Jan di Baptis—Wahn Egzampl Weh Ku Help Wi Kip Wi Jai
YOO GA sohnting weh yu wuda lov fi du eena di kangrigayshan bot weh yu kyaahn du rait now? Ih ku bee wahn rispansabiliti weh sombadi els ga. Er maybi da wahn asainment, er privilij, weh yoo mi ga eena di paas. Bot, ayj, poar helt, moni prablemz, er famili rispansabiliti mek yu kyaahn du az moch az yu yoostu. Er ih ku bee dat yu mi haftu giv op wahn asainment weh yu mi-di du fi wahn lang taim bikaaz a chaynjiz eena di aaganaizayshan. Noh mata wat da di reezn, yu mait feel laik yu noh di du aal weh yu wuda waahn du eena yu servis tu Gaad. Eena sichuwayshanz laik dehndeh, wi ku andastan wai yu mait feel dong sohntaim. Bot weh ku help yu fi noh aalwayz feel diskorij er beks? How yu ku kip yu jai?
Wi ku laan sohnting impoatant bowt how fi kip wi jai fahn di egzampl a Jan di Baptis. Jan mi injai wahn lata wandaful privilij, bot hihn mi praabli ekspek ih laif eena Jehoava servis fi werk owt difrent fahn how ih mi akchwali en op di werk owt. Hihn praabli neva imajin dat hihn mi wahn spen moa taim da jayl dan ih mi spen eena di minischri. Bot stilyet, Jan mi kantinyu fi ga jai, ahn hihn mi kip dis kaina atichood fi di res a ih laif. Weh mi help ahn? Ahn how wi ku kip wi jai eevn wen tingz noh werk owt di way wi mi ekspek?
WAHN ASAINMENT WEH MI BRING JAI TU JAN
Rong di erli paat a 29 C.E., Jan mi staat tu du di werk weh Jehoava mi gi ahn fi du. Hihn mi staat tu pripyaa peepl fi di taim wen di Mesaiya mi wahn kohn. Hihn mi tel dehn: “Ton fahn unu sin dehn, kaa di kingdom a hevn wahn soon kohn.” (Mach. 3:2; Look 1:12-17) Wahn lata peepl mi lisn tu ahn. In fak, peepl mi kohn fahn aal oava fi hyaa ih mesij, ahn dis mi moov wahn lata dehn fi ripent ahn geh baptaiz. Aalso, Jan neva frayd fi waan di rilijos leedaz weh mi tink seh dehn soh hoali bowt weh mi wahn hapm tu dehn if dehn noh chaynj. (Mach. 3:5-12) Hihn mi du di moas impoatant ting eena ih minischri wen ih baptaiz Jeezas rong di en a 29 C.E. Fahn deh goh bak, Jan mi tel adaz fi fala Jeezas, di pramis Mesaiya.—Jan 1:32-37.
Bikaaz a Jan speshal roal, Jeezas kuda mi seh: “Owta aala di pikni weh uman eva baan, non noh deh weh grayta dan Jan.” (Mach. 11:11) Wi ku bee shoar dat Jan mi rijais oava di wandaful blesinz weh ih mi geh. Laik Jan, wahn lata wi bradaz ahn sistaz tudeh aalso geh wandaful blesinz fahn Jehoava. Kansida Terry egzampl. Hihn an ih waif, Sandra, spen oava 50 yaaz eena ful-taim servis. Terry seh: “Ah mi ga wahn lata wandaful privilij. Ah mi ga di privilij fi serv az wahn painyaa, wahn Betelait, wahn speshal painyaa, wahn serkit oavaseeya, wahn dischrik oavaseeya, ahn now az wahn speshal painyaa agen.” Wee hapi wen wi geh wahn asainment eena Jehoava servis, bot ih tek lata efoat fi stay hapi wen wi serkomstans chaynj. Dis da weh wi wahn laan fahn di egzampl a Jan.
AALWAYZ BEE GRAYTFUL FI WEH JEHOAVA ALOW YU FI DU
Jan di Baptis mi stay hapi bikaaz hihn mi graytful fi di privilij dehn weh ih mi ga. Mek wi luk pahn wahn egzampl. Afta Jeezas baptizm, di amonk a peepl weh mi-di fala Jan mi gaahn dong ahn di amonk a peepl weh mi-di fala Jeezas mi gaahn op. Jan disaipl dehn mi-di wori bowt dis, soh dehn seh tu Jan: “Teecha, yu si di man weh mi deh wid yu pahn di neks said a Jaadn. . . . Wel, ih deh ya di baptaiz tu, ahn evribadi di goh tu hihn.” (Jan 3:26) Jan ansa dehn seh: ‘Di groom da di wan weh ga di braid. Di groom fren jos dehdeh di lisn fi wen di groom kohn, an ih rijais wen ih yehr ih vais. Wel, da di sayhn way wid mee; dats wai Ai onli glad.ʼ (Jan 3:29) Jan neva kompeet wid Jeezas, ner ih neva feel laik fi hihn werk neva ga no valyu bikaaz Jeezas werk mi moa impoatant. Insted, Jan mi stay hapi bikaaz hihn mi kantinyu fi valyu fi hihn roal az “di groom fren.”
Jan atichood mi help ahn fi stay hapi eevn doa ih asainment neva eezi. Fi egzampl, fahn di taim Jan mi baan, hihn da-mi wahn Nazarait, ahn soh ih mi kyaahn jrink wain. (Look 1:15) Wen Jeezas mi-di taak bowt Jan baysik ahn simpl laifstail, ih seh: ‘Jan neva doz jrink an ih mi aalwayz di faas.ʼ Pahn di ada han, Jeezas an ih disaiplz neva deh anda di vow a wahn Nazarait, soh dehn mi liv wahn naamal laif. (Mach. 11:18, 19) Aalso, wail Jan kuda mi neva du eni mirakl, hihn mi noa dat Jeezas disaiplz, inkloodin dehn wan weh doz fala Jan, kuda mi du mirakl. (Mach. 10:1; Jan 10:41) Insteda tink tu moch bowt di difrens bitween fi hihn disaiplz ahn Jeezas disaiplz, Jan mi kantinyu fi bizi ihself wid ih asainment weh Jehoava mi gi ahn.
If wee chrezha fi wee asainment eena Jehoava servis jos laik Jan, wee ku aalso kip wi jai. Terry, weh wi mi menshan erliya, seh: “Ah foakos mi atenshan pahn eech asainment weh Ah mi geh.” Az hihn luk bak pahn ih laif eena ful-taim servis, ih seh: “Ah noh wish Ah mi du notn difrent, Ah onli ga wandaful memriz.”
Wee ku bee hapiya if wi tink bowt weh mek eni asainment er rispansabiliti eena Jehoava servis reeli speshal. Da di privilij fi bee ‘paadna weh di werk tugeda wid Gaad.ʼ (1 Kor. 3:9) Wahn preshos chrezha wahn aalwayz luk byootiful if wi tek kyaa a it. Sayhn way soh, wi wahn stay hapi eena Jehoava servis if wi kip di tink bowt di aana weh wi ga fi werk lang wid Jehoava. Wi noh wahn kompyaa fi wee werk wid nobadi els werk. Wi noh wahn tink dat di werk weh Jehoava gi adaz fi du moa impoatant dan di werk ih gi wee fi du.—Gal. 6:4.
FOAKOS PAHN TINGZ WEH IMPOATANT TU JEHOAVA
Jan mi praabli noa dat ih minischri neva wahn kantinyu fi wahn lang taim, bot ih praabli neva noa dat ih mi wahn en soh sodn. (Jan 3:30) Eena 30 C.E., bowt siks monts afta Jan mi baptaiz Jeezas, King Herod mi chroa Jan eena prizn. Stil, Jan mi du weh ih kuda mi du fi gi wahn witnis. (Maak 6:17-20) Weh mi help hihn fi stay hapi chroo dehnya chaynjiz? Hihn mi kantinyu fi foakos pahn tingz weh mi impoatant tu Jehoava.
Wail Jan mi deh eena prizn, ih mi geh ripoat bowt how Jeezas minischri mi-di groa. (Mach. 11:2; Look 7:18) Eevn doa Jan mi kanvins dat Jeezas da-mi di Mesaiya, ih praabli mi wanda how Jeezas wuda mi fulfil aal weh di Skripchaz seh ih mi wahn du. Bikaaz Jan mi noa dat di Mesaiya wuda bee King, hihn praabli mi wanda if Jeezas mi wahn bee King soon. Hihn maita mi aalso wanda weda Jeezas wuda mi free hihn fahn prizn. Jan mi waahn noa moa bowt weh Jeezas mi wahn du, soh ih sen too a ih disaipl fi aks Jeezas “if hihn da di Krais weh Gaad mi pramis fi sen, er if dehn shuda luk fi sohnbadi els.” (Look 7:19) Wen dehn kohn bak, Jan mosi mi lisn reeli gud az dehn diskraib how Jeezas du miraklz fi kyoar peepl, ahn den sen dehn bak fi tel Jan: “Blain peepl geh bak dehn sait, dehn wan weh mi kripl ku waak agen, peepl weh mi ga leprosi geh heel, ahn def peepl ku yehr agen. Ded peepl kohn bak tu laif, ahn di poa geh di Gud Nyooz preech tu dehn.”—Look 7:20-22.
Weh Jan disaipl dehn tel ahn mi reeli schrentn ahn. Ih mi proov dat Jeezas mi-di fulfil di prafesi dehn bowt di Mesaiya. Aldoa Jeezas neva free Jan fahn prizn, Jan mi noa dat fi hihn minischri mi impoatant. Eevn doa Jan mi eena prizn, ih mi ga reezn fi bee hapi.
Wen wi foakos pahn gud nyooz weh wi hyaa bowt wi werlwaid preechin werk, ih ku help wi kip wi jai
Laik Jan, if wi foakos pahn wi servis tu Jehoava, wi wahn ku bayr op wid jai ahn wid payshens. (Kol. 1:9-11) Wen wi reed wi Baibl ahn meditayt pan it, wi ku bayr op. Dis wahn help wi fi noa dat eniting weh wi du fi Gaad ga valyu. (1 Kor. 15:58) Wi ku foakos pahn di werk weh wi bradaz ahn sistaz di du fi Jehoava, ahn dis ku help wi fi stap tink onli bowt wiself. Sandra seh: “Wen Ah reed wahn chapta a di Baibl evri day, ih help mi fi jraa kloasa tu Jehoava. Ih help mi fi foakos pahn Hihn ahn noh pahn miself. Di proagram dehn weh kom owt evri mont pahn JW Braadkyaastin, help wi fi feel kloasa tu di aaganaizayshan ahn dehn help wi fi kip wi jai eena wi asainment.”
Joorin di shaat taim weh Jan di Baptis mi preech, hihn mi preech wid “di sayhn spirit ahn powa weh di prafit Ilaija mi ga,” ahn laik Ilaija, hihn “da-mi wahn man jos laik mee ahn yoo.” (Look 1:17; Jay. 5:17) If wee shoa apreeshiayshan laik Jan ahn stay foakos pahn wi servis tu Jehoava, wi wahn ku kip wi jai eena wi Kingdom servis noh mata weh hapm eena wi laif.
