1. Wat da sohn wayz wi ku shoa dat wi di werk lang wid Jehoava?

AFTA Jehoava mi mek hyoomanz, ih mi waahn dehn werk lang wid ahn. Eevn doa wi noh perfek, faytful hyoomanz ku stil werk wid Jehoava evri day. Fi egzampl, wi ‘werk tugeda wid Gaadʼ wen wi preech di gud nyooz a fi hihn Kingdom ahn mek disaipl. (1 Kor. 3:5-9) Eena dis aatikl, wi wahn laan how wi di werk wid hihn wen wi help wi famili ahn wi bradaz ahn sistaz eena di kangrigayshan, wen wi haspitabl, wen wi help owt pahn di difrent proajek dehn weh di aaganaizayshan du rong di werl, ahn wen wi du moa eena wi servis tu Jehoava.—Kol. 3:23.

2. Wai wi shudn kompyaa weh wi du fi Jehoava tu weh adaz du?

² Az wi stodi dis aatikl, noh kompyaa weh yoo ku du fi Jehoava tu weh adaz ku du. Memba dat aala wi kyaahn du di saym ting. Wi noh ga di saym ayj, sichuwayshan eena laif, er helt. Di apasl Paal mi seh: “Mek aala unu chek unu oanself gud fi si how unu di liv. Den unu wahn ku feel gud bowt unuself, ahn unu noh wahn hafu di luk pahn weh nobadi els di du.”—Gal. 6:4.

3. Wai wi ku seh dat enibadi hoo main ih famili gud di werk lang wid Gaad?

³ Jehoava ekspek aala wi fi main wi famili. Fi egzampl, yu mait haftu goh werk fi provaid weh yu famili need. Wahn lata mami stay hoam ahn main dehn yong pikni. Ahn wen wi payrents geh oal er sik, wi mait haftu main dehn tu. Dehnya da tingz weh wi haftu du. Di Baibl seh: “Evribadi fi tek kayr a dehn oan relitiv, ahn espeshali dehn wan weh deh eena dehn oan famili. If ih noh du dat, den da laik ih di seh dat weh wi bileev bowt Gaad noh meen notn ataal. Den ih wahn bee wosa dan sohnbadi weh noh bileev eena Krais.” (1 Tim. 5:8) If yu ga famili rispansabiliti, yu mait feel dat yu kyaahn du az moch az yu wuda waahn fi Jehoava. Bot noh geh diskorij! Jehoava pleez wid yu wen yu provaid fi yu famili.—1 Kor. 10:31.

4. How payrents ku put Kingdom inchres fos, ahn wat da di rizolt wen dehn du dis?

⁴ Kristyan payrents ku werk lang wid Jehoava wen dehn inkorij dehn chiljren fi ga spirichwal goalz. Wahn lata payrents hoo mi du dis, laytaraan geh fi si dehn chiljren serv Jehoava eena di ful-taim servis, sohntaim faar fahn hoam. Som a dehn da mishineri, adaz painyaa wehpaat dehn need help, an adaz serv da Betel. Bikaaz dehn deh faar fahn hoam, ih mait meen dat dehn noh si dehn famili az aafn az dehn wuda waahn. Bot, payrents hoo put spirichwal tingz fos inkorij dehn chiljren fi stay eena dehn asainment. Wai? Bikaaz dehn hapi ahn satisfai fi noa dat dehn chiljren di put Kingdom inchres fos eena dehn laif. (3 Jan 4) Maybi wahn lata dehnya payrents feel laik Hana, hoo mi seh dat shee “mi len” fi shee son Samwel tu Jehoava. Da wahn privilij fi mek dehnya payrents werk lang wid Jehoava eena dis way.—1 Sam. 1:28.

5. Wat da sohn wayz wi ku help owt wi bradaz ahn sistaz eena di kangrigayshan? (Koment pahn di picha da di biginin a dis aatikl.)

⁵ If yu noh ga lata famili rispansabiliti, yu tink yu kuda help owt wahn brada er sista hoo sik er hoo kyaahn du moch fi dehnself? Er yu tink yu kuda help dehn famili membaz hoo di tek kayr a dehn? Fi egzampl, maybi dehn ga wahn sista hoo di tek kayr a fi shee ma er pa. Yu tink yu kuda goh spen taim wid fi shee ma er pa soh dat shee ga taim fi ada tingz? Maybi yu ku aafa fi kehr wahn brada er sista tu di meetin, shapin, goh pay ih bilz, er fi vizit sombadi da di haaspital. Wen yu du dat, ih pasabl dat yu di werk lang wid Jehoava fi ansa sombadi pryaa.—Reed 1 Korintyanz 10:24.

6. Weh ih meen fi shoa haspitaliti?

⁶ Aal oava di werl, peepl noa Jehoava Witnisiz fi di haspitaliti dehn shoa. Eena di Kristyan Greek Skripchaz, di werd “haspitaliti” meen “shoa kainis tu peepl weh wi noh noa [schraynjaz].” (Heeb. 13:2, NW ftn.) Di Baibl gat een lata egzampl weh ku teech wi how fi shoa dis kaina lov. (Gen. 18:1-5) Wi haftu bee redi fi help adaz wen dehn need help, weda dehn da wi bradaz er nat.—Gal. 6:10.

7. Wat da di benifits wen yu shoa haspitaliti tu ful-taim servants?

⁷ Wahn nada way weh wi ku werk lang  wid Jehoava da wen wi shoa haspitaliti tu ful-taim servants hoo need wahn plays fi stay. (Reed 3 Jan 5, 8.) Wen wi invait dehn fi stay wid wi, dehn benifit ahn wee benifit tu. Dis da how wi “inkorij wan anada.” (Roam. 1:11, 12) Kansida di egzampl a Olaf. Ih seh dat yaaz agoa, nobadi eena ih kangrigayshan mi ga wahn plays fi mek di serkit oavaseeya stay. Di serkit oavaseeya mi singl. Olaf mi yong yet, bot ih aks ih payrents, hoo da neva Witnisiz, if di serkit oavaseeya kuda mi stay wid dehn. Dehn seh yes, bot Olaf wuda mi haftu sleep pahn di sofa. Olaf neva main dat ataal. Ih seh: “Dat da-mi wahn wandaful week! Mee ahn di serkit oavaseeya mi get op erli evri maanin ahn taak bowt wahn lata inchrestin tapik wail wi mi-di eet brekfas. Di inkorijment Ai mi get mek Ah mi waahn tek op di ful-taim servis.” Oava di laas 40 yaaz, Olaf serv eena difrent mishineri asainment.

8. Wai wi shuda shoa kainis tu sombadi eevn if ih luk laik di persn mait noh apreeshiayt it? Yooz di egzampl eena di paragraaf.

⁸ Wi ku shoa kainis tu peepl weh wi noh noa eena lata difrent wayz, eevn if dehn noh apreeshiayt weh wi du. Mek wi kansida dis egzampl. Wahn sista da Spain mi-di kandok wahn Baibl stodi wen shee noatis dat fi shee styoodent, Yesica, hoo da fahn Ecuador, kudn stap krai. Di sista aks ahn wai ih mi-di krai. Yesica seh dat bifoa shee mi moov tu Ecuador shee mi soh poa dat wan day shee neva ga notn fi shee an ih lee daata eet. Aal ih mi gat da-mi waata. Yesica mi chrai put di lee gyal fi sleep wail shee mi pray fi help. Wel, rait afta dat, too Witnisiz mi vizit ahn. Bot Yesica neva frenli tu dehn ahn tayr op di magazeen dehn giv ahn. Shee tel dehn: “Dis da di food weh unu waahn mek mee ahn mi pikni eet?” Di too sista mi chrai komfert ahn, bot notn neva werk. Laytaraan, dehn mi lef wahn baaskit a food da fi shee doa. Weh dehn sistaz mi du mi reeli toch Yesica haat. Now dat shee mi-di memba how ih mi gaan aan, ih mi feel bad kaaz shee mi ignoar Gaad ansa tu ih pryaa. Now, shee mek op ih main fi serv Jehoava. Fi dehn jenaros atichood mi afek ahn eena wahn gud way!—Eccl. 11:1, 6.

9, 10. (a) Wat da-mi som a di difrent taimz wen di Izrelait dehn mi haftu valantyaa dehn taim, enerji, ahn mateeryal tingz? (b) Wat da som a di rispansabiliti eena di kangrigayshan weh wilin bradaz tek kayr a?

⁹ Dehn mi ga difrent taimz eena di hischri a di Izrelait dehn wen Jehoava mi need valantyaaz. (Ex. 36:2; 1 Chron. 29:5; Neh. 11:2) Tudeh, wi ga lata difrent apachooniti fi valantyaa wi taim, mateeryal tingz, ahn skilz fi help wi bradaz ahn sistaz. Ahn wi wahn feel hapi ahn geh lata blesinz wen wi valantyaa fi du tingz fi Jehoava.

¹⁰ Di Baibl inkorij bradaz eena di kangrigayshan fi reech owt fi difrent privilij. (1 Tim. 3:1, 8, 9; 1 Peet. 5:2, 3) Bradaz hoo reech owt waahn help adaz eena dehn wership ahn lata ada wayz. (Aks 6:1-4) If di eldaz aks yu fi serv az wahn atendant er fi help owt wid di lichricha, teritori, mantaynans a di Kingdom Haal, er eniting els, yu wuda bee wilin fi help owt? Bradaz hoo ga dehn kaina rispansabiliti wahn tel yu dat ih feel gud fi help adaz.

11. How wahn sista mi benifit fahn di frenz weh ih mi mek wen ih mi werk pahn difrent kanschrokshan proajeks?

 ¹¹ Bradaz ahn sistaz hoo valantyaa fi werk pahn di difrent kanschrokshan proajeks aalwayz mek nyoo frenz. Kansida di egzampl a Margie, wahn sista hoo mi werk pahn difrent Kingdom Haal kanschrokshan proajeks fi 18 yaaz. Oava di yaaz, shee mi ga di chaans fi chrayn an inkorij lata yonga sistaz. (Roam. 1:12) Wen shee mi-di goh chroo wahn rof taim eena ih laif, shee mi geh inkorijment fahn dehn saym frenz shee mi mek pahn dehn proajeks. Yoo eva valantyaa fi wahn kanschrokshan proajek? Ih noh mata if yu ga di skilz er nat, yu tink yu kuda stil valantyaa?

12. How yu kuda help owt afta wahn nachral dizaasta?

¹² Wi ku werk lang wid Jehoava wen wi help wi bradaz afta wahn dizaasta. Fi egzampl, wi ku doanayt moni. (Jan 13:34, 35; Aks 11:27-30) Er wi ku help kleen er fiks op bak dehn hows if ih mi geh eni damij. Wahn sista fahn Poland, weh naym Gabriela, mi nayli looz ih hows bikaaz a wahn flod; di hows mi geh lata damij. Bot shee mi feel soh hapi wen di bradaz reech fi help ahn. Shee seh: “Ah noh waahn taak bowt weh Ah mi laas kaaz dehn tingz da jos mateeryal tingz. Insted, Ah waahn tel unu humoch Ah get. Dis ekspeeryens kanvins mi dat da wahn speshal privilij fi bee paat a dis big spirichwal famili. Ahn dis da weh Ai geh chroo jai ahn hapinis.” Wahn lata wi bradaz ahn sistaz weh geh help afta wahn dizaasta seh dat di ekspeeryens mi inkorij dehn. Ahn di bradaz hoo werk lang wid Jehoava fi help eena dis way geh lata satisfakshan tu.—Reed Aks 20:35; 2 Korintyanz 9:6, 7.

13. How wi schrentn wi lov fi Jehoava wen wi valantyaa? Yooz di egzampl eena di paragraaf.

¹³ Stephanie ahn sohn ada poblishaz mi ga di jai fi werk lang wid Gaad wen dehn mi help sohn Witnisiz hoo lef  dehn konchri bikaaz a waar fi goh liv da di United States. Dehn mi help di bradaz fi fain hows ahn fernicha. Stephanie seh: “Dehn jai an apreeshiayshan mi reeli toch wi. Dehn mi ekspeeryens di lov a wi spirichwal famili. Dehn mi tink dat da wee help dehn, bot reeli, da dehn mi help wi eevn moa dan weh wee mi help dehn. Dehndeh bradaz ga lov, yooniti, fayt, ahn chros eena Jehoava. Fi dehn egzampl schrentn fi wee lov fi Jehoava ahn mek wi ga moa apreeshiayshan fi aal weh wi geh chroo fi hihn aaganaizayshan.”

14, 15. (a) Weh atichood di prafit Aizaiya mi gat? (b) How wi ku shoa di saym atichood laik Aizaiya?

¹⁴ Yoo wuda waahn spen moa taim di werk fi Jehoava? Yoo wuda bee wilin fi goh liv sohnweh els weh need help? Af koars, wi noh haftu moov faar fi serv Jehoava. Bot som bradaz ahn sistaz ku du it. Dehn ga di saym atichood laik di prafit Aizaiya. Wen Jehoava aks: “Hoo Ah shuda sen, ahn hoo wahn goh fi wi?” Aizaiya rait away seh: “Si mi ya! Sen mee!” (Isa. 6:8) Yoo ku goh serv sohnweh els? Yoo wilin fi goh? Wel, wat da sohn wayz yoo ku help?

¹⁵ Jeezas mi-di taak bowt di preechin ahn teechin werk wen ih mi seh: ‘Lata grayn deh fi pik eena di feel, bot onli lee bit a peepl deh fi werk. Soh pray tu Gaad weh in chaaj a di haavis fi mek ih sen moa werkaz fi werk eena fi hihn feel.ʼ (Mach. 9:37, 38) Yu tink yu kuda goh serv sohnweh weh need help eena di minischri? Maybi yu kuda painyaa deh. Er maybi yu kuda help sombadi els fi goh serv. Wahn lata bradaz ahn sistaz feel dat di bes way fi shoa lov fi Gaad ahn nayba da fi painyaa wehpaat need help. Yoo ku tink a eni ada wayz weh yu ku du moa fi Jehoava? Yu wahn ga lata jai wen yu du dis.

16, 17. Wat els yu ku du if yu waahn du moa fi Jehoava?

¹⁶ Yoo tink yu wuda bee wilin fi serv da Betel er help wid di difrent kanschrokshan proajeks, eeda paat-taim er fi wahn fyoo dayz fi di week? Jehoava aaganaizayshan aalwayz need bradaz hoo wilin fi serv wehpaat need help ahn fi du wateva dehn aks dehn fi du eevn if dehn ga ekspeeryens di du sohnting els. Bot, wi noa dat Jehoava apreeshiayt di sakrifais wi bradaz ahn sistaz mek fi goh serv wehpaat need help.—Ps. 110:3.

¹⁷ Yoo wuda waahn geh moa chraynin soh dat yu ku du beta eena yu servis tu Jehoava? Wel, maybi yu kwalifai fi goh da di Skool fi Kingdom Ivanjelaizaz. Dis skool chrayn spirichwal bradaz ahn sistaz hoo deh eena ful-taim servis soh dat dehn ku du moa eena dehn minischri. Enibadi hoo aplai fi goh da dis skool need fi bee wilin fi aksep eni asainment wen dehn grajuayt. Yoo wuda bee wilin fi tek dis apachooniti fi du moa fi Jehoava?—1 Kor. 9:23.

18. Wat da di benifits wen wi werk wid Jehoava evri day?

¹⁸ Bikaaz wee da Jehoava peepl, wi jenaros, gud, kain, ahn lovin. Wi kay bowt wan anada evri day. Dis gi wi jai ahn pees, an ih mek wi feel hapi. (Gal. 5:22, 23) Noh mata wat da di sichuwayshan eena wi laif, wi ku fain jai wen wi jenaros laik Jehoava ahn kantinyu fi bee wan a fi hihn preshos werkaz!—Prov. 3:9, 10.