1. Weh Aizaiya mi prafesai bowt Jeezas, ahn wai dis inkorij wee?

DI PRAFIT Aizaiya mi seh dat Jeezas “noh wahn joj bays pahn onli weh ih si, ner gi kongsl bays pahn onli weh ih hyaa. Ih wahn bee fyaa wen ih joj di wan dehn weh poa.” (Isa. 11:3, 4) Dis prafesi toch wi haat. Wai dis prafesi soh inkorijin? Bikaaz wi di liv eena wahn werl weh peepl shoa fayvritizm ahn prejudis tuwaadz wan anada. Wi waahn da perfek Joj kaaz hihn noh wahn joj bays pahn how wi luk pahn di owtsaid!

2. Weh Jeezas mi koman wi fi du, ahn weh wi wahn diskos eena dis aatikl?

² Evri day wi joj peepl. Ahn bikaaz wi noh perfek, wi kuda neva joj tingz di way Jeezas joj. Hyoomanz joj mataz bays pahn weh dehn ku si. Bot wen Jeezas mi deh pahn di ert ih mi gi dis koman: ‘Noh joj nobadi bai how tingz luk, bot joj fyaa-wan.ʼ (Jan 7:24) Soh, Jeezas waahn wi bee laik hihn ahn noh joj adaz bays pahn how dehn luk pahn di owtsaid. Eena dis aatikl, wi wahn taak bowt chree tingz weh ku  afek di way wi joj adaz: dehn rays er kolcha, weda dehn rich er poa, ahn dehn ayj.

3, 4. (a) Wai Peeta mi chaynj di way ih tink bowt peepl hoo da noh Joo? (Koment pahn di picha da di biginin a dis aatikl.) (b) Weh nyoo chroot Jehoava mi teech Peeta?

³ Imajin weh mi-di goh chroo Peeta main wen ih mi geh di asainment fi goh da Kaaneelyos hows da Seezareeya. Now, Kaaneelyos da neva wahn Joo. (Aks 10:17-29) Peeta mi groa op di bileev dat peepl hoo da neva Joo neva fit fi serv Gaad. Bot Peeta mi ekspeeryens sohn tingz weh mi mek ih stap ahn tink if dat da-mi di karek way fi si tingz. Fi egzampl, Peeta mi jos si wahn vizhan. (Aks 10:9-16) Weh Peeta mi si? Sohnting laik wahn sheet ful op wid lata animal weh di Jooz neva fi eet mi kohn dong fronta ahn. Den, ih hyaa wahn vais fahn hevn seh: “Peeta, get op ahn kil eni wan a dehn yu waahn, ahn eet it.” Peeta mi rifyooz fi eet. Den di vais mi tel ahn: “Yoo noh ga no rait fi seh sohnting noh kleen wen Gaad ihself mek it kleen.” Wen ih wayk op fahn di vizhan, Peeta mi wel kanfyooz. Ih neva noa weh di vais mi-di tel ahn. Sayhn taim, sohn mesinja fahn Kaaneelyos mi reech. Afta Peeta geh gaidans fahn di hoali spirit, ih gaahn wid di mesinja dehn tu Kaaneelyos hows.

⁴ If Peeta mi joj tingz jos bai weh hihn kuda mi si, ih wuda neva eevn gaan eena Kaaneelyos hows. Di Jooish peepl neva yoostu goh eena sohnbadi els hows hoo da neva wahn Joo. Peeta neva mek prejudis stap ahn. Wai? Bikaaz a di vizhan ih mi si ahn di gaidans weh ih mi geh fahn di hoali spirit. Peeta mi lisn tu evriting weh Kaaneelyos mi ga fi seh. Dat mosi mi toch Peeta haat bikaaz ih seh: “Now Ah noa di chroot dat Gaad chreet evribadi di sayhn way. Gaad wahn aksep enibadi weh liv rait ahn weh wership ahn, noh mata weh konchri dehn kohn fram.” (Aks 10:34, 35) Dat da-mi wahn eksaitin nyoo andastandin fi Peeta—wan weh mi bring gud rizolts fi yaaz layta! How dis chroot afek aal Kristyanz?

5. (a) Weh Jehoava waahn aal Kristyanz fi andastan? (b) Eevn doa wi noa di chroot, weh ku stil deh deep dong eena wi haat?

⁵ Jehoava mi-di yooz Peeta fi help aala wi andastan dat Hihn noh prejudis. Tu hihn, ih noh mata wahn persn rays, kolcha, chraib, konchri, er langwij. Gaad aksep enibadi hoo wership hihn ahn du weh rait. (Gal. 3:26-28; Rev. 7:9, 10) Af koars, yu praabli wuda agree wid dat. Bot wat if yoo mi groa op eena wahn konchri er wahn hoam weh lata peepl prejudis? Yu mait tink dat yoo noh prejudis. Bot weh deh deep dong eena yu haat? Eni prejudis stil dehdeh? Eevn Peeta, hoo mi ga di privilij fi teech adaz dat Jehoava noh prejudis, laytaraan mi shoa prejudis ihself. (Gal. 2:11-14) How wi ku lisn tu Jeezas ahn stap joj adaz bays pahn weh wi ku si pahn di owtsaid?

6. (a) Weh ku help wi fi root owt prejudis fahn wi haat? (b) Weh di ripoat fahn wahn elda shoa?

⁶ Wi need fi yooz di Baibl fi egzamin wiself fi si if wi ga eni kaina prejudis tinkin er feelin. (Ps. 119:105) Sohntaim wi kyaahn si dat wi prejudis. Bot adaz  ku si, soh dehn ku help wi. (Gal. 2:11, 14) Ih ku bee dat prejudis deh soh deep dat wi noh eevn riyalaiz it. Kansida dis egzampl bowt wahn elda hoo mi put een wahn ripoat bowt wahn kopl eena ful-taim servis. Di hozban da-mi fahn wahn rays weh lata peepl luk dong pan. Wel, ih luk laik di elda neva riyalaiz dat hihn mi feel di saym way bowt peepl fahn da rays. Eena ih ripoat, ih seh wahn lata gud tingz bowt di hozban; bot tuwaadz di en, ih seh: “Aldoa hihn da [soch ahn soch rays], ih ga gud manaz ahn liv wahn beta way a laif. Dis reeli help adaz fi si dat [peepl fahn dis rays] noh haftu bee doti ahn loa-klaas, laik moas [peepl fahn dis rays].” Yu si di point? Noh mata weh rispansabiliti wi gat, wi haftu egzamin wiself ahn bee wilin fi geh help soh dat wi ku geh rid a eni feelinz a prejudis fahn wi haat. Wat els wi ku du?

7. How wi ku shoa dat wi waahn mek nyoo frenz?

⁷ If wi oapm wi haat waid, wi wahn alow lov fi tek di plays a prejudis. (2 Kor. 6:11-13) Yoo ga di habit fi spen taim onli wid bradaz fahn yu saym rays, kolcha, er konchri, er wid bradaz weh taak di saym langwij laik yoo? If dis da yu habit, den staat tu mek frenz wid adaz. Wai yu noh chrai dis: Invait bradaz ahn sistaz fahn difrent bakgrong fi werk wid yu eena di feel minischri er invait dehn da yu hows fi eet sohnting er fi wahn get tugeda. (Aks 16:14, 15) Wen yu du dat, yu wahn si dat yu haat geh ful op wid soh moch lov dat nohmoh room noh deh fi prejudis. Bot dehn ga ada tingz weh ku afek di way wi joj adaz. Now, mek wi taak bowt weda sombadi rich er poa.

8. Akaadn tu Leviticus 19:15, weh ku afek di way wi joj adaz?

⁸ Wahn nada ting weh ku afek di way wi vyoo adaz da weda dehn rich er poa. Leviticus 19:15 seh: “Yu noh fi bee prejudis tu di poa ner shoa fayvritizm tu di rich. Yu fi joj yu felo man wid jostis.” Wahn persn ku bee rich er poa. Bot dat noh fi afek di way wi vyoo dehn.

9. Weh Salaman mi seh, ahn weh wi ku laan fahn dat?

⁹ Hoali spirit mi moov Salaman fi rait sohnting weh veri sad, bot chroo, bowt hyoomanz. Da Proverbs 14:20, ih seh: “Eevn di nayba a di poa man hayt ahn, bot di rich persn ga wahn lata frenz.” Weh wi ku laan fahn dis skripcha? If wi noh kyaaful, wi mait prifaa fi spen taim wid bradaz weh rich an avoid bradaz weh poa. Wai ih soh daynjaros fi mek wi joj bays pahn humoch moni adaz gat?

10. Weh waanin Jaymz mi gi Kristyanz?

¹⁰ If wi joj adaz bays pahn weda dehn rich er poa, wi ku kaaz divizhan eena di kangrigayshan—rich peepl spen taim wid rich peepl ahn poa peepl spen taim wid poa peepl. (Reed Jaymz 2:1-4.) Wi haftu werk haad fi noh mek dis kaina tinkin afek wi kangrigayshan dehn tudeh. Weh wi ku du soh dat wi noh joj bays pahn weh wi si pahn di owtsaid?

11. Yu tink weh wahn persn oan afek ih rilayshanship wid Jehoava? Pleez eksplayn yu ansa.

¹¹ Wi need fi si wi bradaz di way Jehoava si dehn. Wahn persn noh preshos tu Jehoava bikaaz ih rich er poa. Wi rilayshanship wid Jehoava wahn neva dipen pahn humoch mateeryal tingz wi gat er noh gat. Da chroo dat Jeezas mi seh dat “ih haad fi sohnbadi weh rich get eena di kingdom a hevn,” bot ih  neva seh ih noh pasabl. (Mach. 19:23) Pahn di ada han, Jeezas mi seh: ‘Gaad bles unu weh noh ga notn now; kaa Gaad Kingdom da fi unu.ʼ (Look 6:20) Bot, dis neva meen dat aal poa peepl mi geh speshal blesinz er rispan tu Jeezas teechinz. Wahn lata poa peepl neva rispan ataal. Dis teech wi dat wi kyaahn joj wahn persn rilayshanship wid Jehoava bays pahn di mateeryal tingz ih gat.

12. Weh kongsl di Skripchaz gat een fi peepl weh rich er poa?

¹² Da wahn blesin fi ga wahn lata bradaz ahn sistaz, rich ahn poa, hoo lov Jehoava wid aala dehn haat. Di Skripchaz tel peepl weh rich fi noh “chros eena dehn lata fansi ting dehn weh dehn ga. Bikaaz nobadi noh noa fi chroo how lang dehndeh wahn laas. Insteda dat, dehn fi chros eena Gaad.” (Reed 1 Timoti 6:17-19.) Bot di saym taim, di Baibl waan aala Gaad peepl, rich er poa, noh fi lov moni. (1 Tim. 6:9, 10) Soh, wen wi reeli si wi bradaz di way Jehoava si dehn, wi noh wahn joj dehn bays pahn humoch mateeryal tingz dehn gat er noh gat. Bot how bowt wahn persn ayj? Yu tink dat da wahn gud reezn fi joj dehn? Mek wi si.

13. Weh di Skripchaz teech wi bowt rispek fi oalda peepl?

¹³ Di Skripchaz aalwayz tel wi fi shoa rispek fi oalda peepl. Leviticus 19:32 seh: “Yu fi rispek sombadi weh ga gray hyaa, ahn yu fi shoa aana tu wahn oalda man, ahn yu mos fyaa yu Gaad.” Proverbs 16:31 seh sohnting nayli laik dat. Ih seh: “Di gray hyaa a wahn raichos persn da laik wahn byootiful krong.” Ahn Paal mi tel Timoti fi noh kritisaiz wahn oalda man bot fi vyoo wahn oalda brada laik wahn pa. (1 Tim. 5:1, 2) Aldoa Timoti mi ga wahn sertn amonk a atariti oava oalda bradaz, ih mi fi chreet dehn wid kompashan ahn rispek.

14. Wen ih wuda bee prapa fi mek wahn yong persn kongsl wahn oalda persn?

¹⁴ How faar wi wuda goh fi aplai da prinsipl? Fi egzampl, sopoaz wahn oalda persn di komit wahn seeryos sin er di promoat weh Jehoava hayt. Yu tink wi shuda hoal bak fahn giv ahn kongsl? Jehoava noh wahn joj bays pahn weh hihn di si pahn di owtsaid, ner ih noh wahn ekskyooz wahn persn weh di sin jos bikaaz ih oalda. Noatis di prinsipl da Isaiah 65:20: “Di wan weh sin wahn geh ponish, eevn if ih don wan honjrid yaaz oal.” Wi ku geh wahn nada prinsipl laik dis fahn di vizhan weh Izeekyel mi si. (Ezek. 9:5-7) Wi mayn kansaan fi aalwayz bee fi shoa rispek fi Jehoava Gaad. (Dan. 7:9, 10, 13, 14) Den, if wahn persn need kongsl wi noh wahn hoal bak fahn karek dehn, noh mata dehn ayj.—Gal. 6:1.

15. Weh wi ku laan fahn Paal bowt shoa rispek fi yonga bradaz?

¹⁵ How bowt yonga bradaz eena di kangrigayshan? How yoo vyoo dehn? Paal mi tel di yong man Timoti: “Yu noh fi mek peepl luk dong pahn yu bikaaz yu yong. Insteda dat, yu fi shoa dehn wan weh bileev eena Krais di way dehn shuda bihayv, bai how yoo taak, how yu du tingz, how yu lov peepl, how yu chros eena Krais, ahn how yu di liv wahn kleen laif.” (1 Tim. 4:12) Wen Paal mi rait dat, Timoti mosi mi deh eena ih erli 30ʼs. Ahn stil, Paal mi asain ahn fi tek kayr a sohn impoatant rispansabiliti. Noh kay wat da di mayn reezn wai Paal  mi giv ahn dis kongsl, di point klayr. Wi noh fi joj wahn yonga brada bays pahn ih ayj. Wi haftu memba dat eevn Jeezas mi du ih minischri pahn di ert wen ih mi deh eena ih erli 30ʼs.

16, 17. (a) How eldaz ku noa if wahn brada kwalifai fi serv az wahn ministeeryal servant er wahn elda? (b) Wai ih impoatant fi pen pahn di Skripchaz rada dan wi oan opinyan er wi kolcha?

¹⁶ Wi mait kohn fahn wahn kolcha weh luk dong pahn di yonga man dehn. Eldaz eena wahn kangrigayshan mait hoal bak yong bradaz hoo kwalifai fi serv az ministeeryal servants er eldaz. Bot aal eldaz need fi memba dat di Skripchaz noh seh wahn brada haftu ga wahn sertn ayj bifoa ih ku serv eena di kangrigayshan. (1 Tim. 3:1-10, 12, 13; Taitos 1:5-9) * If wahn elda set wahn rool bays pahn kolcha, ih noh di ak akaadn tu di Skripchaz. Eldaz need fi si if wahn brada kwalifai fi serv az wahn ministeeryal servant er wahn elda bays pahn di Skripchaz, noh pahn dehn oan opinyan er kolcha.—2 Tim. 3:16, 17.

¹⁷ Tink bowt how vyooz laik dehndeh kuda hoal bak bradaz hoo kwalifai fi serv. Eena wan konchri, wahn ministeeryal servant mi geh asain sohn impoatant rispansabiliti. Aldoa di eldaz eena ih kangrigayshan mi agree dat di yong brada mi meet di kwalifikayshanz weh deh eena di Baibl fi wahn elda, dehn stil neva rekomen ahn. Wahn fyoo oalda eldaz mi-di seh dat di brada mi luk tu yong fi bee wahn elda. Di eldaz mi hoal bak di brada jos bikaaz a how ih mi luk. Aldoa dis da jos wan ekspeeryens, ada ripoats shoa dat dis way a tinkin di afek wahn lata wi bradaz rong di werl. Dats wai ih soh impoatant fi mek wi pen pahn di Skripchaz insteda wi oan persnal opinyan er kolcha! Dat da di onli way fi obay Jeezas koman ahn stap joj adaz bays pahn how dehn luk pahn di owtsaid.

18, 19. Weh wi need fi mek wi si adaz di way Jehoava si dehn?

¹⁸ Eevn doa wi noh perfek, wi ku stil laan fi si adaz di way Jehoava si dehn. (Aks 10:34, 35) Bot ih tek lata werk ahn rimaindaz fahn di Baibl. Ahn wen wi aplai dehnya rimainda, wi di obay Jeezas koman fi stap joj adaz bays pahn how dehn luk pahn di owtsaid.—Jan 7:24.

¹⁹ Soon wi King, Jeezas Krais, wahn joj aal hyoomanz. Ih noh wahn joj bays onli pahn weh ih si, er weh ih hyaa, bot ih wahn joj fyaa-wan. (Isa. 11:3, 4) Dat wahn bee wahn wandaful taim fi chroo!