eena Aktoaba 2017, wi mi geh wahn speshal blesin. Wi mi gaahn da di dedikayshan a di werl hedkwaataz da Warwick, New York. Dat da wahn ekspeeryens weh Ah wahn neva faget!

Di 1994 Yearbook pahn payj 255 seh: “Tu aala wi bradaz ahn sistaz hoo noh giv op eena di werk aal deez yaaz, wi inkorij unu: ‘Tek korij ahn noh giv op, bikaaz unu wahn geh wahn riwaad fi unu werk.ʼ—2 Chron. 15:7.” Mee ahn Happy mi mek op wi main fi fala dis advais an inkorij ada bradaz fi du di saym ting.