1. Hoo mi help faam di kangrigayshan da Filipai?

WEN DI apasl Paal, Sailas, Look, ahn Timoti mi reech da di Roaman siti a Filipai, dehn mi fain lata peepl weh mi inchrestid eena di Kingdom gud nyooz. Dehnya foa bradaz weh mi ful a zeel mi help faam di kangrigayshan, an aala di nyoo bradaz ahn sistaz mi staat tu meet tugeda. Dehn mi praabli meet da di hows a wahn veri haspitabl sista weh naym Lidya.—Aks 16:40.

2. Weh chalenj di kangrigayshan mi wahn soon fays?

² Da nyoo kangrigayshan mi wahn soon fays wahn chalenj. Saytan mi mek peepl weh hayt di chroot chrai stap Paal ahn di ada bradaz weh mi deh wid ahn fahn preech. Paal ahn Sailas mi geh ares, dehn mi geh beet wid rad, ahn dehn mi geh put eena jayl. Afta dehn mi geh rilees fahn jayl, dehn mi vizit di nyoo disaiplz an inkorij dehn. Den Paal, Sailas, ahn Timoti mi lef di siti, bot ih luk laik Look mi stay deh. Weh di nyoo bradaz ahn sistaz wuda du now? Wid di help a Jehoava hoali spirit, di nyoo bradaz mi kantinyu fi serv Jehoava wid aala dehn haat. (Fil. 2:12) Paal mi ga gud reezn fi bee prowd a dehn!

3. Akaadn tu Filipiyanz 1:9-11, weh Paal mi pray fa?

³ Bowt ten yaaz layta, Paal mi rait wahn leta tu di kangrigayshan da Filipai. Az yu reed da leta, yu wahn si humoch Paal mi lov ih bradaz. Ih mi rait: “How bad Ah waahn deh wid unu. Ah lov unu wid di lov weh kohn fahn  Krais Jeezas ihself.” (Fil. 1:8) Ih mi tel dehn dat hihn mi pray fi dehn. Hihn mi aks Jehoava fi help dehn mek dehn lov groa schranga, fi mek shoar a di moa impoatant tingz, fi stay kleen, fi noh stombl adaz, ahn fi kantinyu bayr raichos froot. Eevn op tu tudeh, wi ku laan wahn lat fahn Paal werdz. (Reed Filipiyanz 1:9-11, NW.) * Eena dis aatikl wi wahn kansida eech wan a dehn tingz weh Paal mi pray fa, ahn wi wahn diskos how wi ku yooz eech wan a dehn eena wi laif.

4. (a) Akaadn tu 1 Jan 4:9, 10, how Jehoava shoa wi dat ih lov wi? (b) Humoch wi shuda lov Gaad?

⁴ Jehoava shoa humoch ih lov wi wen ih sen ih Son pahn di ert fi ded fi wi sin dehn. (Reed 1 Jan 4:9, 10.) Di kaina lov weh Gaad ga fi wi moov wi fi lov hihn. (Roam. 5:8) Humoch wi shuda lov Gaad? Jeezas gi wi di ansa wen ih tel wahn Farisee: “Yu fi lov di Laad yu Gaad wid aala yu haat, ahn wid aala yu soal, ahn wid aala yu main.” (Mach. 22:36, 37) Wi waahn lov Gaad wid wi hoal haat. Ahn wi waahn wi lov fi hihn groa schranga evri day. Paal mi tel di bradaz da Filipai dat dehn lov shuda “geh schranga ahn schranga.” Weh wi ku du soh dat wi lov fi Gaad groa schranga?

5. How yu lov ku groa schranga?

⁵ Wi need fi noa Gaad soh dat wi ku lov ahn. Di Baibl seh: “Enibadi weh noh lov noh noa Gaad, kaa Gaad da lov.” (1 Jan 4:8) Di apasl Paal mi seh dat wi lov fi Gaad wuda groa schranga az wi geh “chroo andastandin ahn wizdom” a Hihn. (Fil. 1:9, NW) Wen wi mi staat tu stodi di Baibl, wi mi staat tu lov Jehoava eevn doa wi neva noa evriting bowt hihn. Den di moa wi mi laan bowt Jehoava, di schranga wi lov fi hihn mi geh. Dat da wai ih soh impoatant dat wi stodi di Baibl regyula ahn meditayt pahn weh wi reed!—Fil. 2:16.

6. Akaadn tu 1 Jan 4:11, 20, 21, eena weh way wi lov ku groa schranga?

⁶ Di grayt lov weh Gaad ga fi wi mek wi waahn lov wi bradaz. (Reed 1 Jan 4:11, 20, 21.) Wi mait tink dat ih eezi fi lov wi bradaz ahn sistaz. Dis da bikaaz wi wership Jehoava ahn wi chrai fi kapi fi hihn kwalitiz. Wee fala Jeezas egzampl a how fi shoa lov; hihn mi eevn giv op ih laif fi aala wi. Bot, sohntaim ih haad fi obay di komanment fi lov wan anada. Kansida wahn egzampl eena di kangrigayshan da Filipai.

7. Weh wi laan fahn di kongsl weh di apasl Paal mi gi Yuoadiya ahn Sintiki?

⁷ Yuoadiya ahn Sintiki da-mi sohn haad-werkin sistaz weh mi werk “tugeda” wid di apasl Paal. Bot ih luk laik dehn kudn gree pahn sohnting ahn dehn mi stap bee frenz. Eena di leta weh Paal mi sen tu di kangrigayshan wehpaat dehn too sistaz mi-di serv, Paal mi gi dehn klyaa kongsl fi “stap kwaaril ahn chrai fi gree wid wan anada.” (Fil. 4:2, 3) Paal mi aalso tink dat ih mi nesiseri fi tel di hoal kangrigayshan fi “du evriting widowt di komplayn ahn aagyu.” (Fil. 2:14) Fi shoar dis dairek kongsl mi help dehn too sistaz, bot ih mi aalso  help di hoal kangrigayshan fi lov wan anada eevn moa.

8. Weh ku mek it haad fi lov wi bradaz ahn sistaz ahn weh ku help wi?

⁸ Jos laik Yuoadiya ahn Sintiki, somtaimz wi fain it haad fi lov wi bradaz ahn sistaz bikaaz wi foakos onli pahn dehn mistayks. Aala wi mek mistayk evri day. If wi stay di foakos pahn di mistayks weh adaz mek, wi lov fi dehn wahn geh koal. Fi egzampl, if wahn brada faget fi kleen di Kingdom Haal, wee mait get beks. Ahn if wi staat tu lis aaf aala di mistayk dehn weh wi brada don mek, wi wahn geh moa beks ahn di lov wi ga far ahn wahn fayd weh. If yoo ga wahn prablem laik dis wid sombadi eena yu kangrigayshan, tink bowt dis: Jehoava noa bowt fi wee mistayk dehn ahn di mistayk dehn a wi brada. Bot stil, hihn lov wi brada an ih lov wee tu. Dat da wai, wi need fi kapi Jehoava lov ahn foakos pahn di gud kwalitiz a wi bradaz. Wen wi werk haad fi lov wi bradaz, wi geh fi bee moa yoonaitid.—Fil. 2:1, 2.

9. Wat da som a “di moa impoatant tingz” weh Paal menshan tu di Kristyanz da Filipai?

⁹ Hoali spirit da weh mi mek Paal teech di bradaz da Filipai—an aal Kristyanz—fi “mek shoar a di moa impoatant tingz.” (Fil. 1:10, NW) Dehnya impoatant tingz inklood aana Jehoava naym, di pramis dehn weh kohn chroo, ahn di pees ahn yooniti eena di kangrigayshan. (Mach. 6:9, 10; Jan 13:35) Wen dehnya tingz da di moas impoatant tingz eena wi laif, wi proov dat wi lov Jehoava.

10. Weh wi need fi du fi kip wahn aanis haat?

¹⁰ Paal mi aalso seh dat wi fi “kip wahn aanis haat.” Dis noh meenz dat wi fi bee perfek. Af koars wi kyaahn bee az pyoar az wi hoali Gaad, Jehoava. Bot Jehoava wahn aksep wi if wi du wi veri bes fi ga moa lov ahn mek shoar a di moa impoatant tingz. Wan way wi ku shoa wi lov da fi du wi bes fi noh stombl adaz.

11. Wai wi noh fi stombl adaz?

¹¹ Di koman fi noh stombl adaz da akchwali wahn seeryos waanin. Eena weh wayz wi mait stombl sombadi? Wi ku stombl sombadi bai weh wi chooz az entataynment, bai di way wi jres, er eevn bai di jab wi pik. Maybi wi noh di du sohnting weh Jehoava kandem. Bot if di chois dehn weh wi mek ofen sombadi kanshans ahn stombl dehn, den dat seeryos. Jeezas mi seh dat if wee kaaz wan a wi dyaa bradaz fi damij ih rilayshanship wid Jehoava, ih wers dan if dehn tai wahn big hevi rakstoan rong wi nek ahn chroa wi da di batam a di see!—Mach. 18:6.

12. Weh wi laan fahn di egzampl a wahn painyaa kopl?

¹² Noatis how wahn painyaa kopl mi aplai weh Jeezas seh. Dehn mi serv eena wahn kangrigayshan wid wahn kopl weh mi laytli geh baptaiz. Di nyoo kopl mi geh rayz eena sohn schrik famili weh neva alow dehn fi du lata tingz. Dis nyoo kopl mi bileev dat Kristyanz noh fi wach moovi non ataal. Dehn mi shak wen dehn geh fi noa dat di painyaa kopl mi gaahn wach wahn moovi. Afta dat, di painyaa kopl mi stap goh da tayta fi wach moovi til di nyoo bradaz mi aybl fi chrayn dehn oan kanshans ahn shoa beta jojment. (Heeb. 5:14) Eena dis way, di painyaa kopl mi proov dat dehn lov  dehn nyoo brada ahn sista bai weh dehn seh ahn bai weh dehn du.—Roam. 14:19-21; 1 Jan 3:18.

13. How wee ku kaaz sombadi fi komit wahn sin?

¹³ Wahn neks way wi ku stombl sombadi da if wi kaaz dehn fi komit wahn sin. How dat ku hapm? Imajin dis sichuwayshan. Afta wahn lang, haad schrogl, wahn Baibl styoodent weh mi ga wahn jrinkin prablem fainali get it anda kanchroal. Ih mek shoar dat ih kip faar fan it ahn noh jrink agen. Hihn mek lata chaynjiz eena ih laif ahn geh baptaiz. Layta, wahn brada invait ahn tu wahn get-tugeda an aafa ahn wahn jrink ahn tel ahn: “Yoo da wahn Kristyan now; yu ga Jehoava spirit. Wan kwaliti a da spirit da self-kanchroal. If yoo praktis self-kanchroal, yu wahn ku jrink jos lee bit.” Ih wuda bee reeli sad if di nyoo brada wuda lisn tu da rang advais ahn geh huk pahn alkohol agen!

14. How wi Kristyan meetinz help wi fi put intu praktis di koman weh deh da Filipiyanz 1:10?

¹⁴ Wi Kristyan meetinz help wi fi put intu praktis di koman weh deh da Filipiyanz 1:10 eena lata wayz. Fos, weh wi diskos da di meetin dehn rimain wi a weh Jehoava si az moa impoatant. Sekant, wi laan fi put intu praktis weh wi laan soh dat wi stay kleen. Ahn terd, wi geh inkorij fi “shoa lov ahn du gud.” (Heeb. 10:24, 25) Wen wi bradaz inkorij wi, wi lov fi wi Gaad ahn wi bradaz wahn groa moa ahn moa. Ahn wen wi lov Gaad ahn wi bradaz wid aala wi haat,  wi wahn du wi veri bes fi noh stombl adaz.

15. Weh ih meenz fi “bee ful wid di raichos froot”?

¹⁵ Paal mi pray wid wahn sinsyaa haat dat di bradaz da Filipai wuda geh “ful wid di raichos froot.” (Fil. 1:11, NW) Fi shoar di “raichos froot” mi inklood dehn lov fi Jehoava an ih peepl. Dat wuda aalso inklood dat dehn taak tu adaz bowt dehn fayt eena Jeezas ahn dehn wandaful hoap. Di skripcha da Filipiyanz 2:15 yooz wahn nada iloschrayshan, ih seh: “Unu laif mos bee laik wahn lait tu dehn.” Dis iloschrayshan rimain wi a how Jeezas mi rifaa tu ih disaiplz. Ih mi seh: “Unu da laik lait fi di peepl dehn a dis werl.” (Mach. 5:14-16) Hihn mi aalso koman ih falowaz fi “chrayn peepl fahn owta aala di nayshan dehn fi bee [fi hihn] disaipl dehn,” ahn hihn mi seh dat dehn mi wahn preech di gud nyooz “aal oava di werl.” (Mach. 28:18-20; Aks 1:8) Wi bayr “raichos froot” wen wi werk az haad az wi kud eena dis impoatant werk.

16. How Filipiyanz 1:12-14 shoa dat wi ku shain laik wahn lait eevn wen wi di goh chroo sohn tof sichuwayshan? (Koment pahn di picha pahn di kova.)

¹⁶ Noh mata wat da wi sichuwayshan, wi ku shain laik wahn lait. Sohntaim, tingz weh luk laik dehn ku kip wi bak fahn preech mait akchwali tern owt fi bee wahn apachooniti fi preech. Fi egzampl, di apasl Paal mi deh anda hows ares wen ih mi rait ih leta tu di Filipiyanz. Bot dat neva stap ahn fahn preech tu di gyaad dehn er tu peepl weh mi vizit ahn. Paal mi preech eevn anda dehnya serkomstans, an ih mi giv ih bradaz  moa korij “fi preech di Werd a Gaad widowt feel frayd.”—Reed Filipiyanz 1:12-14; 4:22.

17. Giv wahn egzampl a how sohn bradaz ahn sistaz aybl fi preech eevn wen ih noh eezi.

¹⁷ Lata wi bradaz ahn sistaz shoa di saym korij laik Paal. Dehn liv eena sohn konchri wehpaat dehn kyaahn preech eena poblik er fahn hows tu hows, soh dehn fain ada wayz fi preech di gud nyooz. (Mach. 10:16-20) Eena wan a dehn konchriz, wahn serkit oavaseeya mi sojes dat eech poblisha shuda preech eena dehn oan “teritori.” Dat meenz dehn relitiv, dehn naybaz, dehn klaasmayt, dehn werkmayt, an enibadi els dehn noa. Eena jos too yaaz, di amonk a kangrigayshanz eena da serkit mi groa wahn lat. Maybi wee liv eena wahn konchri wehpaat di preechin werk noh deh anda ban ahn wi ku preech widowt prablem. Bot, wi ku laan wahn impoatant lesn fahn dehnya bradaz ahn sistaz: If wi du aal wi kud fi preech tu adaz, Jehoava wahn giv wi di powa wi need fi kantinyu preech eevn if ih noh eezi.—Fil. 2:13.

18. Weh wi shuda mek op wi main fi du?

¹⁸ Now moa dan eva bifoa, wi shuda mek op wi main fi fala di kongsl weh Paal mi rait eena ih leta tu di bradaz da Filipai. Wi fi mek shoar a di moa impoatant tingz, wi fi mek shoar fi ga wahn aanis haat, wi noh fi stombl adaz, ahn wi fi bayr raichos froot. If wi du dat, den wi lov wahn groa schranga ahn schranga ahn wi wahn aana wi lovin Faada, Jehoava.